ލޮކްޑައުންކުރި ނަމަވެސް މިނިސްޓްރީގެ ހޮޓްލައިން ނަމްބަރުތަކަށް ގުޅައިގެން މައްސަލަތައް ހުށަހެޅޭނެ ކަމަށް ޖެންޑަރ މިނިސްޓްރީގެ ޑިރެކްޓަރ ނިޝާ އަލީ ވިދާޅުވެއްޖެ އެވެ.
އާދީއްތަ ދުވަހު ރާއްޖެޓިވީގެ ކޮވިޑް-19 ކަވަރޭޖްއަށް ދެއްވި އިންޓަރވިއުއެއްގައި ނިޝާ ވިދާޅުވީ ލޮކްޑައުންއަށްފަހު މިނިސްޓްރީ އަށް ހުށަހެޅޭ މައްސަލަތަކުގެ އަދަދު ވަރަށް ބޮޑަށް މަދުވެފައިވާކަމަށެވެ. ހުށަހެޅޭ މައްސަލަތަކުގެ އަދަދުނަމަވެސް މަދު ނަމަވެސް ގެވެށި އަނިޔާ އަދި އެފަދަ އެހެން ކަންތައްތައް ނުހިނގާ ކަމަކަށް ނުބެލެވޭނެ ކަމަށެވެ.
ނިޝާ ވަނީ ކުޑަކުދިންނާއި ގުޅޭ މައްސަލައެއް ނަމަ ހޮޓްލައިން ނަމްބަރު '1412' އަށް ގުޅުމަށް އިލްތިމާސްކުރައްވާފަ އެވެ. އަދި މިނިސްޓްރީގެ އީމެއިލް އަށް އީމެއިލް ކުރެވޭނެ ކަމަށް ވެސް ވިދާޅުވި އެވެ.
ނިޝާ ވިދާޅުވީ ހުށަހެޅިފައި ހުރި މައްސަލަތައް ވަކި ވަކިން ބަލާ، އެފަރާތްތަކުގެ ހާލު ބަލަމުން އަންނަ ކަމަށެވެ. އަދި ޒިޔާރަތްކުރަންޖެހޭ ހާލަތްތަކުގައި އެ އިންތިޒާމް ހަމަޖައްސެމުގެ ގޮތުން ޓީމެއް އެކުލަވާލާފައިވާކަމަށެވެ.
