ބަލިމީހުންގެ ޓްރެކިއޯޓޮމީ ހެދުމަށް ހޮސްޕިޓަލުން އެދެމުންދާ ކަމަށް ދެކެވެނީ ދޮގުވާހަކައެއް: އައިޖީއެމްއެޗް
18 އެޕްރީލު 2020 | ހޮނިހިރު 14:19މިފަދަ ނާޒުކު ދަނޑިވަޅެއްގައި ހަޤީގަތާއި ޚިލާފް ދޮގު ވާހަކަ ނުފެތުރުމަށް ވަނީ އެދިފައި
އިންދިރާ ގާންދީ މެމޯރިއަލް ހޮސްޕިޓަލް
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އައިސީޔޫގައި ތިބި ބަލިމީހުންގެ ޓްރެކިއޯޓޮމީ ހެދުމަށް ހޮސްޕިޓަލުން އެދެމުން ދާކަމަށް ދެކެވެނީ ދޮގުވާހަކައެއް ކަމަށް އެ ހޮސްޕިޓަލުން ބުނެފިއެވެ.
ޓްރެކިއޯޓޮމީ އަކީ ކަރުން ތަންކޮޅެއް ފަޅާލުމަށްފަހު ނޭވާލުމަށް ފަސޭހަ ކުރަން ހޮޅިކޮޅެއް ލެއްވުމަށް ހަދާ ޕްރޮސީޖަރެކެވެ.
ހޮނިހިރު ދުވަހު އައިޖީއެމްއެޗުން ބުނީ ކޮވިޑް-19 އާ ގުޅިގެން އެ ހޮސްޕިޓަލުގެ އައއިސީޔޫގައި ތިބި ޕޭޝަންޓުން ވެންޓިލޭޓަރުން ނައްޓާލައި ޓްރެކިއޯޓޮމީ ހެދުމަށް ހޮސްޕިޓަލުން އެދެމުން ދާކަމަށް ދެކެވެމުން ދަނީ އެއްވެސް ހަޤީގަތެއް އެކުލެވޭ ވާހަކައެއް ނޫން ކަމަށެވެ.
އަދި އެ ހޮސްޕިޓަލްގައި ދިގު މުއްދަތަކަށް ވެންޓިލޭޓަރ ގެ އެހީ ބޭނުންވާ ބަލި މީހުންނަށް ޓްރެކިއޯޓޮމީ ހެދުމަކީ އަބަދުވަސް ކުރާ ކަމެއް ކަމަށް އައިޖީއެމްއެޗުން ބުނެއެވެ.
މިފަދަ ނާޒުކު ދަނޑިވަޅެއްގައި ހަޤީގަތާއި ޚިލާފް ދޮގު ވާހަކަ ނުފެތުރުމަށް އެ ހޮސްޕިޓަލުން ތަކުރާރުކޮށް ވަނީ ނަސޭހަތްތެރިވެފައެވެ.
ކޮވިޑް-19 ބަލިޖެހޭ މީހުންގެ ތެރެއިން ވެންޓިލޭޓަރުގައި ބައެއް މީހުންނަށް ފަރުވާދޭން ޖެހެއެވެ. ދުނިޔޭގެ ގައުމުތަކުގައި ހަލުވިކަމާއި އެކު ކޮވިޑް-19 ފެތުރެމުންދާ މި ދަނޑިވަޅުގައި އެތައް ގައުމެއްގައި ބަލި ޖެހިގެން ފަރުވާދޭން ޖެހޭ މީހުންގެ އަދަދު ގިނަވެފައިވާއިރު، ވެންޓިލޭޓަރުތައް މަދުވުމުގެ މައްސަލަ ގިނަ ގައުމުތަކަކަށް ވަނީ ކުރިމަތިވެފައެވެ. ރާއްޖެއަށް ވެސް އިތުރު ވެންޓިލޭޓަރު ގެނައުމުގެ މަސައްކަތް ކުރަމުންދާ ކަމަށް ސަރުކާރުން ވަނީ ބުނެފައެވެ.
