ސަސްޕެންޑްކޮށްފައިވާ މުވައްޒަފުންނާއި މެދު ހައްލެއް ހޯދުމަށް ސީއެސްސީން ހައިކޯޓަށް!
ސަސްޕެންޝަނުގައި ތިބި ކެންޑިޑޭޓުންގެ ރޯދަމަހުގެ އެލަވަންސާ ގުޅޭގޮތުން ފިނޭންސް މިނިސްޓަރާ ދަނީ މަޝްވަރާ ކުރުމުން
ސިވިލް ސަރވިސް ކޮމިޝަން ރައްޔިތުންގެ މަޖިލީހުގެ ކޮމެޓީގައި
ކައުންސިލް އިންތިހާބަށް ކުރިމަތިލާފައިވާ ސިވިލް ސާރވިސް މުވައްޒަފުންގެ ސަސްޕެންޝަންއާއި މެދު ގޮތެއް ނިންމުމަށް ސިވިލް ސާރވިސް ކޮމިޝަން (ސީއެސްސީން) ހައި ކޯޓަށް މައްސަލަ ހުށަހަޅައިފިއެވެ.
މިކަމާއި ބެހޭ ތަފްސީލް ހާމަކޮށް ސީއެސްސީން ނެރެފައިވާ ނޫސްބަޔާނެއްގައި ބުނެފައިވަނީ، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމާ ގުޅިގެން ސަސްޕެންޑް ކުރެވިފައިވާ ސިވިލް ސަރވިސްގެ މުވައްޒަފުންނަށް ހައްލެއް ހޯދައިދިނުމަށް ކުރާ މަސައްކަތުގެ ތެރެއިން މިކަމަށް ޝަރުޢީ ނިޒާމުގެ ތެރެއިން ހައްލެއް ހޯދޭނެ ޖާގައެއް އޮތްތޯ ބެލުމަށް މައްސަލަ ހައިކޯޓަށްހުށަހަޅާފައިވާކަމަށެވެ. އަދި އިންތިހާބު ފަސްކޮށްފައިވާ މި ދަނޑިވަޅުގައި މުވައްޒަފުންގެ ސަސްޕެންޝަންއާއި މެދު ގޮތެއް ނިންމަވައިދެއްވުމަށް ސީއެސްސީން ވަނީ މައްސަލަ ހުށަހަޅާފައެވެ.
މައްސަލައަށް އަވަސް ހައްލެއް ހޯދޭނެ ގޮތަކީ ކޮބައިތޯ ދެނެގަތުމުގެ ގޮތުން އިލެކްޝަންސް ކޮމިޝަނާއި ފޯނު ކޮންފަރެންސްގެ ޒަރިއްޔާއިން މަޝްވަރާކޮށްފައިވާކަމަށްވެސް ބަޔާނުގައި ވަނީ ބުނެފައެވެ.
ލޯކަލް ކައުންސިލްތަކުގެ އިންތިޚާބުގެ ޤާނޫނުގެ 13 ވަނަ މާއްދާގެ (ހ) ގެ ދަށުން އެ އިންތިޚާބަށް ކުރިމަތިލުމުގެ ސަބަބުން ވަޒީފާއިން ސަސްޕެންޑްވެފައިވާ ސިވިލް ސަރވިސްގެ މުވައްޒަފުން ވަޒީފާއިން ސަސްޕެންޑްވެފައި ހުންނަ މުއްދަތުގެ ތެރޭގައި، އެ މުވައްޒަފުންނަށްސިވިލް ސަރވިސްގެ ވަޒީފާއިން ލިބެމުން އައި މުސާރައާއި އެހެނިހެން އެއްވެސް އިނާޔަތެއް ނުލިބޭނެކަމުގައި އެ މާއްދާގެ (ނ) ގައި ވަނީ ބަޔާންކޮށްފައެވެ.
ވަކި މުއްދަތެއް ނެތްގޮތަށް ދިގު މުއްދަތަކަށް އެ މުވައްޒަފުންނާ ހަވާލުކޮށްފައިވާ މަސައްކަތްތަކުން އެކަހެރިކޮށްފައިވުމުގެ ސަބަބުން ދައުލަތުގެ ފަރާތުން ދިވެހިރައްޔިތުންނަށް ފޯރުކޮށްދޭ ޚިދުމަތްތައްފޯ ރުކޮށްދިނުމުގައި ހުރަސްތަކެއް ކުރިމަތިވާކަމަށް ބަޔާނުގައި ވަނީ ފާހަގަކޮށްފައެވެ.
ކޮވިޑް-19 ރާއްޖެއިން ފެނުމާއެކު، ލޯކަލް ކައުންސިލްތަކުގެ އިންތިހާބު ވަކި މުއްދަތެއް ނެތްގޮތަށް ފަސްކޮށްފައިވާއިރު، ސަރުކާރުގެ ފަރާތުން ވަނީ، "ލޯކަލް ކައުންސިލްތަކުގެ އިންތިހާބުގެ ޚާއްސަ ބިލް 2020"ގެ ނަމުގައި ރައްޔިތުންގެ މަޖިލީހަށް ބިލެއް ހުށަހަޅާފަ އެވެ. އެބިލްގެ މަސައްކަތް ރައްޔިތުންގެ މަޖިލީހުން ކުރަމުންދާއިރު، އެބިލްގައި ބުނެފައިވާ ގޮތުން، އެންމެ ލަސްވެގެންވެސް އަންނަ ޖެނުއަރީ 6 ގެ ކުރިން ލޯކަލް ކައުންސިލްތަކުގެ އިންތިހާބު ބާއްވަންޖެހެއެވެ.
