އޯގާތެރިކަމަކީވެސް ފަރުވާއެއް، މިދަނޑިވަޅުގައި އެކަކު އަނެކަކަށް އަޅާލާ: ޑަބްލިއުއެޗްއޯ
21 މާރިޗު 2020 | ހޮނިހިރު 07:52ވައިރަސްގެ ވެކްސިންއެއްގެ ފުރަތަމަ ޓްރަޔަލް މި ހަފްތާ ތެރޭގައި ފެށިފައިވޭ
ޑަބްލިއުއެޗްއޯގެ ޗީފް ޓެޑްރޯސް އަދަނޯމް ގެބްރިއާސިސް
އޯގާތެރިކަމަކީ ފަރުވާއެއް ކަމަށާއި، މި ދަނޑިވަޅުގައި އެކަކު އަނެކަކަށް އަޅާލައި އޯގާތެރިވުމަށް އިސްކަންދޭން ޖެހޭނެކަމަށް ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) ގެ ޗީފް، ޓެޑްރޯސް އަދަނޯމް ގެބްރިއާސިސް ވިދާޅުވެއްޖެއެވެ.
ޓެޑްރޯސް ވިދާޅުވީ، ހުކުރު ދުވަހު އދ ގެ ސެކެޓްރީ ޖެނެރަލްގެ އެގްޒެކިއުޓިވް ބޯޑް މީޓިންގ ގައި ބައިވެރިވެވަޑައިގެން ކޮވިޑް-19 އާ ގުޅޭ ފަހުގެ މައުލޫމާތުތައް ހިއްސާ ކުރައްވާފައިވާނެ ކަމަށެވެ. އަދި އެ ބައްދަލުވުމުގައި ޤައުމުތަކުގެ ސިއްޙީ ނިޒާމުގެ ހުރި ތަފާތުތަކާއި، މިހާތަނަށް ކުރެވިފައިވާ މަސައްކަތްތަކުގެ ތަފްސީލު ހިއްސާކުރައްވާފައިވާނެކަމަށް އޭނާ ވިދާޅުވިއެވެ.
އެގޮތުން އެއް ޤައުމަށް އޮތް ނުރައްކަލަކީ މުޅި ދުނިޔެއަށްވެސް އޮތް ނުރައްކަލެއް ކަމަށާއި، މި ދަނޑިވަޅުގައި އެކަކު އަނެކަކަށް އަޅާލައި އޯގާތެރިވުމަށް އިސްކަންދޭން ޖެހޭނެކަމަށްވެސް ޓެޑްރޯސް ވިދާޅުވިއެވެ.
ޓެޑްރޯސް އިތުރަށް ވިދާޅުވީ، ކޮރޯނާވައިރަސް ގެ އައު ސީކުއެންސް (ކޮވިޑް-19 ސީކުއެންސް) ދެނެގަނެވުނުތާ 60 ދުވަސްވެފައިވާއިރު، އެމެރިކާގައި މިހާރު ވައިރަސްގެ ވެކްސިންއެއްގެ ފުރަތަމަ ޓްރަޔަލް މި ހަފްތާ ތެރޭގައި ފެށިފައިވާ ކަމަށެވެ. އަދި ދުނިޔޭގެ ސިއްޙަތު ޖަމިއްޔާއާއި ކަމާބެހޭ ފަރާތްތައް ގުޅިގެން ބައިނަލްއަޤުވާމީ ދިރާސާއެއް ފަށާފައިވާކަންވެސް ޓެޑްރޯސް ވަނީ ފާހަގަ ކުރައްވާފައެވެ.
އޭގެ އިތުރުން، ބައެއް ޤައުމުތަކުގެ ތަފާސްހިސާބުތަކާއި ތަފްސީލުތަކަށް ބަލާއިރު، ވައިރަސް ޖެހިފައިވާ މީހުންނާއި ދުރުގައި ހުރުމަށް އެކަނި އިސްކަންދީގެން ނުފުދޭ ކަމަށާއި، އޭގެ އިތުރުން، ޓެސްޓު ކުރުމާއި، އެ ފަރާތްތައް އައިސޮލޭޓް ކުރެވި ފަރުވާދޭ ނިޒާމް ވަރުގަދަކުރަންވެސް ޖެހޭނެކަން ޓެޑްރޯސް ފާހަގަކުރެއްވިއެވެ.
މިސާލެއްގެ ގޮތުން ޓެޑްރޯސް ވަނީ ޗައިނާ، ޖަޕާން، ދެކުނު ކޮރެއާ އަދި ސިންގަޕޫރުގެ ވާހަކަ ފާހަގަ ކުރައްވާފައެވެ.
ޓެޑްރޯސްގެ ވާހަކަފުޅުގައި ވަނީ މި ދަނޑިވަޅުގައި އަމިއްލަ ސިއްޙަތާއި ނަފްސާނީ ދުޅަހެޔޮކަމަށް އިސްކަންދިނުމަށް ކުރެވިދާނެ ކަންކަމަށް އަލިއަޅުވާލައްވާފައެވެ.
ޓެޑްރޯސްގެ ވާހަކަފުޅުގައި ޒުވާނުންނަށް ޚާއްސަ މެސެޖެއް ދެއްވާފައިވާއިރު، ޓެޑްރޯސް ވިދާޅުވީ، ޒުވާނުންގެ ފަރާތުން ވަައިރަސް ފެތުރޭ މިންވަރަށްވުރެ، ވައިރަސްގެ މައުލޫމާތު ފެތުރޭ މިންވަރު ގިނަ ކަމަށާއި، އެއީ ރަނގަޅު ފާލެއް ކަމަށެވެ. އަދި ޒުވާނުންވެސް ވިސްނަންޖެހޭ ކަމަކީ ޒުވާނުންނަށްވެސް މި ވައިރަސް ޖެހުމުގެ ފުރުސަތު އޮންނާނެކަން ކަމަށާއި، ވައިރަސްގެ ސަބަބުން އެތައް ދުވަހަކު ހޮސްޕިޓަލުގައި އޮންނަންޖެހި، ފުރާނަ ދިއުމަކީވެސް އެކަށީގެންވާ ކަމެއް ކަމަށެވެ.
އަދި ބަލި ނުވިކަމުގައިވިޔަސް ހެދޭ އެންމެ ގޯހަކުން އެތައް ބައެއްގެ ފުރާނަ ނުރައްކަލަށް ވެއްޓިގެން ހިނގައިދާނެކަން ފާހަގަކުރައްވައި ޓެޑްރޯސް އިތުރަށް ވިދާޅުވީ، ޤައުމުތަކުގެ ތަފާސްހިސާބުތަކަށް ބަލާލިނަމަވެސް އުމުރުން 50 އަހަރުން ދަށުގެ މީހުންނަށްވެސް ވައިރަސް ޖެހި ގިނަ އަދަދަކަށް އެޑްމިޓްކުރަން ޖެހިފައިވާކަން ފެނިފައިވާ ކަމަށެވެ.
