701 ބިދޭސީއަކު ފުރުމުގެ ހުއްދަ ދީފި
25 އެޕްރީލު 2020 | ހޮނިހިރު 23:01އަނބުރާ ގޮސްފައިވަނީ އިންޑޮނޭޝިޔާ، އިޓަލީ އަދި ފިލިޕީންސްގެ މީހުން
ފުރަން ހުއްދަ ދިން ބިދޭސީން އެއާޕޯޓުގައި
ގައުމަށް ނުދެވި ރާއްޖޭގައި ތާށިވެފައި ތިބި ބިދޭސީ މުވައްޒަފުންނާއި ފަތުރުވެރިން ތެރެއިން 701 މީހަކަށް ފުރުމުގެ ހުއްދަ ދިފައިވާ ކަމަށް ދިވެހިރާއްޖޭގެ އިމިގްރޭޝަނުން ބުނެފިއެވެ.
ހޮނިހިރު ދުވަހު އިމިގްރޭޝަނުން ކޮށްފައިވާ ޓްވީޓެއްގައި ބުނީ، މި މަހުގެ 24 އިން 25 އަށް 701 ބިދޭސީއަކަށް ރާއްޖެއިން ފުރުމުގެ ހުއްދަ ދީފައިވާ ކަމަށެވެ. އޭގެ ތެރެއިން ގިނަ މީހުންނަކީ ރާއްޖޭގައި މަސައްކަތް ކުރާ ބިދޭސީން ކަމަށް އިމިގްރޭޝަންގެ ޓްވީޓްގައި ބުންޏެވެ. އޭގެ ތެރޭގައި ހިމެނެނީ އިޓަލީ، ފިލީޕީންސް އަދި އިންޑޮނޭޝިއާގެ މީހުންނެވެ. އެ މީހުން ބަލާ އައިސްފައިވަނީ އެ ގައުމުތަކުގެ ފްލައިޓްތަކެވެ.
އެ މީހުން ފުރުމުގެ އިންތިޒާމްތައް ހަމަޖައްސައި ދީފައިވަނީ ޓޫރިޒަމް މިނިސްޓްރީ އާއި މިނިސްޓްރީ އޮފް ފޮރިން އެފެއަރޒް އަދި ޓޫރިސްޓް ޕޮލިސް ގުޅިގެންނެވެ.
ކޮވިޑް-19 އާ ގުޅިގެން ވައިގެ ދަތުރުފަތުރުތައް ހުއްޓުމަކަށް އައިސްފައިވާއިރު، އަނބުރާ ގައުމަށް ނުދެވި ގިނަ އަދަދެއްގެ ފަތުރުވެރިންނާއި ބިދޭސީ މުވައްޒަފުން އެބަތިބި ކަމަށް ޓޫރިޒަމް މިނިސްޓްރީން ވަނީ މައުލޫމާތު ދީފަ އެވެ. އަދި މި ފަރާތްތަކުގެ އަނބުރާ ގައުމަށް ފޮނުވާލުމުގެ އިންތިޒާމުތައް ހަމަޖެއްސުމަށް މަޝްވަރާކުރާ ކަމަށް ވަނީ ބުނެފަ އެވެ.
