ރާއްޖެއިން އެންމެ ގިނައިން ޕޮޒިޓިވްވީ ބަންގްލަދޭޝްގެ މީހުން
27 އެޕްރީލު 2020 | ހޯމަ 00:26ޕޮޒިޓިވްވީ މީހުންގެ ތެރޭގައި ގިނައީ ތޮއްޖެހިގެން ދިރިއުޅޭ މީހުން
ރާއްޖޭގައި މަސައްކަތްކުރާ ބަންގްލަދޭޝް މަސައްކަތްތެރީން
ރާއްޖެއިން ކޮވިޑް-19 އަށް ޕޮޒިޓިވްވި ބަންގްލަދޭޝް މީހުންގެ އަދަދު 102 އަށް އަަރައިފި އެވެ.
މާލެއިން އެންމެ ފުރަތަމަ ކޭސްއެއް ފެނިފައިވަނީ މި ހިނގާ އޭޕްރީލް މަހުގެ 15 ވަނަ ދުވަހުއެވެ. އޭގެ ފަހުން ދުވަހެއް ދުވަހަކަށް ކޭސްތަކުގެ އަދަދު ދަނީ އިތުރުވަމުންނެވެ. އެޗްޕީއޭއިން އާއްމު ކޮށްފައިވާ މައުލޫމާތުތަކަށް ބަލާއިރު ރާއްޖެއިން ޕޮޒިޓިވްވި މީހުންގެ ތެރެއިން 47.66 އިންސައްތަ މީހުންނަކީ ބަންގްލަދޭޝް އަށް ނިސްބަތްވާ މީހުންނެވެ.
މި އަދަދުތައް ކުރިއަށް އޮތް ދުވަސްތަކުގެ ތެރޭގައި އިތުރުވާނެ ކަމަށް ވަނީ ބެލެވިފަ އެވެ. މިހާތަނަށް ޕޮޒިޓިވްވްވީ ބިދޭސީންގެ ތެރޭގައި ހިމެނޭ ގިނަ ފަރާތްތަކަކީ ބަލީގެ ހިރާސް ބޮޑުކަމަށް ފާހަގަކުރެވިފައިވާ ތަންތަނުން ދައުލަތުގެ ބެލުމުގެ ދަށަށް ގެންދެވިފައިވާ ފަރާތްތަކެވެ.
ރާއްޖެއިން މިހާތަނަށް ފެނިފައިވާ އެންމެ ބޮޑު ކްލަސްޓަރތައް ކަމުގައިވާ "ލިލީ ކްލަސްޓަރ" އާއި "އެމްއެޗްއޭ ކްލަސްޓަރ" އަދި "އަމީން ހިޔާ ކްލަސްޓަރ" އިން ފާހަގަކުރެވިފައިވާ ގިނަ ފަރާތްތަކަކީ ބަންގްލަދޭޝްގެ ރައްޔިތުންނެވެ. "ލިލީ ކްލަސްޓަރ" އަދި "އެމްއެޗްއޭ ކްލަސްޓަރ" އިން ފާހަގަކުރެވުނު ގިނަ މީހުންނަކީ ފިހާރަތަކަށާއި އާންމު ގޭބިސީތަކަށް ޑެލިވަރީ ކުރަން އުޅުނު ފަރާތްތަކެކެވެ.
"އަމީން ހިޔާ ކްލަސްޓަރ" އިން ފެނުނު ބިދޭސީންނަކީ މާލޭގައި ތޮއްޖެހިގެން ދިރިއުޅޭ ތަންތަނުން ދައުލަތުގެ ބެލުމުގެ ދަށަށް ގެންދެވުނު ބިދޭސީންނެވެ. މި ބިދޭސީން އެކިއެކި ފެސިލިޓީތަކަށް ބަދަލުކުރުމުގެ މަސައްކަތް ފަށާފައިވަނީ އޭޕްރިލް 12 ގަ އެވެ. މި ކްލަސްޓަރއަށް ނިސްބަތްވާ ފަރާތްތަކުގެ ތެރެއިން އެންމެ ފުރަތަމަ ކޭސް އިއުލާންކޮށްފައިވަނީ އޭޕްރިލް 19 ގަ އެވެ.
މީގެ އިތުރުން، ތޮއްޖެހިގެން މީހުން ދިރިއުޅޭ ކަމަށް ފާހަގަކުރެވިފައިވާ ގިނަ އަދަދެއްގެ ތަންތަނުން ވަދެ ނިކުމެ އުޅުން ފުލުހުން ވަނީ މޮނީޓަރކުރަން ފަށާފަ އެވެ. އަދި މި މަހުގެ ކުރީކޮޅު މިފަދަ ބިދޭސީން ދިރިއުޅޭ ތަންތަން ދެނެގަތުމަށް މޯލްޑިވަސް ޕޮލިސް ސަރވިސް، އިކޮނޮމިކް މިނިސްޓްރީ އަދި މާލެ ސިޓީ ކައުންސިލް ގުޅިގެން ދިރާސާއެއް ހަދާފައިވެ އެވެ.
