ބަލިމަޑުކަމުން ސަލާމަތްވެގެން ނޫނީ އިގްތިސާދީ ހަރަކާތް ފެށޭނެ ގޮތެއް ނެތް: ރައީސް
23 އެޕްރީލު 2020 | ބުރާސްފަތި 14:34މުޅި ދުނިޔޭގެ އިޤްތިސާދުވެސް ވަނީ ހުއްޓުމެއްގައި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ކޮވިޑް-19 ގެ ބަލިމަޑުކަމުން އަރައިގަނެވިގެން ނޫނީ އިގްތިސާދީ ހަރަކާތް ފެށޭނެ އެއްވެސް ގޮތެއް ނެތްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
1441 ވަނަ އަހަރުގެ ރަމަޟާން މަސް ފެށުމުގެ މުނާސަބަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވި ހިތާބުގައި ވިދާޅުވީ ކޮވިޑް-19 އިން އަރައިގަތުމަށް އޮތް އެންމެ ފަސޭހަ މަގަކީ ގެއިން ބޭރަށް ނުނިކުމެ، ކެތްތެރިކަމާއެކު ދަތިކަން ތަޙައްމަލުކުރުންކަމަށެވެ. ރައީސް ސޯލިހު ވިދާޅުވީ، ސަރުކާރުން މަސައްކަތް ކުރަމުން ދަނީ އުނދަގޫ ދަތި ޙާލަތުގައިވެސް، ރައްޔިތުން އުފުލަންޖެހޭ ތަކުލީފުތައް ކުޑަކޮށްދީ، ރައްޔިތުންގެ އަސާސީ އަދި ޒަރޫރީ ބޭނުންތަކަށް މަގު ފަހިކޮށްދިނުމަށްކަމަށެވެ. އަދި ކޮވިޑް19ގެ ނުރައްކާތެރިކަން ފިލައިގެން ނޫނީ، އިޤްތިޞާދީ ޙަރަކާތްތައް ފެށޭނެ އެއްވެސް ގޮތެއް ނެތްކަމަށް ރައީސް ސޯލިހު ވަނީ ވިދާޅުވެފައެވެ.
ރައީސް ވިދާޅުވީ، މުޅި ދުނިޔޭގެ އިޤްތިޞާދު ދަށްވެ އެކަމުގެ ނަތީޖާ ރާއްޖެއަށްވެސް ކުރިމަތިވެފައިވާކަމަށާއި ވަރަށް ދަތި ޙާލުގައި އުޅޭ މީހުން އެބަތިބިކަމަށެވެ. މި މަސައްކަތް ކާމިޔާބު ކުރުމުގައި، ރައްޔިތުންގެ އެހީތެރިކަން ސަރުކާރަށް ނިހާޔަތަށް ބޭނުންވާކަމަށް ރައީސް ސޯލިހް ވިދާޅުވި އެވެ އަދި އަތުގައި ހުރި ފުދުންތެރިކަމާއި ވަސީލަތްތައް، އެންމެ ފުރިހަމައަށް އިޤްތިޞާދުކޮށް، އިސްރާފުކުރުމާ މުޅިން ދުރުހެލިވުމަށް ރައީސް އިލްތިމަސްކުރެވި އެވެ.
