މާލެސިޓީގައި ހުރި ސްކޫލުތައް ހިޔާގެ ގޮތުގައި ބޭނުން ކުރަނީ
22 އެޕްރީލު 2020 | ބުދަ 15:23ޣާޒީ ސްކޫލާއި ރެހެންދި ސްކޫލް ވަގުތީ ހިޔާތަކަށް ބަދަލުކުރެވިފައި
ހާލުގައިޖެހޭ މީހުންނަށް އެހީތެރިވުމަށް އެޑިޔުކޭޝަން މިނިސްޓްރީން ދަނީ މަސައްކަތްތައް ކުރަމުން
ކޮވިޑް-19އާ ގުޅިގެން ހާލުގައި ޖެހޭ މީހުންނަށް މާލެސިޓީގައި ހުރި ބައެއް ސްކޫލުތައް ހިޔާއެއްގެ ގޮތުގައި ބޭނުން ކުރަން އެޑިޔުކޭޝަން މިނިސްޓްރީން ނިންމައިފިއެވެ.
އެޑިޔުކޭޝަން މިނިސްޓްރީން ބުނީ ކޮވިޑް19 އާ ގުޅިގެން ހާލުގައިޖެހޭ މީހުންނަށް އެހީތެރިވުމުގެ ގޮތުން ޣާޒީ ސްކޫލާއި ރެހެންދި ސްކޫލް މޯލްޑިވްސް އެއާރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އެހީތެރިކަމާއެކު ވަގުތީ ހިޔާތަކަށް ބަދަލުކުރުމުގެ މަސައްކަތް ބުދަ ދުވަހު ނިމިފައިވާ ކަމަށެވެ. އަދި މިހާރު އިމާދުއްދީން ސްކޫލާއި ޣާޒީ ސްކޫލް ވަގުތީ ހިޔާގެ ގޮތުގައި ބޭނުންކުރަން ފަށާފައިވާ ކަމަށެވެ.
ނަމަވެސް އެމްއޭސީއެލްގެ އެހީތެރިކަމާއެކު ވަގުތީ ހިޔާތަކަށް ބަދަލުކުރެވުނު 2 ސްކޫލްގެ ތެރެއިން ރެހެންދި ސްކޫލް އަދި ބޭނުންކުރަން ނުފަށާ ކަމަށެވެ.
އެޑިޔުކޭޝަން މިނިސްޓްރީން ބުނީ މިސްކޫލްތަކުގެ އިތުރުން، ބޭނުންވާ މިންވަރަކުން އެހެން ސްކޫލްތައް ވަގުތީ ހިޔާތަކަށް ބަދަލުކުރުމުގެ މަސައްކަތް ކުރިއަށް ދާނެ ކަމަށެވެ.
މިއީ ކޮވިޑް19 އާ ގުޅިގެން ތަފާތު ސަބަބުތަކާހެދި ދިރިއުޅޭނެ ރައްކާތެރި ތަނެއް ނެތިފައި ތިބި މީހުންނަށް އެހީތެރިވުމުގެ ގޮތުން ކުރިއަށްގެންދާ މަސައްކަތެއް ކަމަށް މިނިސްޓްރީން ބުނެއެވެ.
