ދޮގު މައުލޫމާތު ފަތުރާ މީހުންނާމެދު ފިޔަވަޅު އަޅާނަން: ޕޮލިސް ކޮމިޝަނަރ
20 އެޕްރީލު 2020 | ހޯމަ 10:22މީސްމީހުންގެ ޒާތީ މައުލޫމާތު ހާމަކޮށް، ދޮގު މައުލޫމާތު ހާމަ ނުކުރުމަށް ކަމާބެހޭ ފަރާތްތަކުން ވަނީ އެދިފަ
ކޮމިޝަނަރ އޮފް ޕޮލިސް މުހައްމަދު ހަމީދު
rރާއްޖޭގައި ކޮވިޑް-19 ފެތުރެމުންދާ މިދަނޑިވަޅުގައި ދޮގު މައުލޫމާތު ފަތުރާ މީހުންނާމެދު ފިޔަވަޅު އަޅާނެ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
ޕޮލިސް ކޮމިޝަނަރ ހަމީދު ހޯމަ ދުވަހު ކުރެއްވި ޓްވީޓެއްގައި ވިދާޅުވެފައިވަނީ މުޖުތަމައުގައި ބިރުވެރިކަމާއި ނުތަނަވަސްކަން އުފެދޭ ވާހަކަ ނުފެތުރުމަށާއި ހުރިހާ ފަރާތްތަކުން ވެސް މިފަދަ ކަންކަމުން ދުރުހެލިވުން އެދޭ ކަމަށެވެ.
މީގެއިތުރުން ހަމީދު ކުރެއްވި އެހެން ޓްވީޓެއްގައި ވިދާޅުވެފައިވަނީ ކޮވިޑާއި ގުޅިގެން ވަކިވަކި ފަރާތްތަކާ ގުޅޭގޮތުން ދޮގު ވާހަކަތައް ފަތުރައި އަބުރު ނަގާލުމަށް މަސައްކަތް ކުރާ ފަރާތްތަކާމެދު ވެސް ފިޔަވަޅު އަޅާނެ ކަމަށެވެ،
ކޮވިޑް-19 އާ ގުޅިގެން ބައެއް ފަރާތްތަކުން ދަނީ ދޮގު މައުލޫމާތާއި ކޮވިޑް-19 ޖެހިފައިވާ ކަމަށްބުނެ، ބައެއް ފަރާތްތަކުގެ ފޮޓޯއާއި ބައެއް މީހުންގެ ޒާތީ މައުލޫމާތުވެސް ފަތުރަމުން ނެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ މެޑިކަލް އޮފިސަރު ޑޮކްޓަރު ޑރ. ނަޒްލާ ރަފީގް ވެސް ވަނީ، މި ދަނޑިވަޅުގައި ރަނގަޅު މައުލޫމާތު ހިއްސާ ކުރުމަކީ ވަރަށް މުހިއްމު ކަމެއް ކަމަށާއި ހީވާ ހީވުމަކަށް އެއްޗެހި ނުލިޔުމަށް އެދިވަޑައިގަންނަވާފަ އެވެ. އަދި މިހާރު ވެސް ޕޮޒިޓިވް ވެފައިވާ މީހުންގެ ފޮޓޯތަކާއި އަދި ކަމާ ނުވެސް ގުޅޭ މީހުންގެ ފޮޓޯތައް ވެސް އާއްމުކޮށްފައި ހުންނަތަން ފެންނަ ކަމަށް އޭނާ ވިދާޅުވިއެވެ.
