ލޮކްޑައުން ކުރުމާ ގުޅިގެން ހުކުރު ހުތުބާ ސްޓޫޑިއޯއިން ގެނެސްދީފި
މިއީ ހުކުރު ނަމާދު ލައިވް ނުކުރެވިދިޔަ ފުރަތަމަ ފަހަރުކަމަށްވޭ
މިއަދުގެ ހުކުރު ހުތުބާ އިސްލާމިކް ސްޓޫޑިއޯއިން ޑރ. އިޔާޒު ގެނެސްދެއްވަނީ
ކޮވިޑް-19 މާލެ ސަރަހައްދުގައި ފެތުރެން ފެށުމާގުޅިގެން މާލެ ސަރަހައްދު ލޮކްދައުންކުރުމުން، ހުކުރު ހުތުބާ ސްޓޫޑިއޯއިން ލައިވްކޮށް ގެނެސްދީފި އެވެ.
މާލެ ސަރަހައްދު ކޮލްޑައުން ކުރުމާއި ގުޅިގެން މާލެ ސަރަހައްދުން އެއްވެސް އުޅަންދެއް ފުރުން އަދި މާލެ ސަރަހައްދަށް އެއްވެސް އުޅަންދެއް އައުން ވަނީ މަނާ ކޮށްފަ އެވެ. އަދި ރާއްޖޭގެ އެއް ރަށުން އަނެއް ރަށަށް ދަތުރުކުރުންވެސް އެއްކޮށް ވަނީ މަނާކޮށްފަ އެވެ.
އެހެންކަމުން ދައުލަތުގެ މީޑިއާ ޓީވީއެމުން މެދުނުކެނޑި ގެނެސްދެމުންދިޔަ ހުކުރު ހުތުބާއާއި ހުކުރު ނަމާދު ލައިވް ނުކުރެވި ދިޔަ މިއީ ފުރަތަމަ ފަހަރެވެ. އެހެންނަމަވެސް އިސްލާމިކް ސްޓޫޑިއޯއިން ލައިވްކޮށް މިއަދުގެ ހުކުރު ހުތުބާ ގެނެސްދީފައިވެއެވެ. ހުކުރު ހުތުބާ ވިދާޅުވެދެއްވީ، ޑރ. މުހައްމަދު އިޔާޒު އަބްދުއްލަތީފް އެވެ.
އިސްލާމިކް ސްޓޫޑިއޯއަކީ އިސްލާމިކް މިނިސްޓްރީގައި ގާއިމުކޮށްފައިވާ ސްޓޫޑިއޯ އެކެވެ. އެސްޓޫޑިއޯއިން ގެނެސްދިން ހުކުރު ހުތުބާ ހުރިހާ ޓީވީ ޗެނަލްތަކަށް ލައިވް ފީޑް ވަނީ ދޫކޮށްފަ އެވެ.
ކޮވިޑް-19އާ ގުޅިގެން، މާލޭ ސަރަހައްދާއި ރިސޯޓުތަކުގެ މިސްކިތްތަކުގައި ޖަމާއަތުގައި ނަމާދުނުކުރުމަށް އެންގީ މިދިޔަ މާޗު މަހުގެ 18 ވަނަ ދުވަހުއެވެ. މިހާލަތުގައި މާލެ ކައިރި އެހެން ރަށްތަކަށް ގޮސް، ޓީވީއެމް އިން ވަނީ އެހެން ހުކުރު ނަމާދުގެ ޖަމާއަތް ވަގުތުން ދުރަށް ދައްކާފަ އެވެ.
މިއަދުގެ ހުތުބާގައި އަލިއަޅުވާލައްވާފައި ވަނީ ޝައުބާން މަހާއި ހެޔޮ އަމަލުގެ މައްޗަށެވެ. އެގޮތުން ޝައުބާން މަހަކީ ހިތާއި ގުނަވަންތަކުން ރަމަޟާން މަހުގައި، ގަދައަޅައި އަޅުކަަން ކުރުމަށް ލިބިދޭ ތަމްރީނެއް ކަމަށާއި ޝައިޠާނާގެ ކަސްތޮޅުތަކުން މިނިވަންވެ، ހަވާނަފްސުގެ އެދުންތަކުން އެއްކިބާވެ، ބޭކާރު ވަހުމްތަކާއި ވަސްވާސްތަކުން ދުރުހެލިވެ ސީދާ ވުމަށް ލިބޭ ފުރުސަތެއް ކަމަށެވެ. މީގެއިތުރުން ޝައުބާމަހު ކީރިތި ރަސޫލާ މުޅި މަހު ކަހަލަގޮތަށް ސުންނަތް ރޯދަ ހިއްޕެވުމާއި، ރޯދަ މަހައް ތައްޔާރު ވުމުގެ ގޮތުން، އަޅުކަމުގައި ވަރަށް ގިނަ ވަގުތު ހޭދަކުރެއްވާފައިވާކަމަށް ވެސް މިއަދުގެ ހުކުރު ހުތުބާގައި އަލި އަޅުއްވާލައްވާފައި ވެއެވެ.
