ކުދި ޤައުމުތަކަށް އެހީވުމަށް ޗައިނާއިން ޑަބްލިއުއެޗްއޯއަށް 30 މިލިއަން ޑޮލަރު ދިނުމަށް ނިންމައިފި

ކޮވިޑް-19 އާ ގުޅިގެން ކުރަމުންދާ މަސައްކަތްތަކަށް އެހީތެރިކަން ފޯރުކޮށްދިނުމުގެ ގޮތުން ޗައިނާއިން ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އަށް 30 މިލިއަން އެމެރިކާ ޑޮލަރު ދިނުމަށް ނިންމައިފިއެވެ.

ޗައިނާގެ ފޮރިން މިނިސްޓްރީގެ ތަރުޖަމާނު ގެންގް ޝުއަންގާ ޙަވާލާދީ ބޭރުގެ މީޑިއާތަކުން ރިޕޯޓްކޮށްފައިވާ ގޮތުން ޗައިނާއިން ދުނިޔޭގެ ސިއްޙަތު ޖަމިއްޔާއަށް އެހީތެރިވުމަށް ނިންމާފައިވާއިރު، މިފަހަރުވެސް ކުދި ޤައުމުތަކަށް އެހީތެރިކަން ފޯރުކޮށް ދިނުމަށް ޗައިނާއިން އެ ޖަމިއްޔާއަށް 30 މިލިއަން އެމެރިކާ ޑޮލަރު ދިނުމަށް ވަނީ ނިންމާފައެވެ.

އެކަމާ ގުޅޭގޮތުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގް ލީޒޮންގ ކުރެއްވި ޓްވީޓެއްގައި ވިދާޅުވީ، މިއީ ސިއްހީ ނިޒާމު ބަލިކަށި ޤައުމުތަކާއި ކުރިއަރަމުން އަންނަ ޤައުމުތަކަށް އެހީތެރިކަން ފޯރުކޮށްދިނުމުގެ ގޮތުން ޗައިނާއިން ނިންމި ނިންމުމެއް ކަމަށެވެ.

ކުދި ޤައުމުތަކާއި، ސިއްޙީ ނިޒާމު ބަލިކަށި ޤައުމުތަކަށް ކޮވިޑް-19 ގެ ނުރައްކަލުން ސަލާމަތް ވުމަށް އެހީވުމުގެ ގޮތުން ޗައިނާއިން މީގެ ކުރިންވެސް ޑަބްލިއުއެޗްއޯއަށް އެހީތެރިކަން ފޯރުކޮށްދީފައިވެއެވެ. އެގޮތުން މިދިޔަ މާރޗް މަހުވެސް ޗައިނާއިން ވަނީ 20 މިލިއަން އެމެރިކާ ޑޮލަރު ޑަބްލިއުއެޗްއޯއަށް ހަދިޔާކޮށްފައެވެ.

ޗައިނާއިން ދުނިޔޭގެ ސިއްޙަތު ޖަމިއްޔާއަށް މާލީ އެހީތެރިކަން ފޯރުކޮށްދީފައިވާއިރު، މި ވައިރަސްގެ ބަލިމަޑުކަމުން އަރައިގަތުމަށާއި، އެ ބަލިން ރައްކާތެރިވުމަށް ޗައިނާއިން ވެސް އަޅަމުންދާ ފިޔަވަޅުތަކާމެދު އިތުބާރު އެބައޮތް ކަމަށް އެ ޖަމިއްޔާއިން ވަނީ ބުނެފައެވެ.

އެގޮތުން ޗައިނާގައި ނޮވެލް ކޮރޯނާ ވައިރަސް ފެތުރުމާއެކު، އެކަމުން ރައްކާތެރިވުމަށާއި، އެޤައުމުގެ ރައްޔިތުން އެކަމުން ސަލާމަތް ކުރުމަށް ޗައިނާ ސަރުކާރުން ވަގުތުން އެޅި ހަރުދަނާ ފިޔަވަޅުތައް ދުނިޔޭގެ ޞިއްޙަތު ޖަމްޢިއްޔާއިންނާއި، ބައިނަލްއަޤުވާމީ މުޖުތަމަޢުން ބަލައިގަންނަ ކަމަށް ދުނިޔޭގެ ޞިއްޙަތު ޖަމްޢިޔާގެ ޑިރެކްޓަރ ޖެނެރަލް ޓެޑްރޯސް އެޑެނޯމް ގެބްރިޔޭސަސް ވެސް ވަނީ ވިދާޅުވެފައެވެ.