ކ. ހިންމަފުށީގައި ދިރިއުޅޭ ބިދޭސީންގެ މައުލޫމާތު އެއްކޮށް ދަފްތަރެއް އެކުލަވާލުމުގެ މަސައްކަތް ފަށާފައިވާކަމަށް އެރަށުގެ ކައުންސިލުން ބުނެފިއެވެ.
ހިންމަފުށީ ކައުންސިލުން ބުނީ މިހާރު ފެތުރެމުންދާ ކޮވިޑް 19 އާއި ގުޅިގެން، ބިދޭސީންގެ ސައްހަ މައުލޫމާތު އެއްކުރަމުން ގެންދަންޖެހޭތީ، ބިދޭސީ މަސައްކަތްތެރިންގެ މައުލޫމާތު ދުވަހުން ދުވަހަށް އެއިދާރާއަށް ރިޕޯޓުކުރުމަށް އެދޭ ކަމަށެވެ. އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 15 ވަނަ މާއްދާގެ (ހ އަދި ބ) ގައިވާ ގޮތުގެމަތީން ބިދޭސީންގެ މައުލޫމާތު އެއްކޮށް ދަފްތަރެއް ބެލެހެއްޓުމަކީ ކައުންސިލަށް މަތިކޮށްފައިވާ ޒިންމާއެއް ކަމަށް ކައުންސިލުން ބުނެއެވެ.
ކައުންސިލުން ބުނީ ރަށުގައި ދިރިއުޅޭ އެންމެހައި ބިދޭސީންގެ މައުލޫމާތު މިމަހުގެ 30ގެ ނިޔަލަށް ބިދޭސީން ގެންގުޅޭ ފަރާތްތަކުން އެއިދާރާއަށް ހުށަހެޅުމަށް އެދޭ ކަމަށެވެ.
މިގޮތަށް މައުލޫމަތު ނުދީ ބިދޭސީން ގެންގުޅޭނަމަ އެފަރާތްތަކާއި މެދު ގަވާއިދުން ފިޔަވަޅު އަޅާނެކަމަށްވެސް ކައުންސިލުން ބުނެއެވެ.
ހިންމަފުށީގައި ބިދޭސީންގެ ދަފްތަރެއް އެކުލަވާލުމުގެ މަސައްކަތް ފަށާފައިވާއިރު، ހޮނިހިރު ދުވަހު މާލެއިން ކޮވިޑް-19 އަށް ބިދޭސީއެއް ފުރަތަމަ ވަނީ ޕޮޒިޓިވްވެފައެވެ.
