އެއްބާރުލުން ނުދިން މީހާވެސް މިހާރު އެއްބާރުލުން ދޭން ފަށައިފި: މަބްރޫކް

ކޮންޓެކްޓް ޓްރޭސިންއަށް މައުލޫމާތު ނުދޭ މީހަކު ކުރިން ހުރިނަމަވެސް، މިހާރު އޭނާގެ ފަރާތުންވެސް އެއްބާރުލުން ލިބެމުންދާކަމަށް ކޮވިޑް-19 ޓާސްކް ފޯހުގެ ތަރުޖަމާނު މަބްރޫކު އަޒީޒް ވިދާޅުވެއްޖެ އެވެ.

ކޮންޓެކްޓް ޓްރޭސިން އަށް މައުލޫމާތު ނުދޭ މީހަކު އެބަހުރި ކަމަށް މަބްރޫކް ކުރިން ވިދާޅުވި އެވެ. އާދިއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި މަބްރޫކު ވިދާޅުވީ، މިހާރު އޭނާގެ ފަރާތުންވެސް އެއްބާރުލުން ލިބެމުންދާ ކަމަށެވެ. އަދި ހޯދަން ބޭނުންވި ތަފްސީލުތައްވެސް ލިބިފައިވާކަން މަބްރޫކު ފާހަގަކުރެއްވި އެވެ.

މަބްރޫކު އިތުރަށް ވިދާޅުވީ، އެކަންކަމާއި ގުޅިގެން ފާއިތުވި ދުވަސްތަކުގައި ވަކި މީހަކަށް އަމާޒުވާ ގޮތަށް ހީއެއްގެ މައްޗަށް މީހުންގެ ފޮޓޯ އާންމުކޮށް، ސީދާ ދޮގު މައުލޫމާތު ފަތުރަން ފަށާފައިވާކަން ފާހަގަކުރެވިފައިވާ ކަމަށެވެ. އަދި އެ ފަރާތްތަކާ ހަޑިހުތުރު ބަހުން މުއާމަލާތުކޮށް، ހާސްކަމުގެ ތެރެއަށް ވައްޓާލަމުންދާ ކަމުގެ މައުލޫމާތު ލިބޭއިރު، އެގޮތަށް އެކަން ނުކުރުމަށް މަބްރޫކު ވަނީ އިލްތިމާސްކުރައްވާފަ އެވެ.

މަބްރޫކު ވިދާޅުވީ، މީހެއްގެ ފަރާތުން އެއްބާރުލުން ނުދީގެން ނުވަތަ ރައްޔިތުންގެ ރައްކާތެރިކަމަށް ބުރޫ އަރާ ހިސާބުން އެފަދަ ފަރާތެއްގެ ނަމާއި ފޮޓޯވެސް ސަރުކާރުން އާންމު ކުރާނެ ކަމަށެވެ.

މަބްރޫކު އެހެން ވިދާޅުވެފައިވާއިރު، ބަލި ފެތުރުން ހުއްޓުވުމަށް އަޅާ ފިޔަވަޅުތަކަށް އެއްބާރުލުން ނުދޭ ފަރާތްތަކުގެ ވަނަވަރު ހާމަ ކުރެވޭ ގޮތަށް ޤަވާއިދެއްވެސް ވަނީ އެކުލަވާލެވިފަ އެވެ.