30 އަހަރަށްފަހު ކްރިކެޓް ކާނިވަލް ކެންސަލް
މިއީ 1990 ވަނަ އަހަރު ބާއްވަން ފެށި މި ކާނިވަލް ކެންސަލް ކުރި ފުރަތަމަ ފަހަރު
މިދިޔަ އަހަރުގެ ރަމަޟާން މަހުގައި ކުރިއަށްގެންދިޔަ ކްރިކެޓް ކާނިވަލްގެ ތެރެއިން
ކޮންމެ އަހަރަކުވެސް ކްރިކެޓް ބޯޑް އޮފް މޯލްޑިވްސްއިން އިންތިޒާމުކޮށްގެން ރަމަޟާން މަހުގައި ކުރިއަށްގެންދާ ކްރިކެޓް ކާނިވަލް، 30 އަހަރަށް ފަހު ފުރަތަމަ ފަހަރަށް ކެންސަލް ކޮށްފި އެވެ.
މިއަހަރުގެ މުބާރާތް ކެންސަލް ކުރީ ރާއްޖޭގައި މިހާރު ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ގުޅިގެންނެވެ. މިއީ 1990 ވަނަ އަހަރު ބާއްވަން ފެށި މި ކާނިވަލް ކެންސަލް ކުރި ފުރަތަމަ ފަހަރެވެ. ކޮންމެ އަހަރަކުވެސް ފޯރިއާއެކު ކުރިއަށްދާ ކްރިކެޓް ކާނިވަލްގައި ތިން މުބާރާތެއް ކުޅެއެވެ. އެއީ އޯޕަން ޓޭޕްބޯލް ކްރިކެޓް މުބާރާތާއި، ކުންފުނިތަކަށް ހުޅުވާލައިގެން ބާއްވާ ކޮމްޕެނީ ޓޭޕްބޯލް ކްރިކެޓް މުބާރާތާއި، ސަރުކާރު އޮފީސްތަކުގެ މެދުގައި ބާއްވާ އޮފީސް ޓޭޕްބޯލް ކްރިކެޓް މުބާރާތެވެ.
ގަލޮޅު ދަނޑުގައި 1990 ވަނަ އަހަރު ބާއްވަން ފެށި މި ކާނިވަލް އެންމެ ފުރަތަމަ އިންތިޒާމުކުރި އަމިއްލަ ފަރާތަކުންނެވެ. އޭރު ކާނިވަލްގެ ކުޅުން ކުރިއަށް ގެންގޮސްފައިވަނީ ޓެނިސް ބޯޅައަކުންނެވެ. ކްރިކެޓް ބޯޑުން މި ކާނިވަލް އިންތިޒާމުކުރަން ފެށީ 1992 ވަނަ އަހަރުން ފެށިގެންނެވެ.
ކްރިކެޓް ކާނިވަލަކީ ރަމަޟާން މަހުގައި ކުރިއަށްގެންދާ އެންމެ ބޮޑު އެއް ކުޅިވަރު ހަރަކާތެވެ. އެގޮތުން މިދިޔަ އަހަރުގެ މުބާރާތުގައިވެސް ވަނީ ޖުމުލަ 33 ޓީމު ވާދަކޮށްފައެވެ.
ކޮވިޑް-19 އާ ގުޅިގެން މިއަހަރުގެ ކްރިކެޓް ކާނިވަލް ކެންސަލްކޮށް، ކްރިކެޓްގެ އިތުރު ހަރަކާތްތައްވެސް ހުއްޓުމަކަށް އައިސްފައިވާއިރު، މިހާތަނަށް ރާއްޖެއިން 177 މީހަކު ވަނީ މި ވައިރަހަށް ޕޮޒިޓިވް ވެފައެވެ.
