ހޯމަ ދުވަހުގެ ހަވީރު ބަންގްލާދޭޝްގެ މެޑިކަލް ޓީމު ރާއްޖެ އަންނާނެ

ހޯމަ ދުވަހުގެ ހަވީރު ބަންގްލާދޭޝްގެ މެޑިކަލް ޓީމު ރާއްޖެ އަންނާނެ ކަމަށް ސަރުކާރުން ބުނެފިއެވެ.

މި ޓީމު އައުމަށް ހޯމަ ދުވަހުގެ ހަވީރު ހަމަޖެހިފައިވަނީ 04:30 ގައެވެ. މެޑިކަލް ޓީމުގެ އިތުރުން މި ފްލައިޓުން 81 ދިވެހިން އައުމަށް ވަނީ ހަމަޖެހިފައެވެ. އޭގެ ތެރޭގައި ނޭޕާލުން އަންނަ 18 ދިވެހި ކިޔަވާ ކުދިންނާއި ބަންގްލަދޭޝުން އަންނަ 53 ދިވެހި ކިޔަވާ ކުދިން ހިމެނޭ ކަމަށް ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވިއެވެ.

ރާއްޖެއަށް އަންނަ ބަންގްލަދޭޝްގެ މި ފްލައިޓުން ބަންގްލަދޭޝްގެ 70 މީހަކު އަނބުރާ އެޤައުމަށް ގެންދާނެކަމަށް ސަރުކާރުގެ ފަރާތުން ވަނީ ބުނެފައެވެ.

ޤަވާޢިދާ ޚިލާފަށް ރާއްޖޭގައި އުޅޭ ބަންގްލަދޭޝްގެ ބައެއް ރައްޔިތުން އަނބުރާ އެގައުމަށް ގެންދިޔުމަށް، ބަންގްލަދޭޝްގެ ސަރުކާރުގެ އެހީތެރި ކަމަށް ފޮރިން މިނިސްޓަރ ޝާހިދު ވަނީ އެގައުމުގެ ފޮރިން މިނިސްޓަރު އޭ.ކޭ އަބްދުލް މޮމެންގެ އަރިހުން މީގެ ކުރިން އެދިވަޑައިގެންފައެވެ.

އެގޮތުން މިދިޔަ ދެ ހަފްތާގެ ތެރޭގައި މިނިސްޓަރ ޝާހިދު ވަނީ ދެ ފަހަރެއްގެ މަތިން ބަންގްލަދޭޝްގެ ފޮރިން މިނިސްޓަރާ ފޯނުން ގުޅުއްވައި މަޝްވަރާ ކުރައްވާފައެވެ.