ފްރާންސްގައި ލޮކްޑައުންގައި އަޅާފައިވާ ފިޔަވަޅުތަކަށް ލުއި ދިނުމުގެ ޕްލޭން އެގައުމުގެ ބޮޑުވަޒީރު ޤާނޫނު ހަދާ މަޖިލީހަށް ހުށަހަޅުއްވަނީ
26 އެޕްރީލު 2020 | އާދީއްތަ 05:34ފްރާންސް ލޮކްޑައުން ކޮށްފައިވަނީ އަންނަ މެއި މަހުގެ 11 ވަނަ ދުވަހާ ހަމައަށް
ފްރާންސްގެ ބޮޑު ވަޒީރު އެޑުއާޑް ފިލިޕޭ ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ފްރާންސްގައި ލޮކްޑައުންގައި އަޅާފައިވާ ފިޔަވަޅުތަކަށް ލުއިދިނުމާ ގުޅޭ ޕްލޭން އެގައުމުގެ ބޮޑު ވަޒީރު އެޑުއާޑް ފިލިޕޭ އަންގާރަ ދުވަހު ޤާނޫނު ހަދާ މަޖިލީހަށް ހުށަހަޅުއްވާނެ ކަމަށް ބޮޑު ވަޒީރުގެ އޮފީހުން ބުނެފި އެވެ.
އެކަމާ ގުޅޭގޮތުން ފްރާންސްގެ ޤާނޫނޫ ހަދާ މަޖިލީހުގައި ބަހުސްތަކެއް ކޮށްފައިވާއިރު ފްރާންސްގެ ރައީސް އެމަނުއަލް މެކްރޮން ފްރާންސް ލޮކްޑައުން ކުރަށްވާފައި ވަނީ އަންނަ މެއި މަހުގެ 11 ވަނަ ދުވަހާ ހަމައަށެވެ. ކޮވިޑް-19 ހަލުވިކަމާއެކު ފްރާންސްގައި ފެތުރެމުން ދާއިރު ފްރާންސަކީ ހަތަރު ވަނައަށް އެންމެ ގިނަ މީހުންނަށް މިވައިރަސް ޖެހެމުންދާ އަދި މަރުވަމުންދާ ގައުމެވެ. ފްރާންސްގައި ވައިރަސް ފެތުރުން ކޮންޓްރޯލް ކުރުމަށް އެގައުމު ލޮކްޑައުން ކޮށްފައިވަނީ މަރޗް މަހުގެ 11 ވަނަ ދުވަހު އެވެ.
ރިޕޯޓްތައް ބުނާގޮތުގައި މެކްރޮންގެ ވިސްނެވުމަކީ ލޮކްޑައުންގައި އަޅާފައިވާ ބައެއް ފިޔަވަޅުތަކަށް ލުއިދިނުމެވެ. އެގޮތުން ފުރަތަމަ ކަމެއްގެ ގޮތުގައި ކުރައްވާ ކަމަކީ ސްކޫލްތައް ހުޅުވުމެވެ. ސްކޫލްތައް ހުޅުވިނަމަވެސް ކުދިން ސްކޫލްތަކަށް ފޮނުވަން މަޖުބޫރު ނޫންކަމަށާއި ޚާޒިރީ ބަލަމުން ނުދާނެ ކަމަށް މެކްރޮން ވަނީ ވިދާޅުވެފަ އެވެ. އެހެންނަމަވެސް މިނިންމެވުން ސަރުކާރުން ތަންފީޒުކުރާނެ ގޮތެއް އަދި މިހާތަނަށް ކަނޑައަޅާފައެއް ނުވެއެވެ.
މީގެއިތުރުން ފްރާންސުން ވަނީ ރީޓެއިލް ވިޔަފާރި ކުރާ ފަރާތްތަކަށް ލުޔެއް ދިނުމަށް ނިންމާފަ އެވެ. އެގޮތުން މެއި މަހުގެ 11 ވަނަ ދުވަހު އެފަދަ ވިޔަފާރިތައް ހުޅުވާލާނެކަމަށް އެގައުމުން ބުނެއެވެ. ވިޔަފާރިތައް ހުޅުވާލިނަމަވެސް ބައެއް ހިސާބުތަކުގައި ވައިރަސްގެ ދެވަނަ ވޭވް އައުމުގައި ލަސްތަކެއް ގެނެވިދާނެކަމަށް އެގައުމުން ގަބޫލުކުރެ އެވެ.
ހޮނިހިރު ދުވަހާ ހަމައަށް އައިއިރު ފްރާންސުން 22،614 މީހުން ވަނީ ކޮވިޑް-19 ޖެހިގެން މަރުވެފަ އެވެ. އަދި އެގައުމުގެ 161,488 މީހުންނަށް ވަނީ ވައިރަސް ޖެހިފަ އެވެ.
