މިހާރު މި އޮތް ގޮތަށް ކުރިއަށްދާނަމަ ފަރުވާދޭނެ ކެޕޭސިޓީއެއް ނެތް، އިތުރު ވަސީލަތްތައް ބޭނުންވޭ: އެޗްޕީއޭ

އެންމެ ހަރުކަށި ފިޔަވަޅުތަކާއެކުވެސް މިހާރުގެ ރާއްޖޭގެ ޙާލަތަށް ބަލާއިރު ކޮވިޑް-19 97،000 އެއްހާ މީހުންނަށް ޖެހުމުގެ ފުުރުސަތު އެބަ އޮތް ކަމަށް ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ) އިން ބުނެފިއެވެ.

ހުކުރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގަތް ޑރ ޝީނާ މޫސާ ވިދާޅުވީ، މިހާރު މި އޮތް ގޮތަށް ކުރިއަށްދާނަމަ ރާއްޖޭގައި ކޮވިޑް-19 ގެ ބަލިމީހުންނަށް ފަރުވާދޭނެ ކެޕޭސިޓީއެއް ނެތް ކަމަށާއި، އިތުރު އައިސީޔޫއާއި ވަސީލަތްތައް ބޭނުންވާނެ ކަމަށެވެ. އެގޮތުން ފިޔަވަޅުތަކަށް 20 އިންސައްތައަށް އަމަލުކުރި ނަމަވެސް 100،605 މީހުން އެނދުމަތި ކުރެވި، 43،240 މީހުން އައިސީޔޫގައި ވެންޓިލޭޓަރަށް ލައިގެން ފަރުވާދޭން ޖެހިދާނެ ކަމަށެވެ. އަދި އެންމެ ޕީކް ދުވަހު 17 ކޭސް ފެންނާނެ ކަމަށް ބެލެވޭކަަމަށް ވިދާޅުވިއެވެ.

އޭގެ އިތުރުން، ފިޔަވަޅުތަކަށް 50 އިންސައްތައަށް އަމަލު ކުރެވިއްޖެނަމަ 100،563 މީހުން އެނދުމަތި ކުރާން ޖެހޭނެ ކަމަށް ލަފާ ކުރެވިފައިވާއިރު، އެ ޙާލަތުގައި 43،222 މީހުން އައިސީޔޫގައި ފަރުވާދޭން ޖެހޭނެ ކަމަށް ޑރ ވިދާޅުވިއެވެ. އެގޮތުން އެ ޙާލަތުގައި އެންމެ ޕީކް ދުވަހުގައި 32 ކޭސް ފެނުމުގެ ފުރުސަތު އެބައޮތް ކަމަށް އޭނާ ވިދާޅުވިއެވެ.

ޑރ ވިދާޅުވީ، ފިޔަވަޅުތަކަށް 75 އިންސައްތައަށް އަމަަލުކޮށްފިނަމަ އެނދުމަތި ކުރެވޭނެ ކަމަށް ބެލެވެނީ 97،015 މީހުން ކަމަށާއި، އެ ޙާލަތުގައި 41،697 މީހުންނަށް އައިސީޔޫގައި ފަރުވާދޭން ޖެހޭނެ ކަމަށެވެ.

ޑރ ވިދާޅުވީ، މި ފިޔަވަޅުތަކަށް އަމަލު ނުކުރެވިއްޖެނަމަ މިހާރުގެ ހާލަތަށް ބަލާއިރު، 14 ވަނަ ދުވަހާއި ހަމައަށް 19،468 މީހުންނަށް ބަލި ޖެހޭނެ ކަމަށް ލަފާ ކުރެވޭ ކަމަށާއި، ނަމަވެސް ރަނގަޅު ފިޔަވަޅުތަކާއެކު މި އަދަދު 29 ގައި ހިފެހެއްޓިދާނެ ކަމަށެވެ.