ކޮންޓެކްޓް ޓްރޭސިންގގެ ތެރެއިން 1370 މީހުން ދެނެގަނެވިފައިވޭ: މަބްރޫކް
190 އިމާރާތް މޮނީޓަރިންގގެ ހާލަތަށް ގެނެވިފައިވޭ
ޓާސްކް ފޯހުގެ ތަރުޖަމާނު މަބްރޫކު އަޒީޒް
ކޮންޓެކްޓް ޓްރޭސިންގެ ތެރެއިން 1370 މީހުން، މިހާތަނަށް ދެނެގަނެވިފައިވާކަމަށް، ކޮވިޑް-19 ޓާސްކް ފޯހުގެ ތަރުޖަމާނު މަބްރޫކު އަޒީޒް ވިދާޅުވެއްޖެއެވެ.
އަންގާރަ ދުވަހު ނެޝެނަލް އެމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ ކޮންޓެކްޓް ޓްރޭސިންގގެ މަސައްކަތް ކުރިއަށްދާއިރު 190 އިމާރާތް މޮނީޓަރިންގެ ހާލަތަށް ގެނެވިފައިވެއެވެ. އަދި ހޯމަ ދުވަހު އެކަނި 40 އިމާރާތެއް މޮނީޓަރިންގެ ހާލަތަށް ގެނެފައިވާކަމަށްވެސް މަބްރޫކް ވިދާޅުވިއެވެ.
138 މީހަކު މިހާރު އައިސޮލޭޝަންގައި ތިބިއިރު، 1286 މީހުން ކަރަންޓީން ފެސިލިޓީތަކުގައިވެސް އެބަތިބި އެވެ. މި ވައިރަސް ދެނެގަތުމަށް މިހާތަނަށް 4382 ސާމްޕަލް ނެގިފައިވާއިރު، 4041 ސާމްޕަލެއްގެ ނަތީޖާ ވަނީ ނެގެޓިވްވެފައެވެ. އަދި ނަތީޖާ ނުލިބިވާ 259 އެބަހުރިކަމަށްވެސް މަބްރޫކް ވަނީ ވިދާޅުވެފައެވެ.
ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވެފައިވާ 83 މީހުން ވަނީ ފެނިފައެވެ.
