އަންނަ ރަމަޟާން މަހު ހަރަމްފުޅުގައި އިއުތިކާފުކުރުން މަނާ

އަންނަ ރަމަޟާން މަހު ޙަރަމްފުޅުގައި އިއުތިކާފުކުރުން މަނާކޮށްފިއެވެ.

ސައުދީޢަަބިއްޔާގެ ރަސްކަމުގެ ދަރުބާރުން ނިންމާފައިވަނީ މައްކާގައި ހުންނަ މަސްޖިދުލްޙަަރަމްއާއި، މަދީނާގައި ހުންނަ މަސްޖިދުއްނަބަވީގައި މިއަހަރުގެ ރަމަޟާންމަހު އިއުތިކާފުކުރުން ވަގުތީގޮތުން މެދުކަނޑާލިކަން އިޢުލާނުކޮށްފައެވެ. ސައުދީއަރަބިއްޔާގެ "ޖެނެރަލް ޕްރެސިޑެންސސީ ފޮރ ދަ އެފެއަރޒް އޮފް ސަ ޓޫ ހޮލީ މޮސްކް" ގެ ރަސްމީ ޓްވިޓަރގައި ބުނެފައިވަނީ ރަސްކަމުގެ ދަރުބާރުން އެގޮތައް ނިންމެވީ، މިހާރު ފެތިރެމުންދާ ކޮވިޑް-19 ރޯގާއިން މިންޖުވުމަށް އެޅޮ ސަލާމަތާއި ރައްކާތެރިކަމުގެ ފިޔަވަޅެއްގެ ގޮތުން ކަމަށެވެ.

ރަސްކަމުގެ ދަރުބާރުގެ އިސްވެރިޔާ ޝައިޚް ޢަބްދުއްރަޙްމާން އަލް-ސުދައިސްއާއި ޙަވާލާދީ ގަލްފުގެ ނޫސްތަކުން ޚަބަރުފަތުރާގޮތުގައި، އަންނަ ރަމަޟާންމަހުގެ މި ދެތަނުގައި ފަރްޟު ފަސް ނަމާދުކުރުމާއި، ތަރާވީޙް ނަމާދު ކުރުމާއި، އިއުތިކާފުކުރުމާއި، ރޯދަވީއްލުންވެސް މަނާވާނެއެވެ. މިގޮތަށް ނިންމެވީ އަޅުވެރިންނާއި، ސައުދީއަރަބިއްޔާއަށް ޒިޔާރަތްކުރާ ފަރާތްތަކުގެ އާއްމު ޞިއްޙީ ރައްކާތެރިކަމަށްޓަކައި ކަމަށް އަލް-ސުދައިސް ވިދާޅުވެފައިވެއެެވެ. އެހެންނަމަވެސް، މީގެއިން ގެފުޅު ބަލަހައްޓާ ފަރާތްތަކާއި، ރިޔާސީ މަސްއޫލުވެރިންނާއި، ގެފުޅާއި ހަރަމްފުޅު ސްޓެރެލަިޒްކުރާ ފަރާތްތައް އިސްތިޘްނާވާނެކަމަށްވެސް އަލް-ސުދައިސް ވިދާޅުވެފައިވެއެވެ.

ދެހަރަމްފުޅުގައި ރަމަޟާންމަހު ތަރާވީޙު ނަމާދު ކުރުކޮށް ކުރިޔަށް ގެންދާނީ 10 ރަކުޢަތްކަމަށާއި، އަދި ފަތިސްނާމާދުގައި ޤުނޫތުގެ ބަދަލުގައި ކިޔާނީ ކޮވިޑްގެ ބަލިމަޑުކަމުން އަރައިގަތުމަށް އެދިކުރާ ދުޢާއެއްގެ ގޮތުގައި ރަސްކަމުގެ ދަރުބާރުން ވަނީ ނިންމާފައެވެ. އަދި އެއްވެސް ޙާލަތެއްގައި ދެ ޙަރަމްފުޅަށް މީހަކު ވަންނަނަމަ، ސްކްރީންކުރާނެކަމަށް ބުނެފައިވެއެވެ.

