ކޮރަޕްޝަންގެ ތުހުމަތުގައި ގުއަޓެމާލާގެ ސިއްޙީ ވުޒާރާގެ އިސް އޮފިޝަލުންތަކެއް މަޤާމުން ވަކިކޮށްފި

ކޮރަޕްޝަންގެ ބޮޑެތި ތުހުމަތުތަކަކާއި ގުޅިގެން ގުއަޓެމާލާގެ ސިއްޙީ ވުޒާރާގެ އިސް އޮފިޝަލުންތަކެއް މަޤާމުން ވަކިކޮށްފިއެވެ.

ކޮވިޑް-19 ގެ ބިރުވެރިކަން ޤައުމުތަކަށް ކުރިމަތިވަމުންދާ މި ދަނޑިވަޅުގައި އެ ޤައުމުގެ ދައުލަތުގެ ސިއްޙީ ފަންޑަށް ހިޔާނަތްތެރިވިކަމަށް ބުނެ ސިއްޙަތާބެހޭ ވުޒާރާގެ 2 ޑެޕިއުޓީ ހެލްތް މިނިސްޓަރަކު މަޤާމުން ވަކިކޮށްފައިވާއިރު، މިކަމުގައި އިތުރު 6 މީހަކު ޝާމިލުވާކަމަށް ބޭރުގެ މީޑިއާތަކުން ރިޕޯޓްކޮށްފައިވެއެވެ.

އަލްޖަޒީރާގައި ރިޕޯޓްކޮށްފައިވާ ގޮތުން ގުއަޓެމާލާގެ ސަރުކާރުން ކޮރަޕްޝަން ހުއްޓުވުމަށް ޤާއިމުކޮށްފައިވާ ރިޔާސީ ކޮމިޝަނުން މިހާރު ވަނީ މި މައްސަލަ އެ ޤައުމުގެ އެންޓި ކޮރަޕްޝަން ޕްރޮސެކިއުޝަން ބިއުރޯއަށްވެސް ހުށައަޅާފައެވެ. ނަމަވެސް ހުށައެޅި މައްސަލައިގައި ހިމެނެނީ ކޮން ބައެއްކަން ހާމަކޮށްފައި ނުވާކަމަށް ރިޕޯޓްތައް ބުނެއެވެ.

އޭގެ އިތުރުން، މި މައްސަލައަކީ ޖިނާއީ ބޮޑު ތަހުޤީޤެއް ހިނގަމުންދާ މައްސަލައަކަށްވާތީ އެކަމުގެ އިތުރު ތަފްސީލު ހާމަކުރެވޭކަށް ނެތް ކަމަށް އެ ޤައުމުގެ ސިއްޙަތާބެހޭ ވުޒާރާއާ ޙަވާލާދީ ބޭރުގެ މީޑިއާތަކުން ރިޕޯޓްކޮށްފައިވެއެވެ.

އެކަމާ ގުޅޭގޮތުން ވާހަކަދައްކަވަމުން އެ ޤައުމުގެ ރައީސް އަލެހަންދްރޯ ޖިއަންމަތައި ވިދާޅުވީ، އެއްވެސް މިންވަރަކަށް އެ ޤައުމުން ކޮރަޕްޝަންގެ އަމަލުތައް ބަލައި ނުގަންނާނެ ކަމަށާއި، ޚާއްސަކޮށް މިފަދަ ކާރިސާއެއްގެ ދަނޑިވަޅުގައި ދައުލަތުގެ އެއްވެސް މުދަލަކުން ވައްކަން ކުރުމަކީ ބަލައިގަނެވޭނެކަމެއް ނޫން ކަމަށެވެ.

މިދިޔަ މާރޗުމަހުގެ 13 ވަނަ ދުވަހު ގުއަޓެމާލާއިން ކޮވިޑް-19 ގެ ފުރަތަމަ ކޭސް ފެނުނު ފަހުން މިހާތަނަށް އެ ޤައުމުން 294 ކޭސް ފެނިފައިވާއިރު، އޭގެ ތެރޭގައި އެމެރިކާއިން ޑީޕޯޓްކޮށްލި 50 ރައްޔިތަކުވެސް ހިމެނެއެވެ.