ނޮދަން އަޔަލެންޑްގެ ކޯޗުކަމުގެ މަގާމުން އޮނީލް އިސްތިއުފާ ދީފި

ނޮދަން އަޔަލެންޑްގެ ކޯޗުކަމުގެ މަގާމުން މައިކަލް އޮނީލް އިސްތިއުފާ ދީފިއެވެ.

މަގާމުން އިސްތިއުފާ ދިންކަން އައިރިޝް ފުޓްބޯލް އެސޯސިއޭޝަނުން ވަނީ ޔަގީންކޮށްދީފައެވެ. ނޮދަން އަޔަލެންޑްގެ ކޯޗުކަމުގެ މަގާމާ އޮނީލް ހަވާލުވީ 2011 ވަނަ އަހަރުގެ ޑިސެމްބަރު މަހު އެވެ. އެ މަގާމުގައި 8 އަހަރު ހޭދަކުރުމަށްފަހު އޭނާ އިސްތިއުފާ ދިންއިރު، މިދިޔަ އަހަރުގެ ނޮވެމްބަރު މަހުން ފެށިގެން އޭނާ އަންނަނީ ސްޓޯކް ސިޓީއަށްވެސް އިރުޝާދު ދެމުންނެވެ.

އައިރިޝް ފުޓްބޯލް އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ނޮދަން އަޔަލެންޑްގެ ކޯޗުކަމުގެ މަގާމުން އޮނީލް އިސްތިއުފާ ދިނީ، މިއަހަރުގެ ހޫނު މޫސުމުގައި ބޭއްވުމަށް ހަމަޖެހިފައި އޮތް ޔޫރޯ ފުޓްބޯޅަ މުބާރާތް އަންނަ އަހަރަށް ފަސްވުމާއެކު، ޔޫރޯ ކޮލިފިކޭޝަން މެޗުތައް ފަސްކުރާނެ ކަމަށް ބެލެވޭތީ އެވެ.

ކުރިން ހަމަޖެހިފައި އޮތީ ކޮލިފިކޭޝަނުގައި ބޮސްނިއާ-ހެޒަގޮވީނާ އާ ދެކޮޅަށް ނޮދަން އަޔަލެންޑް ކުޅޭ މެޗުގައި އޮނީލް އިރުޝާދު ދިނުމަށެވެ. އެކަމަކު ކޮރޯނާވައިރަސް (ކޮވިޑް-19) އާ ގުޅިގެން ޔޫރޯ ފުޓްބޯޅަ މުބާރާތް އަންނަ އަހަރުގެ ހޫނު މޫސުމަށް ފަސްކުރުމާއެކު، ކޮލިފިކޭޝަން މެޗުތައްވެސް ފަސްކުރަން ޔުއެފާ އިން މިހާރު އަންނަނީ މަސައްކަތް ކުރަމުންނެވެ.

މީގެ ކުރިން 2016 ވަނަ އަހަރު އޮނީލްގެ އިރުޝާދުގެ ދަށުން ނޮދަން އަޔަލެންޑް ވަނީ ޔޫރޯ އަށް ކޮލިފައިވެފައެވެ. ނޮދަން އަޔަލެންޑްގެ ކޯޗުގެ ގޮތުގައި އޮނީލް 8 އަހަރު ހޭދަކުރިއިރު، އޭނާގެ އިރުޝާދުގެ ދަށުން ނޮދަން އަޔަލެންޑުން ކުޅުނު 72 މެޗުގެ ތެރެއިން 26 މެޗުން ވަނީ މޮޅުވެފައެވެ.