ފްލޫ ކުލިނިކްތަކަށް ފާއިތުވި 24 ގަޑިއިރު 191 މީހަކު ދެއްކި
ރާއްޖޭގައި މިހާތަނަށް 26 ފްލޫ ކްލިނިކް ވަނީ ހުޅުވާފައި
ފްލޫ ކްލިނިކް
ރާއްޖޭގެ އެކި ކަންކޮޅުތަކުގައި މިވަގުތު ހުރި ކްލިނިކްތަކަށް ފާއިތުވި 24 ގަޑިއިރުތެރޭގައި 191 މީހަކު ދައްކާފައިވާކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ކޮވިޑް-19 ގެ އެންމެ ފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ މިވަގުތު ރާއްޖޭގައި 26 ފްލޫ ކުލިނިކެއް އެބަހުރި ކަމަށެވެ. ކޮވިޑް-19 މާލެތެރޭގައި ފެތުރެން ފެށުމާއެކު ގިނަ އަދަދެއްގެ ބަޔަކު ފްލޫ ކުލިނިކްތަކަށް ދައްކަން ފަށާފައިވާކަމަށް ހެލްތު ޕްރޮޓެކްޝަން އެޖެންސީގެ ޑޮކްޓަރ އިބްރާހިމް އަފްޒަލް ވަނީ ވިދާޅުވެފަ އެވެ.
ކޮވިޑް-19 އާ ގުޅިގެން ރާއްޖޭގެ އެކި ހިސާބުތަކުގައި ފްލޫ ކުލިނިކްތައް ހެދިފައިވާއިރު ބަލީގެ އަލާމާތެއް ހުންނަނަމަ އެތަންތަނަށް ދެއްކުމަށް އެޗްޕީއޭއިން ވަނީ އިރުޝާދު ދީފަ އެވެ. ފްލޫ ކްލިނިކްތަކަށް ދައްކަންދާ މީހުން ކޮވިޑް-19 އަށް ޕޮޒިޓިވް ވަމުންދާތީ ފްލޫ ކްލިނިކަށް ދައްކާ ހުރިހާ އެންމެން މިބައްޔަށް ޓެސްޓް ކުރުމަށް މިހާރު ވަނީ ނިންމާފަ އެވެ.
މާލެއިން އެންމެ ފުރަތަމަ ޕޮޒިޓިވްވި ދިވެހި އަންހެން މީހާއަށްވެސް ބަލި ޖެހިފައި ހުރިކަން އެނގިފައިވަނީ ފްލޫ ކްލިނިކަށް ދައްކަން ދިޔުމުން ޓެސްޓު ހެދުމުންނެވެ.
ރާއްޖެއިން މިހާތަނަށް މިވައިރަސް އަށް 84 މީހަކު ވަނީ ޕޮޒިޓިވްވެފައެވެ.
