މި އަހަރުގެ ރަމަޟާން މަސް ދިމާވަނީ މުޅި ދުނިޔެ ބޮޑު ބަލިމަޑުކަމެއްގެ ތެރޭގައި އޮއްވާ ކަމަށް ވުމާއެކު، މިފަދަ ހާލަތެއްގައި ރޯދައިގެ އަޅުކަން އަދާ ކުރުމުގައި ސިއްހީ ގޮތުން ސަމާލުކަން ދޭން ޖެހޭ ކަންކަން ހިމެނޭ ގައިޑްލަން އެއް ދުނިޔޭގެ ސިއްހަތު ޖަމްއިއްޔާ (ޑަބްލިޔު.އެޗް.އޯ) އިން ނެރެފިއެވެ.

"ސޭފް ރަމަޟާން ޕްރެކްޓިސަސް އިން ދަ ކޮންޓެކްސްޓް އޮފް ކޮވިޑް-19" ގެ ނަން ދީފައިވާ މި ގައިޑްލައިން ވަނީ ރޯދައިގެ އަޅުކަން އަދާ ކުރުމުގައި ސިއްހީ ގޮތުން ސަމާލުވާން ޖެހޭ ކަންކަން ފާހަގަ ކޮށްފައެވެ.

މި ގޮތުން ގައިޑްލައިންގައި، ގައި ދުރުކަން ބެހެއްޓުމަށް ވަރަށް ބޮޑަށް ބާރު އަޅާ ގޮވާލާފައިވެއެވެ. ޑަބްލިޔު.އެޗް.އޯ އިން ބުނީ އެންމެ ކުޑަވެގެން 1 މީޓަރު (ނުވަތަ 3 ފޫޓު) ދެ މީހުންގެ ދޭތެރޭގައި ބަހައްޓަން ޖެހޭނެ ކަމަށެވެ.

ޑަބްލިޔު.އެޗް.އޯ ގެ ގައިޑްލައިންގައި ބުނެފައިވަނީ އަތާ އަތްޖޯޑުކޮށް ސަލާން ކުރުމުގެ ބަދަލުގައި، މިހާލަތުގައި އެދެވިގެންވަނީ އަތުން އިޝާރާތް ކޮށްލުން ނުވަތަ މޭމަތީގައި އަތް ޖައްސާލުން ފަދަ ގޮތަކަށް ސަލާން ކުރުމަށެވެ.

ކޮރޯނާވައިރަސް އާއްމުކޮށް ފެތުރެނީ ގައިގޯޅިވެ އުޅުމުންނާއި ވައިރަސް ހޭކިފައިވާ ތަނެއްގައި ޖެހުމުގެ ސަބަބުން ކަމަށް މާހިރުން އަންނަނީ ބުނަމުންނެވެ.

ޑަބްލިޔު.އެޗް.އޯ އިން ބުނެފައިވަނީ، މީހުން އެއްވެ ކުރަންޖެހޭ ކަންކަން އެނޫން ގޮތަކަށް ކުރިއަށް ގެންދެވޭތޯ ސީރިއަސް ކޮށް ބަލަންޖެހޭ ކަމަށާއި، ޖަމާއަތުގައި ކުރުން މި ދުވަސްވަރަށް ނޭދެވޭ ކަންކަން ކުރިއަށް ގެންދިއުމުގައި ޓީވީ، ރޭޑިއޯ އަދި މި ނޫންވެސް ޑިޖިޓަލް ޕްލެޓްފޯމްތައް ބޭނުން ކުރެވިދާނެ ކަމަށް ވެސް ބުނެފައިވެއެވެ.

ބަލިން ރައްކާތެރިވުމަށް ގައިދުރުކަން ބެހެއްޓުމާ ބެހޭ ގޮތުން ސަރުކާރުގެ ކަމާބެހޭ އިދާރާތަކުން ދޭ އިރުޝާދަށް ފުރިހަމަ އަށް ބޯލެނބުމަށްވެސް މި ގައިޑްލައިންގައި ގޮވާލާފައިވެއެވެ.

ޑަބްލިޔު.އެޗް.އޯގެ ގައިޑްލައިންގައި ބުނެފައިވަނީ، ރޯދައަށް ހިފުމާއި، ބަލި ޖެހުމާ ހުރި ގުޅުން އެނގޭނެ އިލްމީ ދިރާސާއެއް އަދި ކުރެވިފައި ނެތް ކަމަށެވެ.