އެމެރިކާގައި މަރުވި މީހުންގެ އަދަދު 50،000 ށް، ދުވާލަކު 2000 މަރު
އޭޕްރީލް މަހު އެވްރެޖްކޮށް ދުވާލަކު 30،000 މީހުންނަށް އެމެރިކާގައި ވަނީ ވައިރަސް ޖެހިފައި
ޓެސްޓް ކުރަމުންދަނީ
ކޮވިޑް-19 އެންމެ ހަލުވި މިނުގައި ފެތުރެމުންދާ އެމެރިކާގައި ވައިރަސް ޖެހިގެން މަރުވި މީހުންގެ އަދަދު 50،000 ށް އަރައިފި އެވެ.
ރޮއިޓަރސް އިން ބުނާގޮތުގައި އޭޕްރީލް މަހު އެވްރެޖްކޮށް 2000 މީހުން ވަނީ އެމެރިކާގައި މަރުވެފަ އެވެ. އެމެރިކާގައި މިވައިރަސް ޖެހުނު މީހުންގެ އަދަދު ވަނީ 860،000 ށް ވުރެ މައްޗަށް އަރާފަ އެވެ. ރޮއިޓަރސް އިން ބުނާގޮތުން އޭޕްރީލް މަހު އެވްރެޖްކޮށް ދުވާލަކު 30،000 މީހުންނަށް އެމެރިކާގައި ވަނީ ވައިރަސް ޖެހިފަ އެވެ. ނަމަވެސް 30،000 ށް ވުރެ ގިނަ މީހުންނަށް ބުދަ ދުވަހުން ފެށިގެން އަންނަނީ އެގައުމުގައި ވައިރަސް ޖެހެމުންނެވެ.
އެމެރިކާގެ އޮފިޝަލުން ބުނާގޮތުން ޓެސްޓް ކުރުމުގެ ކެޕޭސިޓީ އާއި ސިއްހީ އާލާތްތައް ބޭނުންވާ ވަރަށް ނެތުމާއި ކޮންޓެކްޓް ޓްރޭސިންގ ހެދުމުގައި ދިމާވަމުންދާ ދަތިތަކުގެ ސަބަބުން އެގައުމުގައި އަންނަނީ ވައިރަސް ފެތުރެމުން ކަމަށެވެ. އެމެރިކާގައި ވައިރަސް ޖެހިގެން މަރުވާ މީހުންގެ އަދަދު އިތުރު ވަމުންދާއިރު ވަޒީފާ ގެއްލޭ މީހުންގެ އަދަދުވެސް އެގައުމުގައި އަންނަނީ އިތުރު ވަމުންނެވެ. އަދި އެއާއެކު އެގައުމުގެ އިގްތިޞާދަށް ވެސް އަންނަނީ އެކަމުގެ އަސަރުތައް ކުރަމުންނެވެ.
އެމެރިކާގެ 26.5 މިލިއަން މީހުން ވަނީ ވަޒީފާ ގެއްލިގެން އެލަވަންސް ހޯދުމަށް މިދިޔަ ފަސް ހަފްތާގައި ހުށަހަޅާފަ އެވެ. ރޮއިޓަރަސްގެ ސަރވޭއަކުން ދައްކާ ގޮތުގައި އެމެރިކާގެ ގިނަ ރައްޔިތުން މިހާރު ބޭނުންވަނީ ވައިރަސް އިން ރައްކާތެރިވުމަށް ގޭގައި ތިބޭށެވެ.
