ލޮކްޑައުން ގައި ބޭންކުތަކާއި އެމްއެމްއޭ ހުޅުވާފައި ހުންނާނީ 19 އަދި 20 ވަނަ ދުވަހު

ކޮވިޑް-19 އާއި ގުޅިގެން މާލެ ސަރަހައްދު ލޮކްޑައުންގެ ހާލަތުގައި ވާތީ ކުރިއަށްއޮތް ހަފްތާގައި ޒަރޫރީ ބޭންކިންގް ޚިދުމަތްތައް ދިނުމަށް އެމް.އެމް.އޭ. އަދި ބޭންކުތައް ހުޅުވުމަށް ހަމަޖެހިފައިވަނީ 19 އަދި 20 އޭޕްރީލް ގައި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.

މިގޮތުން އެމް.އެމް.އޭ. ހުޅުވާފައި ހުންނާނީ ހެދުނު 9:30ން މެންދުރު 12:30ށް ކަމަށާއި ނަމަވެސް އެމް.އެމް.އޭ. އިން މިދުވަސްތަކުގައި އާންމުންނަށް ޚިދުމަތެއް ނުދޭނެކަމަށް އެއޮތޯރިޓީން ބުނެ އެވެ.

މި ދެދުވަހު ބޭންކުތަކުން ފޯރުކޮށްދޭ ޒަރޫރީ ޚިދުމަތްތަކުގެ ތެރޭގައި ޓީޓީ ހެދުން، ކުންފުނިތަކުން މުވައްޒަފުންނަށް މުސާރަ ދިނުމަށް ހަދާ އޭ.ސީ.އެޗް./އާރް.ޓީ.ޖީ.އެސް. ޕޭމަންޓުތައް ހެދުން، ލެޓަރ އޮފް ކްރެޑިޓްގެ ޚިދުމަތް އަދި ރާއްޖެއިން ބޭރަށް ފައިސާ ފޮނުވުމުގެ ޚިދުމަތްތައް ހިމެނޭ ކަމަށް އެމްއެމްއޭ އިން ބުނެއެވެ.

މި ޚިދުމަތްތައް ހޯދުމަށް ބޭންކުތަކަށް އައުމުގެ ބަދަލުގައި، އެ ޚިދުމަތަކަށް އެދޭ ފޯމް ނުވަތަ ރިކުއެސްޓު އެ ބޭންކަކުން ހަމަޖައްސާފައިވާ ގޮތަކަށް އޮންލައިން ކޮށް ފޮނުއްވުމަށް އެމްއެމްއޭ އިން އެދެ އެވެ.

ބޭންކުތައް ހުޅުވާ ގަޑިތަކާއި، ދޭ ޚިދުމަތްތަކާއި، އެ ޚިދުމަތްތައް ފޯރުކޮށްދޭ ގޮތުގެ ތަފްސީލު އެ ބޭންކަކުން އާންމު ކުރާނެއެވެ.

މި ފިޔަވަޅުތަކަކީ ލޮކްޑައުން ހާލަތުގައި ގައިދުރުކަން ދެމެހެއްޓުމަށްޓަކައި މުހިއްމު ކަންތައްތައް ކަމުން، މިކަމުގައި އާންމުންގެ އެއްބާރު ލުން މުހިންމު ކަމަށްވެސް އެމްއެމްއޭއިން ބުނެއެވެ.

ކޮވިޑް-19 މާލޭގައި ފެތުރުން ކޮންޓްރޯލްކުރުމަށް މާލެ ސިޓީ ވަނީ ހުކުރު ދުވަހުން ފެށިގެން ދެ ހަފްތާގެ މުއްދަތަށް ލޮކްޑައުންކޮށްފަ އެވެ.