ކޮވިޑް-19 އަށް ފަރުވާއެއް ލިބިއްޖެނަމަ ޤައުމުތަކަށް ހަމަހަމައަށް ފޯރުކޮށްދިނުމުގެ ޤަރާރަށް އިންޑިއާއިން ތާއީދުކޮށްފި
އިންޑިއާއަކީ މި ޤަރާރަށް ކޯ-ސްޕޮންސަރކޮށް، ތާއީދުކުރި 179 ޤައުމުތަކުގެ ތެރެއިން އެއް ޤައުމު
މިހާރުވެސް އިންޑިއާއިން ދަނީ އެކި ޤައުމުތަކަށް އެހީތެރިކަން ފޯރުކޮށްދެމުން
ކޮވިޑް-19 އަށް ވެކްސިނެއް ނުވަތަ ފަރުވާއެއް ލިބިއްޖެނަމަ ޤައުމުތަކަށް ހަމަހަމައަށް ފޯރުކޮށްދިނުމަށް ގޮވާލާ ޤަރާރަށް އިންޑިއާއިން ތާއީދުކޮށްފިއެވެ.
ހޯމަ ދުވަހު އދ ގެ 193 މެމްބަރުންގެ ޖެނެރަލް އެސެމްބްލީން ބަލައިގަތް މި ޤަރާރަށް އިންޑިއާއިންވެސް ތާއީދުކޮށްފައިވާއިރު، ޤައުމުތަކަށް އެއް ހަމައެއްގައި ފަރުވާ ފޯރުކޮށްދިނުމަށާއި، ވެކްސިނެއް އުފެއްދިއްޖެ ނަމަވެސް ހުރިހާ ޤައުމަކަށްވެސް އަވަސް މިނެއްގައި ވެކްސިން ލިބޭނެ އިންތިޒާމް ހަމަޖައްސައިދިނުމަށް ޤަރާރުގައި ގޮވާލާފައިވެއެވެ. އެގޮތުން އިންޑިއާއަކީ މި ޤަރާރަށް ކޯ-ސްޕްންސަރކޮށް، ތާއީދުކުރި 179 ޤައުމުތަކުގެ ތެރެއިން އެއް ޤައުމެވެ.
މެކްސިކޯއިން ޑްރާފްޓްކޮށް، އެމެރިކާއިންވެސް އެއްބާރުލުން ދީފައިވާ މި ޤަރާރުގައި ކޮވިޑް-19 އަށް ފަރުވާދިނުމަށް އުފައްދާ ބޭހާއި ވެކްސިންގެ އިތުރުން، މިހާރު ބޭނުން ކުރަމުންދާ މެޑިކަލް އާލަތްތަކާއި، ކޮވިޑް-19 ޓެސްޓް ކިޓްގެ އިތުރުން، ރައްކާތެރިވުމުގެ ގޮތުން ބޭނުންކުރާ ޕްރޮޓެކްޓިވް އިކުއިޕްމަންޓުތައްވެސް އެއް ހަމައެއްގައި ޤައުމުތަކަށް ފޯރުކޮށްދިނުމަށް ގޮވާލާފައިވެއެވެ.
އިންޑިއާއިން މި ޤަރާރަށް ތާއީދުކޮށްފައިވާއިރު، މިހާރުވެސް އިންޑިއާއިން ދަނީ އެކި ޤައުމުތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ. އެގޮތުން ކޮވިޑް-19 އަށް ފަރުވާ ދިނުމަށް ބޭނުންކުރާ ބޭހެއްކަމަށްވާ ހައިޑްރޮކްސީކްލޮރޯކުއިން ފަދަ ބޭސްތައް ގިނަ ޤައުމުތަކަށް މިހާރުވެސް އިންޑިއާއިން ދަނީ ފޯރުކޮށްދެމުންނެވެ. އަދި އެކަން ފާހަގަކޮށް އދ އިންވެސް އިންޑިއާއަށް ތައުރީފް ކޮށްފައިވެއެވެ.
އިންޑިއާއިން އެހީތެރިކަން ފޯރުކޮށްދިން ޤައުމުތަކުގެ ތެރޭގައި އެމެރިކާ، މޮރީޝަސް، ސިޝެލްސް، އަފްގާނިސްތާން، ބޫޓާން، ބަންގްލަދޭޝް، ނޭޕާލް އަދި ދިވެހިރާއްޖެވެސް ހިމެނެއެވެ.
މި ޤަރާރަކީ ކޮވިޑް-19 އަކީ ޕެންޑެމިކްއެއްގެ ގޮތުގައި ދުނިޔޭގެ ސިއްޙަތު ޖަމިއްޔާއިން ކަނޑައެޅިފަހުން އދ އިން ބަލައިގަތް އެފަދަ ދެވަނަ ޤަރާރެވެ.
