ދިވެހިރާއްޖޭގެ އިގްތިޞާދު ވެންޓިލޭޓަރުގައި އޮތްއިރު، އެކަން ސަރުކާރުގެ ފަރާތުން ރައްޔިތުންގެ މަޖިލީހަށް އަންގާލައްވާފައިނުވާތީ ހިތާމަ ކުރައްވާކަމަށް ހެންވޭރު ހުޅަނގު ދާއިރާގެ މެންބަރު، އަދި އެމްޑީޕީގެ ޗެއާރޕާސަން ހަސަން ލަތީފް ވިދާޅުވެއްޖެ އެވެ.
ހަސަން ލަތީފް މިހެން ވިދާޅުވީ، ހުކުރު ދުވަހު، ނޭޝަނަލް އިމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރ އިބްރާހީމް އަމީރު ވިދާޅުވި ވާހަކަފުޅަކާ ގުޅިގެންނެވެ. އަމީރު ވިދާޅުވެފައިވަނީ ރާއްޖޭގެ އިގްތިޞާދު އޮތީ ވެންޓިލޭޓަރުގައި ކަމަށެވެ.
ކޮވިޑް-19 އާ ގުޅިގެން އަންނަ އިޤްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ ހޯދުމަށް ފިނޭންސް މިނިސްޓަރ އަމީރު ހުށަހަޅުއްވާފައިވާ މައްސަލާގައި ވާހަކަ ދައްކަވަމުން ހަސަން ލަތީފް ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކެބިނެޓްގެ ފިނޭންސް މިނިސްޓަރ އިބްރާހީމް އަމީރު އެދިވަޑައިގެންނެވިގޮތަށް، ދައުލަތުގެ ކޭޝްފްލޯއަށް 4.2 ބިލިއަން ރުފިޔާ އިތުރުކުރުމަށް ހުށަހެޅި އެހުށަހެޅުމަށް ރައްޔިތުންގެ މަޖިލީހުން ކުރަންޖެހުނު ކޮންމެކަމެއް ކުރައްވަން ތައްޔާރަށް ހުންނެވި ކަމަށް ހަސަން ލަތީފް ވިދާޅުވި އެވެ.
އިއްޔެ އަޅުގަނޑު ހަމަހަގީގަތުގައި ވަރަށް ހިތާމަކުރިން. ފިނޭންސް މިނިސްޓަރުގެ ޕްރެސް ކޮންފަރެންސް ބަލަން އިންއިރު އަޅުގަނޑަށް އިހުސާސްވީ، ގާތް ރައްޓެއްސެއްގެ ބައްޕަ ނުވަތަ މަންމަ ނިޔާވި ވާހަކަ އޭނާ ގުޅާފަ ބުނުމުން، ޖަނާޒާއަށްގޮސް މަރުގެ މައުލޫމާތު އޭނާގެގާތު އޮޅުންފިލުވާލުމުގެ ތެރޭގައި އޭނާގެ މަންމަ ވެންޓިލޭޓަރުގައި އޮންނަތާ އޭރު ހަފްތާއެއް ވެއްޖެކަމަށް އޭނަ އަޅުގަނޑު ގާތު ސަހަރާގައިހުރެ ބުނީމާ އެވަގުތު އަޅުގަނޑަށް ކުރެވޭ އިހުސާސް. އެވަރުގެ ކަމެއް ވީއިރު، އެހާގާތް ރަހުމަތްތެރިއަކަށް އަޅުގަނޑުވެހުރެ، އެކަން އަޅުގަނޑުގާތު ނުބުނެއޮތީމާ ދެން ކުރެވޭނީ އެއިހުސާސް، އެކަމަކު ރާއްޖޭގެ އިގްތިޞާދު ވެންޓިލޭޓަރުގައި އޮތްއިރު އަޅުގަނޑުމެންގެ އެއްވެސް މީހަކަށް އެކަން ސަރުކާރުން އަންގާލައްވާފައިނެތުނީމާ ދެން އެކުރެވޭ އިހުސާސް.ހެންވޭރު ހުޅަނގު ދާއިރާގެ މެމްބަރު ހަސަން ލަތީފް
