ކޮވިޑް-19 ބަލި ޖެހޭ މީހުންނަށް ފޯރުކޮށްދޭ ވަރަށް އޮކްސިޖަންގެ ކެޕޭސިޓީ ރާއްޖޭގައި އެބަހުރި ކަމަށާއި ކެޕޭސިޓީ އިތުރުކުރުމަށްޓަކައި 5035 ޖަމްބޯ ސިލިންޑަރ ސިންގަޕޫރުން ގެނައުމަށް ނިންމާފައިވާކަމަށް ސަރުކާރުން ހާމަކޮށްފިއެވެ.

ހޮނިހިރު ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާނު މަބްރޫކް އަޒީޒް ވިދާޅުވީ، ބަލިމަޑުކަން އިތުރަށް ފެތުރިއްޖެ ހާލަތެއްގައި އޮކްސިޖަން ކެޕޭސިޓީ އިތުރުކުރުމަށްޓަކައި 5035 ޖަމްބޯ ސިލިންޑަރ ގެނައުމުގެ މަސައްކަތް ކުރަމުންދާކަމަށާއި އެގޮތުން 10 މެއި ގައި އެތަކެތި ލިބޭނެކަމަށް އަންދާޒާކުރެވޭކަމަށެވެ.

މަބްރޫކް ވިދާޅުވީ، މި ދަނޑިވަޅުގައި ބޭނުންވަނީ ސިލިންޑަރ އެކަނި ކަމަށާއި ރާއްޖޭގައި މިހާރުވެސް ގެންނަ ސިލިންޑަރ ތަކަށް އޮކްސިޖަން ރީފިލް ކެޕޭސިޓީ އެބަހުރިކަމަށެވެ. މަބްރޫކް ވިދާޅުވީ، ގިނައިން ސިލިންޑަރ ހުރުމުން ދުރާލާ ތައްޔާރު ވެވޭނެކަމަށް މަބްރޫކް ވިދާޅުވިއެވެ. އޮކްސިޖަންގެ ކެޕޭސިޓީ އިތުރު ކުުރުމުގެ ގޮތުން ރާއްޖެއަށް ބޭނުންވާ އިތުރު އޮކްސިޖަން ގެނެސްފައިވާ ކަމަށް މަބްރޫކް ވަނީ މީގެކުރިންވެސް ވިދާޅުވެފައެވެ.

ދުނިޔޭގެ ގައުމުތަކުގައި ކޮވިޑް-19 ފެތުރެމުންދާއިރު، އެކަށީގެންވާ ވަރަށް އޮކްސިޖަން ސަޕްލައި ހުރިތޯ ނުބެލި ދޫކޮށްލެވިފައި ބައެއް ހޮސްޕިޓަލްތަކަސް އެބަހުއްޓެވެ.

ކޮވިޑް-19 އަކީ ނޭވާލާ ނިޒާމުގެ ބައްޔަކަށްވާއިރު، އެހެން ބަލިތައް ޖެހޭ މީހުންނަށް ވުރެ މި ބަލިޖެހޭ މީހުންނަށް އޮކްސިޖަން ފޯރުކޮށްދޭން ޖެހޭ މިންވަރު އިތުރެވެ. އެގޮތުން ކޮވިޑް-19 ގެ ބަލި މީހުންގެ ތެރެެއިން ގިނަ މީހުންނަށް މިނިޓެއްގެ ތެރޭގައި 15 ލީޓަރާއި 30 ލީޓަރުގެ އޮކްސިޖަން ފޯރުކޮށްދޭން ޖެހެއެވެ. ރާއްޖޭގެ ސިއްހީ މަރުކަޒުތަކާއި ހޮސްޕިޓަލުގައި ބޭނުންކުރަނީ އޮކްސިޖަން ސިލިންޑަރެެވެ.

ކޮވިޑް-19 އަށް ފަރުވާދޭ ހަތަރު ހޮސްޕިޓަލް ކަމަށްވާ، އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)، ދަރުމަވަންތަ، އޭޑީކޭގެ އިތުރުން ޓްރީޓޮޕް ހޮސްޕިޓަލުގައި ދެމުންދާ އޮކްސިޖަން އަކީ، އޮކްސްިޖަން އުފައްދާ މެޝިން ބޭނުންކޮށްގެން އުފައްދާ އޮކްސިޖަންއެވެ.