ކޮވިޑް-19 ރާއްޖޭގައި ފެތުރެމުންދާތީ، އިދިކޮޅު ފަރާތްތަކާއެކު ގުޅިގެން މަސައްކަތް ކުރުމަށް އެފަރާތްތަކުން ގޮވާލަމުންދާއިރު، އިދިކޮޅު ފަރާތްތަކުންގެ މައިގަނޑު ޑިމާންޑަކަށް ވެފައިވަނީ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ޖަލުން ދޫކޮށްލުން ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް ވިދާޅުވެއްޖެ އެވެ.
އަލީ އާޒިމް މިހެން ވިދާޅުވެފައިވަނީ، ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކޮށްފައިވާތީ، ރަށްރަށުން މާލެއައިސްފައި ތިބި މީހުންނަށް ރަށަށް ފުރޭނެގޮތެއް ނެތި، މާލޭގައި ތިބެންޖެހިފައިވުމާއި އަދި ކުލި ނުދެއްކިގެން މަގުމަތިވެފައިވާ ފަރާތްތަކާއި ހާލުގައިޖެހިފައިވާ ފަރާތްތަކާ މެދު ސަރުކާރުން އަމަލުކުރާނެ ގޮތަކީ ކޮބައިތޯ ބެލުމަށާއި ސަރުކާރުގެ ސަމާލުކަމަށް ގެނައުމަށް އިދިކޮޅު ޕީއެންސީގެ ޕާލަމެންޓްރީ ގްރޫޕްގެ ލީޑަރ އާދަމް ޝަރީފް އުމަރު ހުށަހަޅާފައިވާ މައްސަލައަށް ބަހުސް ކުރައްވަމުން ނެވެ.
މިމައްސަލަ މަޖިލީހުގެ ތަޅުމަށް ހުށަހެޅުއްވުމަށްފަހު، ވާހަކަ ދައްކަވަމުން އާދަމް ޝަރީފް ވިދާޅުވެފައިވަނީ ކުއްލިއަކަށް މާލެ ސަރަހައްދު ލޮކްޑައުން ކުރުމާ ގުޅިގެން ވަރަށް ގިނަ ބަޔަކަށް ދަތިތަކާއި ކުރިމަތި ވެފައިވާ ކަމަށެވެ. އަދި ހާލަތުން އަރައިގަތުމަށް ސަރުކާރުން ހަރުދަނާ ފިޔަވަޅުތަކެއް އަޅަން ޖެހޭކަމަށާއި ސިޔާސީ ފިކުރު އެއްކޮށް އެއްފަރާތް ކުރުމަށްފަހު، ހުރިހާ ސިޔާސީ ޕާޓީތަކާއެކު މަސައްކަތް ކުރުމަށްވެސް ޝަރީފް ވަނީ ގޮވާލައްވާފަ އެވެ.
ޝަރީފް އެގޮތަށް ގޮވާލެއްވިއިރު، ޝަރީފްގެ ފަހަތުން ފެންނަން ހުރީ ރައީސް ޔާމީން މިނިވަންކުރަން ގޮވާލައި ހަރު ކޮށްފައިހުރި ޕޯސްޓަރުތަކެކެވެ.
މި ކުއްލި މައްސަލައަށް ބަހުސް ކުރައްވަމުން އާޒިމް ވިދާޅުވީ، މިވަގުތަކީ އެއްވެސް ފަރާތަކަށް އެހާފަސޭހަ ވަގުތެއް ނޫންކަމަށާއި މިވަގުތަކީ ސަރުކާރަށް ވެސް އެހާ ފަސޭހަ ވަގުތެއް ނޫން ކަމަށެވެ. އަދި ދިވެހި އެއްވެސް ރައްޔިތަކަށް އެހާ ފަސޭހަ އަދި ހިތްގައިމު ވަގުތުތަކެއް ނޫން ކަމަށާއި، ރައްޔިތުންނަށް ދިމާވެފައި މިވާ ދަތިތަކުން އަރައިގަތުމަށް ސަރުކާރުން ރޭވުންތެރިކަމާއެކު މަސައްކަތް ކުރަމުންދާ ކަމަށްވެސް އާޒިމް ވިދާޅުވި އެވެ.
