ކޮވިޑް-19 އާއި ގުޅިގެން ހެލްތް ޕްރޮޓެންޝަން އެޖެންސީ (އެޗްޕީއޭ) އިން ށ. އަތޮޅުގެ 5 ރަށެއް މޮނީޓަރިންގެ ހާލަތަށް ގެނެސްފި އެވެ.

ނޭޝަނަލް އިމަޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ ކޮވިޑް-19 ޕޮޒިޓިވް މީހެއްގެ ކޮންޓެކްޓް ޓްރޭސިންގގެ ތެރެއިން ށ. ނަރުދޫ އާއި ށ. ފުނަދޫ އާއި ށ. މިލަންދޫ އާއި ށ. ފީވަށް އަދި ށ.މާއުނގޫދޫ މޮނީޓަރިންގގެ ހާލަތަށް ގެނެސްފައި ކަމަށެވެ.

މި ރަށްތައް މޮނީޓަރިންގެ ހާލަތަށް ގެނެސްފައިމިވަނީ ނަރުދޫ މީހަކު ކޮވިޑް-19 އަށް ޕޮޒިޓިވްވުމާ ގުޅިގެންނެވެ.

ކޮވިޑް-19 އަށް ޕޮޒިޓިވް ވެފައިވަނީ މާލެ ދަތުރު ކުރާ ނަރުދޫ "އަމާޒު" ބޯޓެއްގެ މީހެކެވެ. އެބޯޓުން 90 އަށް ވުރެ ގިނަ މީހުން ދަތުރުކުރި ކަމަށްވެއެވެ. އަދި އެ ބޯޓު ށ. އަތޮޅުގެ އެހެން ރަށްތަކަށް ވެސް ގޮސްފައިވާ ކަމަށް މައުލޫމާތު ލިބެއެވެ.

މިއީ މާލެ ފިޔަވައި ރާއްޖޭގެ ރަށަކުން މި ބައްޔަށް ޕޮޒިޓިވްވި ދެވަނަ މީހާއެވެ. މީގެކުރިން މި ބައްޔަށް ޕޮޒިޓިވް ވެފައިވަނީ ހއ. އުލިގަމަށް ނިސްބަތްވާ މީހެކެވެ. އެމީހާ އަކީ ވެސް މާލެ ދަތުރުކޮށްފައި ދިޔަފަހުން ބައްޔަށް ޕޮޒިޓިވްވި މީހެކެވެ. އެމީހާ ދިޔައީ ވެސް ކަނޑު ބޯޓެއްގައި ކަމަށްވާތީ އެބޯޓު ދިޔަ ރަށްތަކެއް މީގެކުރިން މޮނީޓަރިން ހާލަތަށް ގެނެސްފައި ވެއެވެ.

ރާއްޖެއިން މިހާތަނަށް މި ބައްޔަށް 141 މީހަކު ޕޮޒިޓިވް ވެފައިވާއިރު، މިއަދު އެކަނި ވެސް ވަނީ 13 މީހަކު މި ބައްޔަށް ޕޮޒިޓިވްވެފައެވެ.