އަމީތާބް ބައްޗަންގެ މަރާތީ ފިލްމް އޭބީ އާނީ ސީޑީ، ކޮވިޑް 19 އާއި ގުޅިގެން އެމޭޒޯން ޕްރައިމް ވީޑިއޯއިން ބެލޭގޮތް ހަމަޖައްސައިފިއެވެ.

އަކްޝޭ ބާދަޕޫކަރ ޕްރޮޑިއުސްކޮށް މިލިންދު ލެލޭ ޑައިރެކްޓްކުރި މި ފިލްމު ރިލީޒްކޮށްފައި ވަނީ ކޮވިޑް 19 ފެތުރެން ފެށި ދުވަސްވަރުގައެވެ. ބޮލީވުޑްގެ މަޝްހޫރު ތަރި އަމީތާބް ކުޅެފައިވާ މި ފިލްމަށް އެކަމުގެ އަސަރު ވަނީ ވަރަށް ބޮޑަށް ކޮށްފައެވެ.

އޭބީ އާނީ ސީޑީގެ ޕްރޮޑިއުސަރ އަކްޝޭ ބުނިގޮތުގައި ކޮވިޑް 19 ފެތުރެމުންދާ މި ދަނޑިވަޅުގައި އެންމެ މުހިންމީ ރައްޔިތުންގެ ރައްކާތެރިކަން ކަމަށެވެ.

ކޮވިޑް 19 އާއި ގުޅިގެން މުޅި އިންޑިއާވެސް ލޮކްޑައުންއަކަށް ގޮސްފައިވާ މި ދަނޑިވަޅުގައި އެމޭޒޯން ޕްރަމްއިން އޮންލައިންކޮށް ފިލްމް ރިލީޒްކުރަން ނިންމާފައި ވަނީ މެއި މަހުގެ 1 ވަނަ ދުވަހުގައެވެ. ދުނިޔޭގެ މަސައްކަތްތެރިންގެ ދުވަސްކަމުގައިވާ މެއި މަހުގެ އެއްވަނަ ދުވަހު ފިލިމް ރިލީޒްކުރާއިރު، މެއި މަހުގެ އެއްވަނަ ދުވަހަކީ މަހާރަޝްޓްރާ ދުވަސް ގޮތުގައި ވެސް އިންޑިއާގައި ފާހަގަކުރާ ދުވަހަކެއެވެ.

ފިލްމް އޮންލައިންކޮށް ދެއްކުމަށް ހަމަޖައްސާފައިވާ ސްޓްރީމް ޕާޓްނަރ އެމޭޒޯން ޕްރައިމް އާއި ގުޅިގެން މެއި މަހުގެ އެއް ވަނަ ދުވަހު އެ ފިލްމް ދެއްކުމަށް ހަމަޖެއްސީ ކޮވިޑް 19 އާއި ދެކޮޅަށް މަސައްކަތްކުރަމުންދާ މަސައްކަތްތެރިންގެ އަގުވަޒަންކުރުމުގެ ގޮތުންނެވެ.

ދުނިޔޭގެ މަސައްކަތްތެރިންގެ ދުވަހާ މިއަހަރު ކުރިމަތިލާއިރު، ކޮވިޑް 19 އާއި ދެކޮޅަށް ސިއްހީ ޙިދުމަތްތެރިންންނާއި ކޮންމެ ގައުމެއްގެ ކަމާއި ބެހޭ މުވައްސަސާތަކުގެ މުވައްޒިފުން ދަނީ ކެނޑި ނޭޅި ރެޔާ ދުވާލު މަސައްކަތް ކުރަމުންނެވެ. އިންޑިއާ ލޮކްޑައުންއަކަށް ގޮސްފައިވާއިރު، އެގައުމުގެ ފުލުހުންދަނީ ރައްޔިތުންގެ ޙައްގުގައި ރެޔޭ ދުވާލު މަގުތަކުގައި ޑިއުޓީ ކުރަމުންނެވެ. ލޮކްޑައުން ހާލަތުގައި ގޭގައި ތިބެގެން އަމީތާބުގެ މި ފިލްމް ބަލާލެވޭގޮތް ވުމަކީ އަމީތާބުގެ ސަޕޯޓަރުންނަށް ލިބިގެންދާނެ ހަދިޔާއެކެވެ.