މިވަގުތުތަކުގައި އެކިއެކި ގޮތްގޮތުން ސަރުކާރުން ހުރިހާ ފަރާތްތަކާ ގުޅިގެން މަސައްކަތް ކުރެވޭތޯ އެބަބަލާ. އަޅުގަނޑު ގަބޫލްކުރާ ގޮތުގައި ސަރުކާރުން އިދިކޮޅު ފަރާތްތަކާވެސް ވާދަވެރި ފަރާތްތަކާވެސް ގުޅިގެން މަސައްކަތް ކުރާނެ، އަދި މަސައްކަތްކުރަން މަސައްކަތްވެސް ކުރާނެ. އެހެންނަމަވެސް މިދަނޑިވަޅުގައި ވެސް އެފަދަ ފަރާތްތަކަށް ގޮވާލާއިރަށް، ހަމަ ދައްކާނީ އެންމެ ވާހަކައެއް، އަޅުގަނޑު ގަބޫލުކުރާ ގޮތުގައި އެކަމާހުރެ، ނޫނީ އެކަން މިހާރުވެސް އޮންނާނީ ވެފައި. އަޅުގަނޑުމެންނާ ވާދަވެރި ފަރާތްތަކާ ވާހަކަ ނުދެއްކިގެން މިއުޅެނީ، ރައީސް ޔާމީން ދޫކޮށްލުމަށް ފުރަތަމައިނުންވެސް ބުނާނީ. އެއެއްނޫން އަޅުގަނޑުމެންގެ މިވަގުތު ވިސްނުމަކަށް ވާންޖެހޭނީ. އަޅުގަނޑުމެންގެ ވާދަވެރި ފަރާތްތަށް ޒިންމާދާރުގޮތުގައި ތިބިނަމައެއް، ޔާމީން ދޫކޮށްލާކަށް ނޫން މިވަގުތު ބުނާނީކީ، މިވަގުތު ދިމާވެފައިވާ ދަތިތަކަށް ސަރުކާރަށް އެހީތެރިވަން ވިސްނާނީ،ރައްޔިތުންގެ މަޖިލީހުގެ މެޖޯރިޓީ ލީޑަރ، އަދި އެމްޑީޕީގެ ޕީޖީ ލީޑަރ އަލީ އާޒިމް
މިހާލަތުގައި ވެސް އިދިކޮޅު ފަރާތްތަކުގެ މައިގަނޑު މަސައްކަތެއް ގޮތުގައި ފާހަގަ ކުރެވިފައިވަނީ ރައީސް ޔާމީން މިނިވަން ކުރުންކަމަށް ވެއެވެ. ރައީސް ޔާމީން މިނިވަން ކުރުމަށް ގޮވާލާ އިދިކޮޅު ފަރާތްތަކުން ސޯސަލް މީޑިއާގައި ވެސް ޝުއޫރު ފާޅުކުރަމުން ދެއެވެ.
އާޒިމް ވިދާޅުވީ، ޝަރީފް ހުށަހެޅުއްވި ކުއްލި މައްސަލާގައި މައިގަނޑު ފާހަގަ ކުރައްވާފައިވަނީ ދެ ކަމެއް ކަމަށެވެ. އެއީ، މާލެ ސަރަހައްދު ލޮކްޑައުންގެ މިހާލަތުގައި، ގެދޮރު ނެތި މަގުމަތި ވެފައިވާ މީހުންނާއި އަޅާލާނެ މީހުންނެތް އުމުރުން ދުވަސްވީ މީހުންނާމެދު ސަރުކާރުން ކަންކަން ކުރާނެ ގޮތެއް އެނގިފައިނުވާތީ އާއި މިހާލަތުގައި ވަގުތީ ގޮތުން މާލެ އައިސް ތިބި ބޯޓުތަކާއި އެކިއެކި ބޭނުންތަކުގައި މާލެއައިސްތިބި ފަރާތްތަކަށް ރަށަށް ނުފުރިފަ، މާލޭގައި ތާށިވެފައިތިބުމުން ސަރުކާރުން އެމީހުންނާމެދު ކަންކުރާނެ އުސޫލެއް އެނގިފައި ނުވާތީ، ޝަރީފް ހުށަހަޅުއްވާފައިވާ ކުއްލި މައްސަލައެއްކަމަށް އާޒިމް ވިދާޅުވި އެވެ.
އާޒިމް ވިދާޅުވީ، ސަރުކާރުން ރައްޔިތުންނަށާއި މީޑީއާތަކަށް ފޯރުކޮށްދޭ މައުލޫމާތުތައް ރަނގަޅަށް އަޑު އައްސަވާނަމަ ޝަރީފަށް ވެސް ހުންނާނީ ސަރުކާރުން މިކަންކަމާ ގުޅޭ ގޮތުން މައުލޫމާތު ލިބިލައްވާފައި ކަމަށެވެ. އާޒިމް ވިދާޅުވީ، ޝަރީފް ހުށަހެޅުއްވި ކަންކަމާ ގުޅޭގޮތުންން ސަރުކާރުން މިހާތަނަށް ވަރަށް ގިނަ މައުލޫމާތު މީޑިއާތަކަށް ހިއްސާކޮށްފައިވާ ކަމަށާއި އަދި ހަރުދަނާ ފިޔަވަޅުތަކެއް ސަރުކާރުން އަޅަމުންދާ ކަމަށްވެސް އާޒިމް ވިދާޅުވި އެވެ.
