އަނުޝްކާ ޝަރުމާގެ ފުރަތަމަ ވެބް ސީރީޒް ޕާޓަލް ލޮކް މެއި 15 ގައި ރިލީޒް ކުރަނީ!
25 އެޕްރީލު 2020 | ހޮނިހިރު 17:12އަނުޝްކާ ޝަރުމާގެ ފުރަތަމަ ވެބް ސީރީޒް ރިލީޒް ކުރަން ނިންމާފައިވަނީ މެއި މަހުގައި
އަނުޝްކާ ޝަރުމާ - އޭނާގެ ފުރަތަމަ ވެބް ސީރީޒް ޕާޓަލް ލޮކް ރިލީޒް ކުރަނީ
ބޮލީވުޑްގެ މަޝްހޫރު ޕްރޮޑިއުސަރ އަދި އެކްޓަރ އަނުޝްކާ ޝަރުމާގެ ފުރަތަމަ ވެބް ޕްރޮޑަކްޝަން، އެމޭޒޯންގެ އޮރޮޖިނަލް ސީރީޒް ޕާޓަލް ލޮކް މެއި މަހުގެ 15 ގައި ރިލީޒް ކުރަން ހަމަޖެހިއްޖެއެވެ.
އެމޭޒޯން ޕްރައިމް އިން މިކަން އިއުލާން ކޮށްފައިވަނީ ހުކުރު ދުވަހު އެވެ.
އަނުޝްކާގެ އަމިއްލަ ޕްރޮޑަކްޝަން ހައުސްއެއްކަމަށްވާ ކްލީން ސްލޭޓް ފިލްމްސްއިން ޕްރޮޑިއުސްކުރި މި ސީރީޒްގެ ލޯގޯ ވެސް ވަނީ ދައްކާލާފައެވެ. މި ސީރީޒްގައި ފެނިގެންދާނެ ތަރިންގެ ތެރޭގައި ނީރަޖް ކަބީ، ޖައިދީޕް އަހްލަވަތް، ގުލް ޕަނަގް، ސްވަސްތިކާ މުކަރްޖީ އަދި އަބީޝޭކް ބަންނެރްޖީ ހިމެނެއެވެ.
ޕާޓަލް ލޮކްގެ ޓީޒާ ޓްވިޓަރގައި ޕޯސްޓު ކުރުމަށްފަހު އަނުޝްކާ ބުނީ ޕާޓަލް ލޮކްގެ ގަވާއިދު ތަފާތު ކަމަށެވެ. ޕާޓަލް ލޮކްގެ އިތުރުން އަނުޝްކާވަނީ އެން އެޗް 10، "ޕިލައުރީ" އަދި "ޕަރީ" ގައި ވެސް މަސައްކަތްކޮށްފައެވެ.
ނެޓްފްލިކްސްގެ އޮރޮޖިނަލްއެއް ކަމަށްވާ "ބުލްބުލް" އަދި "މައި" އަކީވެސް އަނުޝްކާގެ ޕްރޮޑަކްޝަންގެ ދަށުން އޭނާގެ ޕްރޮޑަކްޝަން ހައުސް ކްލީން ސްލޭޓް ފިލްމްސް އިން ހަދާފައިވާ 2 ފިލްމެވެ.
އަނުޝްކާ އެންމެ ފަހުން ފެނިގެން ގޮސްފައި ވަނީ އާނަންދް އެލް ރާއީގެ "ޒީރޯ" އިން ޝާހުރުކް ހާން އަދި ކެޓްރީނާ ކެއިފް އާއި އެކުއެވެ.
