ލޮކްޑައުންގެ ގަވައިދުތަކާ ހިލާފުވެގެން 39 މީހަކު ޖޫރިމާނަކޮށްފި
18 އެޕްރީލު 2020 | ހޮނިހިރު 23:29ޒަރޫރީ ބޭނުމެއްނެތި މަގުމަތީގައި އުޅުމަކީ މަނާ ކަމެއް
މަގުމަތިން ދިޔަ ފަރާތެއްގެ މައުލޫމާތު ފުލުހަކު އޮޅުންފިލުވަނީ
ކޮވިޑް-19 މާލެ އިން ފެނުމާއި ގުޅިގެން މާލެ ލޮކްޑައުން ކޮށްފައި ވަނިކޮށް، މާލެ މަގުމައްޗަށް ނިކުމެ އުޅުނު 39 މީހަކު ޖޫރިމަނާ ކޮށްފައިވާ ކަމަށް ފުލުހުން ބުނެފި އެވެ.
ޒަރޫރީ ބޭނުމެއްނެތި މާލޭގެ މަގުމައްޗަށް ނިކުމެ އުޅުނު 92 މީހަކު ފުލުހުންގެ ބެލުމުގެ ދަށަށް ވަނީ ގެންގޮސްފަ އެވެ.
ހޮނިހިރު ދުވަހު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި، އެސިސްޓެންޓް ކޮމިޝަނަރަ އޮފް ޕޮލިސް ޑރ. އަބްދުﷲ ފައިރޫޝް ވިދާޅުވީ، ފުލުހުންގެ ބެލުމުގެ ދަށަށް ގެންދެވެނު މީހުންގެ ތެރެއިން ބައެއް ފަރާތްތަކަކީ ހައްޔަރު ކުރުމުގެ މަގްސަދުގައި ގެންދެވުނު ބައެއް ނޫން ކަމަށާއި، އޭގެ ތެރޭގައި ހިމެނޭ ބައެއް މީހުންނަކީ އެއްވެސް ގެދޮރެއް ނެތް ފަރާތްތައް ކަމަށެވެ.
ފައިރޫޝް ވިދާޅުވީ، ގެދޮރެއް ނެތި ތިބި މީހުންގެ ކަންތައްތައް ސަރުކާރުގެ ކަމާއި ބެހޭ އިދާރާތަކާއި ގުޅިގެން ކުރަމުންދާ ކަމަށެވެ.
އޭނާ ވިދާޅުވީ، މަގުމަތީ ގައި ދިވެހިންނަށްވުރެ ގިނައީ ބިދޭސީން ކަމަށާއި، އެކަމަށް ހައްލެއް ގެނައުމުގެ މަސައްކަތް ކުރަމުންދާ ކަމަށެވެ. އެގޮތުން މިހާތަނަށް 160 ބިދޭސީއަކުން ފުލުހުންގެ ބެލުމުގެ ދަށަށް ގެންދެވިފައިވާކަމަށް ފައިރޫޝް ފާހަގަކުރެއްވި އެވެ.
