ޚިދުމަތް މެދުނުކެނޑި ފޯރުކޮށްދެވޭނެ
މޯލްޑިވް ގޭހުގެ ލުއި ފުޅިތަކެއް، ޚިދުމަތް ނުކެނޑި ފޯރުކޮށްދޭނެކަމުގެ ޔަގީންކަން ދީފައިވޭ
ގޭސްފުޅި ޑެލިވަރީކުރުމަށް ލަސްތަކެއް ކުރިމަތިވި ނަމަވެސް އޯޑަރުކުރާ ދުވަހު ގޭސްފުޅި ލިބޭނެ ކަމަށް މޯލްޑިވް ގޭހުން ބުނެފިއެވެ.
ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި މޯލްޑިވް ގޭހުގެ މެނޭޖަރ މާކެޓިންގ އެންޑް ބިޒްނަސް ޑިވެލޮޕްމަންޓް، އައިމިނަތު މުހައްމަދު ސައީދު ވިދާޅުވީ ކޮވިޑް-19ގެ މިހާލަތުގައި ވެސް ގޭހުގެ ޚިދުމަތް މެދުނެކެނޑި ފޯރުކޮށްދިނުމަށް ކޮންމެ ދުވަހަކު މަސައްކަތް ކުރަމުންދާ ކަަމަށެވެ. ގޭހަށް ނުޖެހޭނެކަމުގެ ޔަގީންކަން އޭނާ ދެއްވިއެވެ.
އެގޮތުން މާލެ، ހުޅުމާލެ އަދި ވިލިމާލެއަށް ގޭސް ޑެލިވަރީ ދުވަހުން ދުވަހަށް ފޯރުކޮށްދެމުންދާ ކަމަށް އައިމިނަތު ވިދާޅުވިއެވެ. އަދި ވިދާޅުވީ ގޭސްފުޅި ފޯރުކޮށްދިނުމަށް ހަމަޖެހިފައިވާ ވަގުތާއި، ގޭހަށް އޯޑަރު ދޭނެ ގޮތަށް ބަދަލު ގެނެވިފައިވާ ކަމަށެވެ.
އައިމިނަތު ވިދާޅުވީ އާދިއްތަ، ހޯމަ، އަންގާރަ، ބުދަ، ބުރާސްފަތި އަދި ހޮނިހިރު ދުވަހުގެ ހެނދުނު 9:00 ން 16:00 ށް ގޭހަށް އޯޑަރު ނަގާނެ ކަމަށެވެ. ގޭހަށް އޯޑަރު ދިނުމަށްޓަކައި ކޮންމެ ދުވަހަކު ވެސް 9:00 ން 16:00 ށް އޯޑަރު ދިނުމަށް އެދިފައިވެއެވެ. އަދި ވިދާޅުވީ ހުކުރު ދުވަހުގެ 16:00 ން ރޭގަނޑު 20:30 ށް ގޭހަށް އޯޑަރު ކުރެވޭނެ ކަމަށެވެ.
މޯލްޑިވް ގޭހުގެ މުއައްޒަފުންގެ ރައްކާތެރިކަމަށް ގިނަ ފިޔަވަޅުތަކެއް އަޅާފައިވާކަން ފާހަގަކުރައްވައި އައިމިނަތު ވިދާޅުވީ ގޭހަށް އޯޑަރ ދިނުމަށް ބޮޑަށް ބާރުއަޅަނީ ވެބްސައިޓް މެދުވެރިކޮށް ކަމަށެވެ. ނަމަވެސް ވެބްއޯޑަރ ސަރވިސް ބޭނުން ނުކުރެއްވޭނެ މީހުންނަށް ކޯލް ސެންޓަރު 1616 ގުޅައިގެން އޯޑަރު ދެވޭނެ ކަމަށެވެ.
އަތޮޅުތެރެއަށް ދެމުންދާ ޚިދުމަތަށް އަލިއަޅުއްވާލައްވާ އައިމިނަތު ވިދާޅުވީ ހުރިހާ ރަށަކަށް ގޭހުގެ ޚިދުމަތް ފޯރުކޮށްދެމުންދާއިރު، ގޭސްފުޅި ފޯރުކޮށްދެމުންދަނީ މޯލްޑިވް ގޭހުގެ އެޖެންޓުން މެދުވެރިކޮށް ކަމަށެވެ. ނަމަވެސް އަތޮޅުތެރޭގައި ދަތުރުފަތުރުގެ ދަތިކަން ދިމާވުމުގެ ސަބަބުން ބައެއް އެޖެންޓުންނަށް ގޭސް ފޯރުކޮށްދިނުމަށް ދަތިތައް ދިމާވަމުންދާކަން އައިމިނަތު ފާހަގަކުރެއްވިއެވެ.
އައިމިނަތު ވިދާޅުވީ މިހާރު އަތޮޅުތެރެއިން ގޭސްބަލާ އަންނަ ދޯނިތަކަށް ތިލަފުށިން ޚާއްސަ ހުއްދައެއްގެ ދަށުން އެޚިދުމަތް މެދުކެނޑުމެއްނެތި ފޯރުކޮށްދެމުންދާ ކަމަށެވެ. މިއީ ޒަރޫރީ ބޭނުމަކަށް ބޭނުންކުރާ އެއްޗަކަށްވާތީ މިމަސައްކަތުގައި އެންމެންގެ ފުރިހަމަ އެއްބާރުލުން ދިނުމަށް އައިމިނަތު އެދިފައިވެއެވެ. އަދި ވިދާޅުވީ މަސައްކަތް ކުރަނީ އެއްވެސް ބަޔަކަށް ދަތިނުވެ ގޭހުގެ ޚިދުމަތް ފޯރުކޮށްދިނުމަށް ކަމަށެވެ.
މީގެ އިތުރުން އައިމިނަތު ވިދާޅުވީ ގޭހުގެ ޑެލިވަރީގެ ކަންތައް ކުރިއަށް ގެންދިއުމަށް ނިންމާފައިވަނީ ދެފަރާތުގެ ސަލާމަތާއި ރައްކާތެރިކަމަށްޓަކާ ކަމަށެވެ.
އެގޮތުން ގޭސްފުޅި ޑެލިވަރ ކޮށްދެވޭނީ އިމާރާތުގެ ބޭރު ދޮރާހަމައަށް ކަމަށާއި، ކޮންމެ ގޭބިސީއަކުން ވެސް ނެރޭ ހުސް ގޭސްފުޅި ޕިކަޕަށް އަރުވާނީ ވެސް ޑިސްއިންފެކްޓް ކުރުމަށްފަހު ކަމަށެވެ. އަދި ކޮންމެ ސިލިންޑަރު ޑިންސްއިންފެކްޓު ކުރާނެކަމުގެ ޔަގީންކަން އައިމިނަތު ދެއްވިއެވެ.
