ދުނިޔޭގައި ހަލުވިކަމާއެކު އަދިވެސް ފެތުރެމުންދާ ކޮރޯނާވައިރަސްއާ ދެކޮޅަށް ކުރާ މަސައްކަތަށް އެހީވުމަށް ސްވިޑަންގެ ޕްރިންސެސް ސޮފިއާ ނިކުމެވަޑައިގަންނަވައިފިއެވެ.

ސޮފިއަހެމެޓް ހޮސްޕިޓަލުން ކުރި އިންސްޓަގްރާމް ޕޯސްޓެއްގައި ބުނެފައިވަނީ ބޭސިކް ނަރުހުންގެ ޓްރެއިނިންގ ކޯސްއަކަށް ފަހު ޕްރިންސެސް ސޮފިއާ ވޮލަންޓިއަރެއްގޮތަށް ހޮސްޕިޓަލާ ގުޅިވަޑައިގެންފައިވާ ކަމަށެވެ. އެކަމަނާ އަކީ އެ ހޮސްޕިޓަލްގެ ހޮނިރަރީ ޗެއާއެކެވެ.

ވޮލަންޓިއަރ މަސައްކަތް ކުރައްވަން ފައްޓަވާފައިވާކަން ސޮފިއާ ވެސް ވަނީ ހާމަކުރައްވާފައެވެ. އެގޮތުން އެކަމަނާގެ އިންސްޓަގްރާމްގައި ނަރުހުންގެ ޔުނިފޯމް ތުރުކުރައްވާފައިވާ ފޮޓޯއެއް ޕޯސްޓްކޮށްފައިވެއެވެ.

ސޮފިއާ ވިދާޅުވީ، ހެލްތްކެއަރ އާ ގުޅުންހުރި ކޯހެއް މިދިޔަ ހަފްތާގައި ނިންމަވާފައިވާ ކަމަށާއި އެއަށްފަހު މިހާރު ސޮފިއަހެމެޓް ހޮސްޕިޓަލްގެ ޔުނިޓެއްގައި މަސައްކަތް ކުރައްވަމުން ގެންދަވާ ކަމަށެވެ. އަދި އެކަމަނާގެ މަސައްކަތްތަކުގެ ތެރޭގައި ކޮވިޑް-19 ޖެހިފައިވާ މީހުންނަށް ފަރުވާ ދިނުމުގައި މަސައްކަތް ކުރާ ފަރާތްތަކަށް ފެސޭހަކޮށްދިނުމަށް އެމީހުންނަށް އެހީވެމަށް ކުރަންޖެހޭ ކަންތައް ހިމެނެއެވެ. އޭގެ ތެރޭގައި ޕޭޝަންޓުންނަށް އަޅާލުމާއި ޔުނިޓް ސާފުކުރުން ހިމެނޭއިރު، އެކަމަނާ ސީދާ ޕޭޝަންޓުން ބައްދަލު ނުކުރައްވާނެ ކަމަށް ހޮސްޕިޓަލްގެ ތަރުޖަމާނު ބުނެފައިވެއެވެ.

މީގެ އިތުރުން ސޮފިއާ ވިދާޅުވީ މިއީ ވަރަށް "ރިވޯޑިންގ" މަސައްކަތެއް ކަމަށެވެ.

ސްވިޑަންގެ ރޯޔަލް ކޯޓުން ބުނީ، މި ދަނޑިވަޅުގައި ސޮފިއާ ބޭނުންފުޅުވެވަޑައިގަންނެވީ ވޮލަންޓިއަރ ކުރައްވައިގެން ހެލްތްކެއަރގެ މަސައްކަތުގައި އެހީވެލެއްވުމަށް ކަމަށެވެ.

ސްވިޑެންގެ ޕްރިންސެސްއެއް ކޮވިޑް-19 އާ ދެކޮޅަށް ކުރާ މަސައްކަތަށް އެހީވުމަށް ވޮލަންޓިއަރ ކުރައްވާފައިވާއިރު، އަޔަލޭންޑްގެ ބޮޑު ވަޒީރު ލިއޯ ވަރަދްކާރ ވެސް ވަނީ ހޮސްޕިޓަލްގައި މަސައްކަތް ކުރައްވަން ފައްޓަވާފައެވެ.

މެޑިސިންގެ ދާއިރާއިން ތައުލީމު ހާސިލްކުރެއްވި ވަރަދްކާރްއަކީ ސިޔާސީ މަސައްކަތް ފެއްޓެވުމުގެ ކުރިން ފިޒިޝަންއެކެވެ. އަދި މީގެ ކުރިން ގައުމުގެ ހެލްތު މިނިސްޓަރ މަގާމު ފުރުއްވާފައިވާ އެބޭފުޅާ މިހާރު ދަނީ ހަފްތާއަކު އެއް ޝިފްޓް ހަސްފަތާލުގައި މަސައްކަތް ކުރައްވަމުންނެވެ. އަޔަލޭންޑްގެ މެޑިކަލް ރެޖިސްޓަރ އިން ވަރަދްކާރް ނަގާފައިވަނީ ހެލްތް މިނިސްޓަރުގެ މަގާމު އައްޔަން ކުރުމުގެ އަހަރެއް ކުރިން، 2013 ގައެވެ.

އެބޭފުޅާ އަލުން މި މަސައްކަތާ ގުޅުނީ އަޔަލޭންޑްގައި ކޮވިޑް-19 ފެތުރުމާ ގުޅިގެން މިވަގުތު މަސައްކަތް ނުކުރާ ހެލްތުކެއަރ މަސައްކަތްތެރިންނަށް މަސައްކަތަށް ނިކުންނަން ޖެހިދާނެކަމަށް ތައްޔާރުވުމަށް ހެލްތު ސަރވިސް އެގްޒެކެޓިވް އިން ގޮވާލުމުންނެވެ.