އަސާސީ މުދާ ބަލާ އުޅަނދު ފަހަރު ދާންވީ މާލެ ނޯތު ހާބަރަށް: ފުލުހުން
18 އެޕްރީލު 2020 | ހޮނިހިރު 09:44މުދަލާއި ފެނާ ބަލާ ރިސޯޓްތަކުންނާއި ރަށްރަށުން އަންނަ އުޅަނދު ފަހަރު ނޯތު ހާބަރަށް ކައިރިކުރުމަށް ފުލުހުން އެދޭ
މާލެ ނޯތު ހާބަރ- ލޮކްޑައުން ކުރުމުން މާލެއިން އަރާ ފޭބުން ވަނީ މަނާކޮށްފައި
އަސާސީ މުދާ ބަލާ މާލެއަށް އާދެވޭނެ ކަަމަށާއި އެކަމަށް އަންނަ އުޅަނދުތަކުން މާލޭގެ ނޯތު ހާބަރަށް ކައިރިކުރުމަށް މޯލްޑިވްސް ޕޮލިސް ސަރވިސް އިން އެދެފި އެވެ.
އެކަމާއި ގުޅިގެން ފުލުހުން ކޮށްފައިވާ ޓްވީޓެއްގައި ބުނެފައިވަނީ މުދަލާއި ފެން ބަލާ ރިސޯޓްތަކުންނާއި ރަށްރަށުން އަންނަ އުޅަނދު ފަހަރު އެސަރަހައްދަށް ކައިރިކުރުމަށް އެދޭކަމަށެވެ. އަދި މިގޮތަށް އަންނަ އުޅަނދު ފަހަރުގައި އާދެވޭނީ އެއުޅަނދެއްގެ ފަޅުވެރިންނަށް އެކަނި ކަމަށާއި ފަސިންޖަރުން ނޫފުލޭނެކަމަށް ފުލުހުން ބުނެއެވެ.
މީގެ އިތުރުން ދަތުކުރަން ފެށުމުގެ ކުރިން ދަތުރުގެ މައުލޫމާތު އެރަށެއްގެ ކައުންސިލަށް އެންގުމަށްވެސް ފުލުހުން އެދެ އެވެ.
ކޮވިޑް-19 މާލެ ސިޓީގައި ދިރިއުޅޭ ރައްޔިތެއްގެ ގައިން ފެނުމާއެކު މިމަހުގެ 15 ވަނަ ދުވަހުން ފެށިގެން މާލެ ސިޓީ ވަނީ ލޮކްޑައުންކޮށްފަ އެވެ. އަދި ހުކުރު ދުވަހުން ފެށިގެން މާލެ ސިޓީ ދެ ހަފްތާގެ މުއްދަތަށް ލޮކްޑައުން ކޮށްފައިވާއިރު ރާއްޖޭގެ ރަށްރަށުން އެހެން ރަށްރަށަށް ދަތުރުކުރުން ވެސް ވަނީ މަނާކޮށްފަ އެވެ.
މިހާތަނަށް އައިއިރު ރާއްޖެއިން ކޮވިޑް-19 އަށް 32 މީހަކު ޕޮޒިޓިވް ވެފައިވާއިރު މީގެ ތެރެއިން 12 މީހުންނަކީ މާލެ ސިޓީން ބައްޔަށް ޕޮސިޓިވްވި މީހުންނެވެ.
