ލީގުތައް ކެންސަލް ކުރަން ޔުއެފާގެ ވަކި ޝަރުތުތަކެއް

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން މެދުކަނދާލާފައިވާ ޔޫރަޕްގެ ބައެއް ލީގުތައް ކެންސަލް ކުރެވޭނީ ވަކި ޝަރުތުތަކެއް ފުރިހަމަ ކޮށްގެން ކަމަށް ޔުއެފާ އިން ބުނެފި އެވެ.

ޔުއެފާ އިން މި ގޮތަށް ނިންމީ ގިނަ ގައުމުތަކުން ލީގުތައް މިހާރު އޮތް ހިސާބުން ނިންމާލަން އެ އިދާރާގެ ލަފަޔަކަށް އެދެމުން އަންނާތީ އެވެ.

ވީޑިއޯކޮންފަރެންސް މެދުވެރިކޮށް ބުރާސްފަތި ދުވަހު ޔުއެފާގެ 55 މެމްބަރު ގައުމާއެކު ބޭއްވި ބައްދަލުވުމުގައި ޔުއެފާއިން ވަނީ އަލުން ފަށާނެ އެއްވެސް ގޮތެއް ފެންނަން ނެތް ގައުމުތަކަށް ލީގުތައް މިހާރު އޮތް ހިސާބުން ނިންމާލުމުގެ ފުރުސަތު ދީފައެވެ. އެކަމަކު ލީގުތައް ނިންމާލި ނަމަވެސް، އަންނަ ސީޒަނުގެ ޗެމްޕިއަންސް ލީގާއި ޔޫރޮޕާ ލީގަށް ކޮލިފައިވާ ޓީމުތައް ކަނޑައެޅަން ޖެހެއެވެ. އެގޮތުން ޕްލޭއޮފް މެޗުތަކެއް ރާވައިގެން ނަމަވެސް، ލީގުގެ މަގާމުތައް ކަނޑައަޅަން ޖެހޭނެ ކަމަށް ޔުއެފާ އިން ވަނީ އަންގާފައެވެ.

މިހާތަނަށް ލީގުތައް ނިންމާލަން އަމާޒުހިފާފައިވަނީ ނެދަލެންޑްސް، ބެލްޖިއަމް އަދި ސްކޮޓްލެންޑުންނެވެ. އެގޮތުން ނެދަލެންޑްސްގެ ފުޓްބޯޅަ ލީގު ކެންސަލްކުރުމުގެ ފުރުސަތު ބޮޑު ކަމަށް އެ ގައުމުގެ ފުޓްބޯޅަ ފެޑެރޭޝަނުން ބުނެފައިވާއިރު، ބެލްޖިއަމުން ވަނީ ބެލްޖިއަމް ޕްރޯ ލީގު ކެންސަލްކޮށް އެއްވަނައިގައި އޮތް ކްލަބު ބްރޫޖަށް ތަށި ދޭން ނިންމާފައެވެ. އަދި ސްކޮޓްލެންޑުން ވަނީ ފުރަތަމަ ޑިވިޝަން ފިޔަވައި ދަށް ލީގުތަށް ނިންމާލަން ކްލަބުތަކުގެ މެދުގައި ނެގި ވޯޓަކުން ފާސްކޮށްފަ އެވެ. އަދި އެ ގޮތަށް ސްކޮޓްލެންޑްގެ ފުރަތަމަ ޑިވިޝަން ކަމަށްވާ ސްކޮޓިޝް ޕްރިމިއާޝިޕްވެސް ނިންމާލަން އެ ގައުމުގެ ޕްރޮފެޝަނަލް ލީގުގެ ބޯޑުން އަންނަނީ މަސައްކަތްކުރަމުންނެވެ.

ޔުއެފާއިން ބައެއް ލީގުތައް ކެންސަލް ކުރުމުގެ ހުއްދަ ދޭން ނިންމިއިރު، މެދުކަނޑާލާފައިވާ ޔޫރަޕްގެ ފުޓްބޯޅަ ލީގުތައް އަލުން ފަށަން ކަނޑައަޅާފައިވާ ޕްލޭނާ އެއްގޮތަށް ނުގޮސްފިނަމަ، ފުޓްބޯޅަ ސީޒަން ގެއްލުމުގެ ބިރު އެބައޮތް ކަމަށް ޔުއެފާ ރައީސް ސްލޮވީނިއާގެ އަލެކްސަންޑަ ސެފެރިން މީގެ ކުރިން ވަނީ ވިދާޅުވެފައެވެ.

ކޮވިޑް-19 އާ ގުޅިގެން މެދުކަނދާލާފައިވާ ލީގުތައް ފުރިހަމަ ކުރުމަށް ވަގުތު ދިނުމުގެ ގޮތުން ޔޫރޯ ފުޓްބޯޅަ އާއި ކޮޕާ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ. އަދި ފީފާއިން އަންނަނީ ބައިނަލްއަގުވާމީ މެޗުތައް މިއަހަރު ކުރިއަށް ނުގެންދިޔުމަށް މަޝްވަރާ ކުރަމުންނެވެ. އެހެންކަމުން ހޫނު މޫސުގައި ލީގުތައް ކުރިއަށް ގެންދިޔުމުގެ ފުރުސަތު ލިބިގެންދާނެ އެވެ.