ހަސަން ލަތީފް ވިދާޅުވީ، ސަރުކާރުން ދަރަންޏަށް ނަގާ ފައިސާ، ޚަރަދު ކުރާނެ ގޮތުގެ ފުރިހަމަ މައުލޫމާތު މިމަޖިލީހަށް އިނގެންޖެހޭނެ ކަމަށެވެ. އެގޮތުން ދެ ކަމެއް ހަސަން ލަތީފް ވަނީ ފާހަގަކުރައްވާފަ އެވެ. ފުރަތަމަ ކަމަކީ އެފައިސާ ޚަރަދު ކުރާނެގޮތުގެ މައުލޫމާތު މި މަޖިލީހަށް މިވަގުތު ލިބެންވާނެ ކަމަށެވެ. ދެ ވަނަކަމަކީ އެފައިސާ ލިބި ޚަރަދު ކުރަމުންދާއިރު، އެފައިސާ ޚަރަދު ކުރަމުންދާ ގޮތުގެ މައުލޫމާތު މި މަޖިލީހުން ކަނޑައަޅާގޮތެއްގެ މަތިން މިމަޖިލީހަށް ލިބެންވާނެ ކަމަށެވެ. އެހެންގޮތަކަށް ދަންނަވަންޏާ ރަނގަޅު މޮނީޓަރިންގ މެކޭނިޒަމެއް މަޖިލީހުން ގާއިމު ވެފައި އޮންނަންވާނެ ކަމަށް ހަސަން ލަތީފް ވިދާޅުވިއެވެ.
ފިނޭންސް މިނިސްޓަރ އިއްޔެ ދެއްވި ޕްރެސް ކޮންފަރެންސެއް އަޅުގަނޑުބެލިން. ބައެއް ޚަރަދުތައް ތަފްސީލްކޮށްދެއްވި. އެހެންނަމަވެސް މިމަޖިލީހަށް އެމައުލޫމާތު ހިއްސާ ކޮއްދެއްވިކަމެއް އަދި އަޅުގަނޑަކަށް އެނގިފައެެއްނެތް. މިނިސްޓަރުގެ ޕްރެސެންޓޭޝަނުގައި ތަފްސީލް ދެއްވި ޙަރަދުތަކުގެ ޖުމްލަ އަދަދަކީ 1.49 ބިލިއަން ރުފިޔާ. ފިނޭންސް މިނިސްޓަރ މިމަޖިލީހުގައި އެދިވަޑައިގެންފައިވާ 4.2 ބިލިއަން އިން މިދެންނެވި 1.49 ބިލިއަން ރުފިޔާ އުނިކުރީމައި ބާކީއޮތް 2.71 ބިލިއަން ރުފިޔާ ޚަރަދުކުރާނެ ގޮތުގެ ތަފްސީލް އެނގެން ބޭނުންކަުގެ ވާހަކަ އަޅުގަނޑު މިދަންނަވަނީ،ހެންވޭރު ހުޅަނގު ދާއިރާގެ މެމްބަރު ހަސަން ލަތީފް
ހަސަން ލަތީފް ވިދާޅުވީ، ރާއްޖޭގެ އިގްތިޞާދު ވެންޓިލޭޓަރުން ނެގުމަށް ރައްޔިތުންގެ މަޖިލީހުން ކުރަންހުރި ކަންކަން ކުރުމުގައި އަވަސްވެގަންނަންޖެހޭ ކަމަށާއި ވީހާވެސް އަވަހަކަށް އެމަގަށް ކަންކަން ބައްޓަން ކުރުމަށް މިހާރުންމިހާރަށް އަޅަންޖެހޭ ފިޔަވަޅުތައް އެޅުމުގައި ދެއްވަންޖެހޭ ކޮންމެ އެއްބާރުލެއްވުމަށް ދެއްވުމަށް ތައްޔާރަށް ހުންނެވި ކަމަށްވެސް ހަސަން ލަތީފް ވިދާޅުވި އެވެ.
