ސަމާލުވޭ! ބަލި ފެތުރުން ހުއްޓުވުމަށް އެއްބާރުލުން ނުދޭ ފަރާތްތަކުގެ ނަމާއި ފޮޓޯ ހާމަކުރެވޭނެ
17 އެޕްރީލު 2020 | ހުކުރު 17:19ނަން ހާމަކުރެވޭ އުސޫލެއް ހެލްތް ޕްރޮޓެކްޝަން އޭޖެންސީން އެކުލަވާލައިފި
ލޮކްޑައުންކޮށްފައިވާ ވަގުތެއްގައި މާލެ މަގުމަތި
އާންމު ސިއްޙަތު ރައްކާތެރި ކުރުމުގެ ގޮތުން ބަލިތައް ފެތުރުނަ ނުދިނުމަށް އަޅާ ފިޔަވަޅުތަކަށް އެއްބާރުލުން ނުދޭ ފަރާތްތަކުގެ ނަން ހާމަކުރެވޭ އުސޫލެއް ހެލްތް ޕްރޮޓެކްޝަން އޭޖެންސީން އެކުލަވާލައިފިއެވެ.
"އާންމު ސިއްޙަތު ރައްކާތެރި ކުރުމުގެ ގޮތުން ނަން ހާމަ ކުރުމާބެހޭ އުސޫލުތައް ބަޔާންކުރާ ޤަވާއިދު" ހުކުރު ދުވަހު ދިވެހި ސަރުކާރުގެ ގެޒެޓުގައި ޝާއިއުކޮށްފައިވާއިރު، އެ ޤަވާއިދުގެ ދަށުން ނުރައްކާތެރި ބަލިތައް ފެތުރުން ހުއްޓުވުމަށްޓަކައި ބަލިޖެހޭ ފަރާތުގެ ނަން އާންމުކޮށް ހާމަ ކުރުމުގެ ބާރު ލިބިގެންވަނީ ހަމައެކަނި ޑިރެކްޓަރ ޖެނެރަލް އޮފް ޕަބްލިކް ހެލްތަށެވެ. އެގޮތުން ހުކުރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ގެ ތަރުޖަމާނު މަބްރޫކު އަޒީޒުވެސް ވަނީ އެކަމަށް ސަމާލުވުމަށް އިލްތިމާސް ކުރައްވާފައެވެ.
އޭގެއިތުރުން، ބަލި ފެތުރުން ހުއްޓުވުމަށް ޤާނޫނުގެ ދަށުން ކަރަންޓީން ކުރުމަށް ނުވަތަ އެކަހެރި ކުރުމަށް އަންގާ ފަރާތްތަކާއި، ބަލި ފެތުރުން ހުއްޓުވުމަށް އަޅާ އެކި ފިޔަވަޅުތަކަށް އެއްބާރުލުން ނުދޭ ފަރާތްތަކުގެ ނަން ހާމަ ކުރެވޭނެ ކަމަށް އެ ޤާނޫނުގައި ބަޔާންކޮށްފައިވެއެވެ. އެގޮތުން ނަން ހާމަ ކުރުމުގައި ރިއާޔަތް ކުރަންޖެހޭ ކަންކަންވެސް ޤާނޫނުގައި ވަނީ ބަޔާންކޮށްފައެވެ.
އެ ޙާލަތްތަކުގައި އެފަދަ ފަރާތްތަކުގެ ފުރިހަމަ ނަމާއި، ޤައުމީ ނިސްބަތް އަދި، ދާއިމީ އެޑްރެހާއި، މިހާރު ދިރިއުޅޭ އެޑްރެހުގެ އިތުރުން، ވަޒީފާ އަދާ ކުރާ ތަނާއި، ފޮޓޯ އާންމު ކުރެވިދާނެ ކަމަށް ބަޔާންކޮށްފައިވެއެވެ.
