ކުޅުދުއްފުށި ވެސް ލޮކްޑައުނަށް
21 އެޕްރީލު 2020 | އަންގާރަ 07:10ކުޅުދުއްފުށި ސިޓީ ލޮކްޑައުންކުރުމަށް ނިންމީ އެރަށުގައި މިހާރު ރާއްޖޭގައި ޕޮޒިޓިވްވެފައިވާ މީހަކާއި ކްލޯޒް ކޮންޓެކްޓެއް އުޅެމުންދާތީ
ކުޅުދުއްފުށިސިޓީ
ކޮވިޑް-19 އަށް ފެތުރުން ކޮންޓްރޯލްކުރުމަށްޓަކައި ކުޅުދުއްފުށި ސިޓީ އަންގާރަ ދުވަހުގެ މެންދުރު 12 ން ފެށިގެން ތިން ދުވަހުގެ މުއްދަތަށް ލޮކްޑައުންކުރުމަށް ނިންމައިފި އެވެ.
ކުޅުދުއްފުށި ސިޓީ ކައުންސިލްގެ ރައީސް އަބްދުއް ލަތީފް ހަސަން "ރާއްޖެ އެމްވީ" އަށް އެ ކަމާ ގުޅޭ މައުލޫމާތު ދެއްވަމުން ވިދާޅުވީ ކުޅުދުއްފުށި ސިޓީ ލޮކްޑައުންކުރުމަށް ނިންމީ އެރަށުގައި މިހާރު ރާއްޖޭގައި ޕޮޒިޓިވްވެފައިވާ މީހަކާއި ކްލޯޒް ކޮންޓެކްޓެއް އުޅެމުންދާތީކަމަށެވެ. އަދި މިނިންމުން ނިންމީ ރައްކާތެރިކަމުގެ ގޮތުން އެރަށުގެ ޓާސްކް ފޯހުންކަމަށް އަބްދުއް ލަތީފް ވިދާޅުވި އެވެ.
އަދި މިހާރު ކްލޯޒް ކޮންޓެކްޓްވި މީހާ ހުރީ ހޯމް އައިސޮލޭޝަންގައި ކަމަށާއި ނަމަވެސް އެމީހާ މީގެކުރިން މާލެއިން ކުޅުދުއްފުއްޓަށް އައިސް ރަށުތެރޭގައި އުޅެފައިވާކަމަށް އަބްދުއް ލަތީފް ހަސަން ވިދާޅުވި އެވެ. އެމީހާ މާލެއިން ކުޅުދުއްފުއްޓަށް އައިސްފައިވަނީ 337 މީހުންނާއެކު ކަނޑުބޯޓެއްގައި މިމަހުގެ 14 ވަނަ ދުވަހު ކަމަށްވެސް އަބްދުއް ލަތީފް ހަސަން ވިދާޅުވި އެވެ.
ކުޅުދުއްފުށި ސިޓީ ލޮކްޑައުން ކުރުމަށް ނިންމި ނިންމުމުގެ އިތުރު ތަފްސީލް ދެއްވަމުން އެސިޓީގެ ޓާސްކް ފޯހުގައި އިސްކޮށް އުޅުއްވާ އަދި ކުޅުދުއްފުށި ހޮސްޕިޓަލްގެ މެނޭޖަރ އަހުމަދު ދާޢޫދު ވިދާޅުވީ މިނިންމުން ނިންމީ ހއ އުލިގަމުން ޕޮޒިޓިވްވި މީހާއާއެކު ކުޅުދުއްފުށީގައި މިވަގުތު ހުރި މީހާ މާލޭގައި ހުރިއިރު ރޫމް ޝެއަރ ކޮށްފައިވާތީ ކަމަށެވެ. އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން މިފިޔަވަޅު އެޅުއްވީކަމަށް ދާޢޫދު ވިދާޅުވި އެވެ.
އުލިގަމުން މީހަކު ކޮވިޑް-19 އަށް ޕޮޒިޓިވް ވުމާ ގުޅިގެން އެރަށް އޮތީ ލޮކްޑައުން ކޮށްފައެވެ. އުލިގަމުން ޕޮޒިޓިވްވި މީހާގެ 131 ކޮންޓެކްޓުން ހޯދިފައިވާކަމަށް ނޭޝަނަލް އިމަޖެންސީ އޮޕަރޭޝަން ސެންޓަރުން ވަނީ ބުނެފަ އެވެ.
އޭނާއަކީ މި މަހުގެ 15 ވަނަ ދުވަހު މާލެއިން ފުރި ކަނޑުބޯޓެއްގައި އުލަގަމަށް ދިޔަ މީހެކެވެ. އޭނާ ބައްޔަށް ޕޮޒިޓިވްވުމާ ގުޅިގެން، އުލިގަމާއެކު އެ ބޯޓުން މީހުން ފޭބި ރަށްތައް ވެސް މިހާރު ވަނީ މޮނިޓަރިންގެ ހާލަތަށް ގެނެސްފަ އެވެ.
ކުޅުދުއްފުށި ސިޓީ ލޮކްޑައުންކުރުމަށް ނިންމުމާއެކު މިއީ ރާއްޖޭގެ ރަށެއްގައި ހަރަކާތްތެރިިވާ ޓާސްކް ފޯހަކުން ރަށެއް ލޮކްޑައުން ކުރަން ނިންމި ފުރަތަމަ ނިންމުމެވެ. އަބްދުއް ލަތީފް ވިދާޅުވީ ލޮކްޑައުން ކުރުމުން ރައްޔިތުންނަށް ދަތިތަކެއް ކުރިމަތިވާނެކަން އެނގޭ ކަމަށާއި އެހެން ނަމަވެސް މިއީ ހުރިހާ ރައްޔިތުންގެ ރައްކާތެެރިކަމަށް އެޅަން ޖެހޭ ފިޔަވަޅެއް ކަމަށެވެ.
އަންގާރަ ދުވަހުގެ މެންދުރާ ހަމައަށް އާއިރު ރާއްޖެއިން 82 މީހަކު ވަނީ ޕޮޒިޓިވްވެފަ އެވެ.
