ތިން ކޭސްއަކާއި ގުޅުންހުރި 140 ކޮންޓެކްޓެއް!
21 އެޕްރީލު 2020 | އަންގާރަ 18:03ޖުމްލަ 1545 މީހުން ކޮންޓެކްޓް ޓްރޭސިންގ ގައި ފާހަގަކުރެވިފައިވޭ
މ. ޖަރީމާގެ ހުންނަ ސަރަހައްދު، މާލެއިން ކޮވިޑް-19ގެ ފުރަތަމަ ކޭސް ފެނުނު ދުވަހު
އަންގާރަ ދުވަހު ފެނުނު ތިން ކޭސްއަކާއި ގުޅުންހުރި 140 ކޮންޓެކްޓްސް ފާހަގަކުރެވިފައިވާ ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ން ބުނެފިއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓެކްނިކަލް އެޑްވައިޒަރީ ޓީމުގެ ޑރ. އިބްރާހިމް އަފްޒަލް ވިދާޅުވީ ކޭސް 76، 77 78 އާއި ގުޅުން ހުރި ދެ ހަބެއް ފާހަގަކުރެވިފައިވާ ކަމަށެވެ. އަދި އެ ހަބުތަކުގައި 50 އާއި 140 މީހުން އުޅެމުންދާ ކަމަށެވެ.
އެންމެފަހުގެ މައުލޫމާތުތައް ހިއްސާ ކުރަމުން އެންއީއޯސީގެ ތަރުޖަމާން މަބްރޫކް އަޒީޒް ވިދާޅުވީ 1545 މީހުން ކޮންޓެކްޓް ޓްރޭސިންގ ގައި ފާހަގަކުރެވިފައިވާކަމަށެވެ. ޖުމްލަ 193 ތަނެއް މޮނީޓަރިންގެ ހާލަތުގައި އޮތް އިރު އަންގާރަ ދުވަހު އެކަނި 43 ބިލްޑިންގ އެއް މޮނިޓަރިންގެ ހާލަތަށް ގެނެސްފައިވާކަމަށެވެ.