މާތްވެގެންވާ ދެ ޙަރަމްފުޅަށް ޒިޔާރަތްކުރާ ފަރާތްތައް ކޮވިޑް-19 އިން ރައްކާތެރިކުރުމަށް، ގިނަ ފިޔަވަޅުތަކެއް ސައުދީ ސަރުކާރުން އަޅާފައިވެއެވެ. އޭގެ ތެރޭގައި ކޮންމެ ދުވަހަކު ޑިސްއިންފެކްޓްކުރުމާއި، އަދި އެމުޤައްދަސް ބިނާތަކައް ވަންނަ މީހުންގެ ހަށިގަނޑުގެ ފިނިހޫނުމިން ބެލުމަށް ތަރމަލް ބޮޑީ ސްކޭނަރަ ހަރުކުރެވިފައިވެއެވެ. މިއީ ރިއަލް ޓައިމްގައި މީހާގެ ޑާޓާއައި ވީޑިއޯ ރިކޯޑް ކުރެވޭ ގޮތައް ފަރުމާކޮށްފައިވާ ސްކޭނަރއެއްކަމަށްވެއެވެ.

ކޮންމެ އަހަރެއްގެ ރަމަޟާންމަހު ދުނިޔޭގެ އެކި ކަންކޮޅުތަކުން އުމުރާގެ އަޅުކަން އަދާކުރުމަށާއި އިއުތިކާފުކުރުމަށް އެއްމިލިޔަނަށްވުރެ ގިނަ މީހުން ސައުދީޢަރަބިއްޔާއަށް ޒިޔާރަތްކުރެއެވެ. ސައުދީ ސަރުކާރުން މިއަހަރު އެއްވެސް ޤައުމަކުން އެޤައުމަށް މީހުން އެތެރެނުކުރުމަށް ވަނީ ނިންމާފައެވެ. އަދި އެޤައުމުގެ ދީނީ ޢީލްމުވެރިން ވަނީ ގޭގައި ތިބެގެން ނަމާދާއި އެހެނިހެން އަޅުކަން ކުރުމަށް އިލްތިމާސްކުރައްވާފައެވެ. ރަސޫލާގެ ޙަދީޘްތަކާއި ސުންނަތައް ރިޢާޔަތްކުރައްވާ ދީނީ ޢިލްމުވެރިން ގެންދަވަނީ މި ދަނށިވަޅުގައި މުސްލިމް ޢުއްމަތުން ޢަމަލުކުރަންވާ ގޮތް ހާމަކުރައްވައި އިލްތިމާސްކުރައްވަމުންނެވެ.

ސައުދީ ސަރުކާރުން ވަނީ މިއަހަރުގެ ޙައްޖުގެ އިންތިޒާމުތައްވެސް މަޑުޖައްސާލުމަށް މުސްލިމް އަރަބި ޤައުމުތަކައް އަންގާފައެވެ. މިއަހަރު ޙައްޖުގެ އަޅުކަން ކެންސަލްކޮށްފިނަމަވެގެންދާނީ ރަސޫލާ ޙައްޖަތުލް ވަދާޢުގެ ފަހުން ޙައްޖުގެ މަތިވެރި އަޅުކަން ކެންސަލް ކުރި 41 ވަނަ ފަހަރަށެވެ. މީގެކުރިން 40 ފަހަރެއްގެ މަތިން ޙައްޖުގެ އަޅުކަން ކެންސަލްކޮށްފައިވެއެވެ. މީގެތެރޭގައި ގިނައީ ބަލިމަޑުކަމާހުރެ ކެންސަލް ކުރެވުނު ފަހަރުކަން ފާހަގަކޮށްލެވެއެވެ.