ލ.ކުނަހަންދޫ ކައުންސިލް އަދި ކްރިކެޓްބޯޑް އޮފް މޯލްޑިވްސް އިން އިންތިޒާމުކޮށްގެން ކުރިޔަށްގެންދާ ރޮމްބަސް ކްރިކެޓް ކާނިވަލްގައި ހޮނިހިރު ދުވަހު ކުޅުނު މެޗު ރޮމްބަސްއާ ވާދަކޮށް ދަމާސް މެޗު ކާމިޔާބުކޮށްފި އެވެ.

މި މެޗުގެ ޓޮސް ދިމާވެގެން ދަމާސް ޓީމު ގަސްތުކުރީ ހޮވާށެވެ. އެގޮތުން ރޮމްބަސް ޓީމު ވަނީ ކުޅެން އަރާ 11 އޯވަރު ތެރޭގައި 87 ލަނޑާފައެވެ. ޖަވާބުގައި ދަމާސް އިން ވަނީ ކުޅެން އަރާ 10 އޯވަރު ތެރޭގައި 90 ލަނޑު ހަދާފަ އެވެ.

މި މެޗުގައި އެންމެ ރަނގަޅަށް ކުޅުނީ ރޮމްބަސް ޓީމުގެ 34 ލަނޑު ހެދި މުނާޒް އެވެ. ދަމާސް ޓީމުން އެންމެ ރަނގަޅަށް ކުޅުނީ 39 ލަނޑު ހެދި ސަމައިދާ އެވެ.

މި މުބާރާތުގައި މިވީތަނަށް ދެ މެޗު ވަނީ ކުޅެފައެވެ. ފުރަތަމަ މެޗުގައި ރޮމްބަސް އާއި ސޮނީ ހާޑްވެއާ އެވެ. މި މެޗު ކާމިޔާބުކުރީ ރޮމްބަސް ޓީމެވެ. ދެވަނަ މެޗުގައި ޓެޕްކޮން އާއި ބައިސަން ޓީމު ބައްދަލުކޮށްފައިވާއިރު، މި މެޗު ކާމިޔާބުކުރީ ޓެޕްކޮން އެވެ.

މި މުބާރާތުގައި އާދީއްތަ ދުވަހުވެސް މެޗެއް ކުޅޭނެއެވެ. އާދީއްތަ ދުވަހު ކުޅޭ މެޗުގައި ބައްދަލުކުރާނީ ސޮނީ ހާޑްވެއާ އަދި ޓެޕްކޯން އެވެ. މި މެޗު ފަށާނީ އާދީއްތަ ދުވަހު ހަވީރު ހަތަރެއް ޖަހާއިރެވެ.