އެމްއެމްއޭއިން 4.4 ބިލިއަން ރުފިޔާގެ ދަރަނި ނެގުމުގެ މައްސަލަ މާދަމާ ކޮމެޓީއަށް ފޮނުވައި މާދަމާ ނިންމަނީ

ކޮވިޑް-19 އާއި ގުޅިގެން އަންނަ އިގްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝް ފްލޯ ހޯދުމާ ގުޅޭ މައްސަލަ އާދިއްތަ ދުވަހު ބާއްވާ ރައްޔިތުންގެ މަޖިލީހުގެ ޖަލްސާއަށް ތާވަލްކޮށްފި އެވެ.

ހޮނިހިރު ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަފުޅުދައްކަވަމުން، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު، އާދިއްތަ ދުވަހުގެ ޖަލްސާގައި މިމައްސަލައަށް ވޯޓަށް އަހައި ކޮމެޓީއަށް ފޮނުއްވޭނެ ކަމަށެވެ. އަދި ކޮމެޓީން މިމައްސަލަ އާދިއްތަ ދުވަހު ދިރާސާ ކުރެއްވުމަށްފަހު، މަޖިލީހުގެ ތަޅުމަށް ކޮމެޓީގެ ރިޕޯޓް ހުށަހަޅައި، އާދިއްތަ ދުވަހުގެ ޖަލްސާގައި ކޭޝްފްލޯ އިތުރުކުރުމާ ގުޅޭ މިމައްސަލައަށް ވަކި ގޮތެއް ނިންމޭނެ ކަމަށް ގަބޫލުފުޅު ކުރައްވާ ކަމަށެވެ.

ރައީސް ނަޝީދު ވިދާޅުވެފައިވަނީ، މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން 4.4 ބިލިއަން ރުފިޔާގެ ދަރަނި ނެގުމާގުޅޭ މިމައްސަލަ ދިރާސާ ކުރުމަށް ފޮނުއްވާނީ މުޅި މަޖިލީހުގެ ކޮމެޓީއަށް ކަމަށެވެ.

މިމައްސަލަ މަޖިލީހަށް ހުށަހަޅާފައިވަނީ މިދިޔަ ބުރާސްފަތި ދުވަހުގެ ޖަލްސާގަ އެވެ.

ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާޢްދާގައި ބުނަނީ، ސަރުކާރުގެ އޯވަރޑްރާފްޓް ލިމިޓްގެ ގޮތުގައި ކަނޑައަޅާފައިވާ މިންވަރަކީ ވޭތުވެދިޔަ 3 އަހަރު ސަރުކާރަށް ލިބުނު ޖުމްލަ އާމްދަނީގެ މައްޗަށް ބިނާކޮށް، އަހަރަކަށްޖެހޭ އެވްރެޖް އާމްދަނީން 1 ޕަސެންޓަށްވުރެ އިތުރު ނުވާނޭގޮތުގެ މަތިން ސަރުކާރަށް އޯވަރޑްރާފްޓް (މަރުކަޒީ ބޭންކުން ދަރަންޏަށް ފައިސާ ނެގުން) ދެވިދާނެ ކަމަށެވެ. އެގޮތުން ބަލާއިރު، ސަރުކާރަށް މަރުކަޒީ ބޭންކުން ލިބެން އޮތް އޯވަރޑްރާފްޓްގެ އަދަދަކީ 219 މިލިއަން ރުފިޔާ އެވެ. އެއީ ވޭތުވެދިޔަ 3 އަހަރުގެ ޖުމްލަ އާމްދަނީގެ އަހަރަކަށްޖެހޭ އެވްރެޖް އާމްދަނީ 1 ޕަސެންޓް މިންވަރަކީ 219 މިލިއަން ރުފިޔާ ކަމަށްވާތީ އެވެ.

ރައްޔިތުންގެ މަޖިލީހަށް ފިނޭންސް މިނިސްޓަރު އިބްރާހިމް އަމުރު ފޮނުއްވާފައިވާ ލިޔުންތަކުން ސަރުކާރަށް 4.4 ބިލިއަން ރުފިޔާ ބޭނުން ވެއެވެ. އެހެންކަމުން ފިނޭންސް މިނިސްޓަރު އެދިވަޑައިގެންފައި ވަނީ 219 މިލިއަން ރުފިޔާގައި ހުރި އޯވަރޑްރާފްޓް 4.4 ބިލިއަން ރުފިޔާއަށް ބަދަލުކޮށްދިނުމުގެ ހުއްދަ ރައްޔިތުންގެ މަޖިލީހުން ދެއްވުމަށެވެ.

ދައުލަތުގެ ޚަރަދަށް ޒިންމާވުމުގެ ގާނޫނުގެ 36 ވަނަ މާއްދާގެ ދަށުން ރައްޔިތުންގެ މަޖިލީހަށް އެހުއްދަ ދިނުމުގެ ބާރު ލިބިގެން ވެއެވެ.

މިފަދަ ހާއްސަ ހާލަތުގައި ދުނިޔޭގެ ގިނަ ގައުމުތަކުން ދަނީ ހާއްސަ އިގްތިޞާދީ އަދި މާލީ ޕެކޭޖްތަކެއް ތައާރަފްކޮށް ފާސްކުރަމުންނެވެ.