80 އަހަރުގެ މީހާގެ ޙާލު އިތުރަށް ގޯހެއް ނުވޭ، ނަމަވެސް ކުއްލިއަކަށްވެސް ގޯސްވެދާނެކަމުގެ ބިރު އެބައޮތް: ޑޮކްޓަރ

އަންގާރަ ދުވަހު މާލެ ސަރަޙައްދުން ކޮވިޑް-19 އަށް ޕޮޒިޓިވްވި މީހުންގެ ތެރޭގައި ހިމެނޭ 80 އަހަރުގެ މީހާގެ ޙާލު އިތުރަށް ގޯސް ނުވާ ކަމަށާއި، ނަމަވެސް ކުއްލިއަކަށްވެސް ގޯސްވެދާނެ ކަމުގެ ބިރު އެބައޮތް ކަމަށް ޑޮކްޓަރ މޫސާ ހުސައިން، ވިދާޅުވެއްޖެއެވެ.

އައިޖީއެމްއެޗްގެ ރެސްޕިރޭޓަރީ ޑިޕާޓްމަންޓްގެ އިސްވެރިއާގެ މަޤާމުވެސް އަދާކުރައްވަމުން ގެންދަވާ ޑޮކްޓަރ މޫސާ ހުސައިން އަކީ، ރާއްޖޭގައި ކޮވިޑު19އަށް ފައްސިވެ ޙާލުބޮޑުވި އިޓަލީ ފަތުރުވެރިޔާއަށް ފަރުވާ ދެއްވުމުގައިވެސް، އިސްކޮށް އުޅުއްވި ފަރާތެކެވެ. އެގޮތުން ބުދަ ދުވަހު "ރާއްޖެއެމްވީ" އަށް މައުލޫމާތު ދެއްވަމުން ޑޮކްޓަރ ވިދާޅުވީ، އަންގާރަ ދުވަހާ އަޅާބަލާއިރު، އޭނާގެ ޙާލު އިތުރަށް ގޯސްވަމުން ނުދާ ކަމަށެވެ. ނަމަވެސް އޭނާއަކީ ސިއްޙީ ގިނަ މައްސަލަތަކެއް ހުރި ފަރާތަކަށް ވުމުން ކޮންމެ ވަގުތެއްގައިވެސް ޙާލު ގޯސްވެދާނެ ކަމުގެ ބިރު އެބައޮތްކަން ޑޮކްޓަރ ފާހަގަކުރެއްވިއެވެ.

Advertisement

ދަރުމަވަންތަ ހޮސްޕިޓަލުގެ ޑީއެޗް11 ގައި ފަރުވާ ހޯދަމުންދާ 80 އަހަރުގެ މީހާއަކީ ސްޓްރޯކެއް ޖެހުމުގެ ސަބަބުން 2 އަހަރު ވަންދެން އެދުމަތިވެފައިވާ މީހެއް ކަމަށާއި، އޭނާއަކީ ހަކުރު ބައްޔާއި، ކްލޮސްޓްރޯލް އަދި ލޭމައްޗަށް ދިއުންފަދަ ބަލިތަކަށް ފަރުވާ ހޯދަމުން އަންނަ މީހަކަށް ވުމުގެ އިތުރުން، މީގެ ކުރިން ނިއުމޯނިއާވެސް ޖެހިފައިވާ މީހެއް ކަމަށް ޑރ މޫސާ ވަނީ ފާހަގަ ކުރައްވައިފައިވެއެވެ. ހަމައެއާއެކު އޭނާއަކީ ކޮވިޑް-19 ޖެހިގެން ޙާލު ނުރައްކާ ވުމުގެ ފުރުސަތު އޮތް މީހެއްކަން ޑޮކްޓަރ ފާހަގަ ކުރެއްވިއެވެ.

ޑރ. މޫސާ ވިދާޅުވިގޮތުގައި، މީހެއްގެ ހަށިގަނޑުގައި އޮކްސިޖަން ލެވެލް ހުންނަން ޖެހޭނީ 98 އިންސައްތައިގަ ކަމަށާއި، ނަމަވެސް 80 އަހަރުގެ މީހާގެ ހަށިގަނޑުގައި އޮކްސިޖަން ލެވެލް ހުރީ 94 އިންސައްތައިގަ ކަމަށެވެ. އެހެންކަމުން މިއީ އިންޒާރުގެ މެސެޖެއް ކަމަށް އޭނާ ވިދާޅުވިއެވެ.

ޑޮކްޓަރު މުރާދު ވިދާޅުވީ، ޑޮކްޓަރުންގެ ޓީމުގެ ރިސަރޗުގައި ހިމެނޭ ބޭސް ދިނުމުގެ މަސައްކަތް މިހާރު ފަށާފައިވާ ކަމަށާއި، ބަލިމީހާގެ ޙާލަތަށް ބަލައި ދޭންޖެހޭ އިތުރު ބޭސްތައް ނިންމަވާނެ ކަމަށެވެ. އެގޮތުން ކުރިން ބަލިން ރަނގަޅުވި މީހާއަށް ދިން ބޭހުގެ ފަރުވާ ފައްޓަވާނެ ކަމަށާއި، އިތުރަށް ދޭން ޖެހޭ ބޭސް ބަލަމުންދާ ކަމަށްވެސް ޑޮކްޓަރ ވިދާޅުވިއެވެ.

80 އަހަރުގެ މީހާ އަށް މިވަގުތު ދަނީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާ ދެމުންނެވެ. 11 ވަނަ ފަންގިފިލާއަކީ ކޮވިޑް-19 އާއި ގުޅިގެން ހާލުބޮޑުވާ ބަލި މީހުންނަށް ފަރުވާ ދިނުމަށް ހާއްސަކޮށްފައިވާ ތަނެކެވެ. އެގޮތުން އުމުރުން ދުވަސްވީ މީހުންނާއި، އިތުރު ފަރުވާދޭން ޖެހޭ މީހުންގެ އިތުރުން ޑޮކްޓަރުން ގާތުން ބަލަން ބޭނުންވާ ބައެއް މީހުން މީގެ ކުރިންވެސް އައިސޮލޭޝަން ފެސިލިޓީތަކުން ދަރުމަވަންތަ ހޮސްޕިޓަލަށް ބަދަލުކުރެވިފައިވެއެވެ.