ކޮމިއުނިޓީ ސްޕްރެޑެއް އުޅޭތާ ތިން ހަފްތާވެދާނެ: ޑރ. ނަޒްލާ
20 އެޕްރީލު 2020 | ހޯމަ 18:14މާލެއިން ފުރަތަމަ ކޭސްއެއް ފެނުނީ 15 ވަނަ ދުވަހު
ޑރ. ނަޒްލާ މުސްތަފާ ނޫސްވެރިންނަށް މައުލޫމާތު ދެއްވަނީ
ރާއްޖޭގައި ކޮވިޑް-19 ގެ ކޮމިއުނިޓީ ސްޕްރެޑެއް އުޅޭތާ ތިން ހަފްތާވެދާނެކަމަށް ޓެކްނިކަލް އެޑްވައިޒަރީ ގްރޫޕް (ޓެގް) ގައި ހިމެނި ވަޑައިގަންނަވާ ޑރ. ނަޒްލާ މުސްތަފާ ވިދާޅުވެއްޖެއެވެ.
މާލެއިން ފުރަތަމަ ފަހަރަށް ކޮވިޑް-19 އަށް މީހަކު ޕޮޒިޓިވްވެފައިވަނީ މި މަހުގެ 15 ވަނަ ދުވަހުއެވެ. އެ ކޭހާއިއަކު މާލެއިން ކޭސްތައް ފެންނަ އަދަދުތައް ދަނީ ގިނަވަމުންނެވެ.
ހޯމަ ދުވަހު ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ މުސްތަފާ ވިދާޅުވީ، މާލެއިން ކޮވިޑް-19 ގެ ކޭސްއެއް ފެނިފައިވަނީ ކޮމިއުނިޓީ ޓްރާންސްމިޝަން އެއް އުޅޭތޯ ބެލުމަށް ފްލޫ ކްލިނިކްތަކުގައި ޓެސްޓުކުރާ އަދަދު އިތުރު ކުރުމާއި އެކު ކަމަށެވެ.
ޑރ. ނަޒްލާ ވިދާޅުވީ، އައިސީޔޫގައި ފަރުވާ ހޯދަމުންދާ ފަރާތްތަކުގެ ސާމްޕަލްތައް ނަގައިގެން ކުރިޔަށް ގެންދިޔަ ކަމަށާއި، އެކަމަކު އޭޕްރީލް 15 ގެ ކުރިން ކޮވިޑް-19 ގެ އެއްވެސް ކޭސްއެއް ހޯދިފައިނުވާ ކަމަށެވެ.
ކޮވިޑް-19 ގެ 80 ޕަސެންޓް ބަލި ޖެހޭ މީހުންނަކީ އެއްވެސް ގޮތަކަށް ބަލީގެ އަލާމާތްތައް ނުފެންނަ މީހުންނެވެ. އަދި 20 ޕަސެންޓަކީ ބަލީގައި ބޮޑުވަރުވާ މީހުންނެވެ. ބަލިޖެހޭ މީހުންގެ ތެރެއިން ހާލު ދެރަވަނީ 30 އިންސައްތަ މީހުންނެވެ.
މާލޭގައި ކޮމިއުނިޓީ ސްޕްރެޑެއް އުޅޭ ކަމަށް އެޗްޕީއޭއިން ބުނެފައިވަނީ މާލެއިން ކޭސްއެއް ފެނުމާއި ގުޅިގެން މާލެ ލޮކްޑައުން ކުރި ހިސާބުންނެވެ. މާލެ ތެރެއިން ކޭސްއެއް ފެނުމުގެ ކުރިން އެޗްޕީއޭއިން ވަނީ ކޮމިއުނިޓީ ސްޕްރެޑް އުޅޭތޯ ބެލުމަށް ސަރވޭ އެއް ފަށާފައެވެ. އެ ސަރވޭގައި މާލޭގެ އިތުރުން ރާއްޖޭގެ އެކި ސަރަހައްދުތަކުން ސާމްޕަލްތައް ނެގިއެވެ.
