ލޮކްޑައުން ނިމެންދެން ރާއްޖެޓީވީއަށް އާއްމުކޮށް ނުވަދެވޭ ގޮތައް ބަންދުކޮށް، މުވައްޒަފުން ތިބޭނީ ސްޓޭޝަންގައި
ލޮކްޑައުން ހާލަތު އުވާލަންދެން ބައެއް މުވައްޒަފުން ތިބޭނީ ސްޓޭޝަންގައި
ރާއްޖެޓީވީ- ރާއްޖޭގެ ފުރަތަމަ 24 ގަޑީއިރުގެ ޚިދުމަތް ދޭން ފެށި ޓީވީ ސްޓޭޝަން
ކޮވިޑް-19 އާއި ގުޅިގެން މާލެސިޓީގައި އިއުލާން ކޮށްފައިވާ ލޮކްޑައުން ހާލަތު ނިމެންދެން، ރާއްޖެޓީވީގެ ބައެއް މުވައްޒަފުން ރާއްޖެޓީވީ ހިނގަމުންދާ އިމާރާތުގައި ތިބުމަށް ނިންމައިފިއެވެ.
މި ގޮތުން އާދިއްތަ ދުވަހުގެ ރެއިން ފެށިގެން މުވައްޒަފުން ވަނީ އިމާރާތުގައި ސްޓޭޝަން ވެފައެވެ.
މިކަމާއި ގުޅިގެން ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދު ވިދާޅުވީ، ހާލަތު ބަދަލު ވަމުން ދާލެއް އަވަސް ވުމާއެކު، މި ފިޔަވަޅު އަޅަން ނިންމީ އެކި އެކި ސަރަހައްދުތައް ބަންދު ކުރަމުން ދިއުމާއެކު، އެކަންކަމާ ގުޅިގެން ރާއްޖެޓީވީގެ ނޫސްވެރިން ރައްޔިތުންނަށް މި މުހިންމު ދަނޑިވަޅުގައި ދެމުންދާ ޚިދުމަތައް ބުރުލެއް އެރިޔަ ނުދިނުމާއެކު، މުވައްޒަފުންގެ ސަލާމަތާ ރައްކާތެރި ކަމުގެ ގޮތުން ކަމުގައެވެ.
މިގޮތުން ލޮކްޑައުންގެ މުއްދަތު ނިމެންދެން ސްޓޭޝަންގައި ތިބޭ މުވައްޒަފުން ނޫން މުވައްޒަފުން މަސައްކަތް ކުރަމުންދާނީ ގޭގައި ތިބެގެންނެވެ.
ލޮކްޑައުންގެ ހާލަތު ނިމެންދެން ރާއްޖެޓީވީގެ އިމާރާތް އާއްމުކޮށް ބަންދުކޮށްފައި ބެހެއްޓުމަށްވެސް ވަނީ ކަނޑައަޅާފައެވެ.
ޗައިނާގައި ހުސްވި އަހަރުގެ ޑިސެމްބަރު މަހު ފަހުކޮޅު ފެތެރެން ފެށި ކޮރޯނާވައިރަސް އަށް ރައްޔިތުން ހޭލުންތެރިކަން އިތުރު ކުރުމަށް ރާއްޖެޓީވީން ވަނީ ގިނަ މަސައްކަތްތަކެއް ކޮށްފައެވެ.
ކޮވިޑް-19 އަށް ހޭލުންތެރިކަން އިތުރު ކުރުމުގެ ގޮތުން ޚާއްސަ ކަވަރޭޖެއް އެންމެ ފުރަތަމަ ރާއްޖޭގައި ފަށާފައިވަނީ ރާއްޖެޓީވީންނެވެ.
މީގެ އިތުރުން ރާއްޖެޓީވީން ހިންގާ އޮންލައިން ނޫސް ރާއްޖެއެމްވީ ގައި ކޮވިޑް-19 ގެ ޚަބަރާއި މައުލޫމާތު އާއްމު ކޮށް ގެނެސްދިނުމަށް ޚާއްސަ ޕޭޖަކާއި ބްލޮގެއް ވަނީ ހަދާފައެވެ.
ކޮވިޑް-19 ގެ ރާއްޖެއެމްވީ ބްލޮގަށް މިހާތަނަށް 900،000 (ނުވަލައްކަ) އާ ގާތް ކުރާ އަދަދަކަށް ވިއުޒް ލިބިފައިވެއެވެ.
