ހުރި ވަސީލަތްތަކާއެކު، ގޮންޖެހުންތަކުން އަރައިގަތުމަށް ރަނގަޅު މަސައްކަތްތަކެއް ކުރެވޭ: އަމީން
ފަރުވާ އަކީ ގޭގައި މަޑުކުރެއްވުން: އަމީން
ހެލްތް މިނިސްޓަރު އަބްދުﷲ އަމީން
ކޮވިޑް-19 ރާއްޖޭގައި ފެތުރެމުންދާ މި ދަނޑިވަޅުގައި ސިއްހީ ދާއިރާގައި ހުރި ވަސީލަތްތަކާއި، ތައްޔާރީތަކާއި އެކީގައި ގޮންޖެހުމުން އަރައި ގަތުމަށް ރަނގަޅު މަސައްކަތް ކުރެވޭ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެ އެވެ.
ފޯނު މެދުވެރިކޮށް ރާއްޖެ ޓީވީގެ ''60 މިނިޓް'' އަށް ދެއްވި ހާއްސަ އިންޓަވިއުއެއްގައި ހެލްތް މިނިސްޓަރު އަމީން ވިދާޅުވީ، ކޮވިޑް-19 އަށް ޕޮޒިޓިވް ކޭސްއެއް ފެނުމާއިއެކު މި ވަގުތު ހެލްތް މިނިސްޓްރީން އެންމެ ބޮޑު އިސްކަމެއްދެނީ ޓެސްޓު ކުރުމާއި، ހައި ރިސްކު މީހުން އައިޑެންޓިފައި ކުރުމާއިއެކު ޕްރައިމަރީ ކޮންޓެކްޓް ޓެސްޓު ކުރުމުގެ އިތުރުން އަލާމާތްތައް ހުންނަ މީހުން ޓެސްޓުކޮށް އެ ފަރާތްތައް އައިސޮލޭޓް ކުރުމުގެ މަސައްކަތް ކަމަށެވެ.
މިނިސްޓަރު ވިދާޅުވީ، މާލޭގެ އިތުރުން ރާއްޖޭގެ އެކި ހިސާބުތަކުގައި މިހާރަށް ބޭނުންވާ ސިއްހީ ވަސީލަތްތައް ހުންނާނެ ކަމަށާއި، އިތުރު ވަސީލަތްތައްވެސް ގާއިމްކުރަމުންދާ ކަމަށެވެ. ސިއްހީ މާހިރުންގެ އެންމެ ބޮޑު އެއް ކަންބޮޑުވުމަކީ ސިއްހީ ނިޒާމަށް ނުކަތާ ވަރަށް ބަލި ފެތުރިގެން ދިޔުމެވެ.
ކޮވިޑް-19 ބަލި ޖެހޭ މީހުންގެ ތެރެއިން ހާލު ދެރަވާ މީހުންނަށް ފަރުވާ ދިނުމަށް ބޭނުންވާ ވެންޓިލޭޓަރުތަކުގެ ތެރެއިން ބައެއް ވެންޓިލޭޓަރުތައް ވަނީ ރާއްޖެ ގެނެސްފަ އެވެ. ކުރިޔަށް އޮތް ތަނުގައި ރާއްޖެއަށް ގެންނަން ހަމަޖެހިފައިވާ ވެންޓިލޭޓަރު ތަކުގެ ތެރޭގައި، ބައިނަލް އަގްވާމީ ބައެއް ޖަމިއްޔާތަކުން ހަދިޔާކުރާ ވެންޓިލޭޓަރުތައް ވެސް ހިމެނެ އެވެ.
އަމީން ވިދާޅުވީ، މިހާރު ކުރެވޭ މަސައްކަތުގެ އަލީގައި ލޮކްޑައުންއާ ބެހޭ ގޮތްތައް ނިންމަން ޖެހޭ ކަމަށެވެ. މާލެގައި މިހާރު މިއޮތް ލޮކްޑައުންގެ މުއްދަތު ހަމަވާނީ މި މަހުގެ 30 ގަ އެވެ. މިނިސްޓަރު ވިދާޅުވީ، ލޮކްޑައުންއާ ގުޅޭ ގޮތުން ގޮތެއް ނިންމާނީ އެޗްޕީއޭ، ޓެކްނިކަން އެޑްވައިޒަރީ ގްރޫޕްގެ އިތުރުން ކޮވިޑް-19 ޓާސްކް ފޯސްގެ ބޭފުޅުންނާއި މަޝްވަރާ ކުރެއްވުމަށް ފަހު ކަމަށެެވެ.
މިއީ މި ފަހުގެ ތާރީހެއްގައި އާބާދީގައި ލައްކައެއްހާ މީހުން ދިރިއުޅޭ މާލޭގެ މީހުން ގޭގައި މަޑުކުރަން ޖެހުނު ފުރަތަމަ ފަހަރެވެ. ގޭގައި މަޑުކުރުމަކީ އުނދަގޫ ކަމެއްކަން ފާހަގަކުރައްވަމުން އަމީން ވިދާޅުވީ، މީގެ ސަބަބުން ވަރަށް ގިނަ ދަތިތަކާއި ދިމާވާނެ ކަމަށް ގަބޫލްކުރައްވާ ކަމަށެވެ.
އަމީން ބަރުއަޅުއްވަނީ ހުރިހާ ފަރާތްތަކަކުންވެސް ޒަރޫރީ ބޭނުމެއްގައި ނޫން ގޮތަކަށް ގެއިން ބޭރަށް ނުނިކުތުމަށެވެ. އަދި ގެއިން ބޭރަށް ނިކުންނައިރުވެސް ރައްކާތެރިކަމާއި އެކު އަޅަން ޖެހޭ ފިޔަވަޅުތައް އެޅުން މުހިއްމު ކަމުގައި މިނިސްޓަރު ފާހަގަކުރެއްވިއެވެ.
