ކޮވިޑް-19 އަށް މާލެއިން 7 ވަނަ މީހަކު ޕޮޒިޓިވްވެއްޖެ
17 އެޕްރީލު 2020 | ހުކުރު 08:04މިއީ ރާއްޖެއިން ޕޮޒިޓިވް ވި 27 ވަނަ މީހާ
ކޮވިޑް-19 އަށް ސާމްޕަލްތައް ނަގަ ޓެސްޓު ކުރުމުގެ މަސައްކަތް އައިޖީއެމްއެޗް ލެބޯޓްރީ އިން ކުރިއަށް ގެންދަނީ
ކޮވިޑް-19 އަށް މާލެ ސިޓީން އިތުރު މީހަކު ޕޮޒިޓިވް ވެއްޖެއެވެ.
ހުކުރު ދުވަހު އެޗްޕީއޭ އިން ކޮށްފައިވާ ޓްވީޓްގައި ބުނެފައިވަނީ ބަލީގެ އަލާމާތްތައް ފެނި، ހެދި ޓެސްޓް ޕޮޒިޓިވް ވެފައިވާ މީހެއް ފެނިފައިވާ ކަމަށެވެ.
އަދި މިއީ ރާއްޖެއިން ޕޮޒިޓިވް ވި 27 ވަނަ މީހާއެވެ. އަދި މިއަދު ޕޮޒިޓިވްވި 2 ވަނަ މީހާއެވެ.
މިއީ، މާލެއިން މި ބައްޔަށް ޕޮޒިޓިވްވި ހަތްވަނަ މީހާއެވެ. އޭނާ އައިސޮލޭޝަން އަށް ގެންދިއުމުގެ މަސައްކަތް ކުރަމުންދާކަމަށް އެޗްޕީއޭއިން މައުލޫމާތު ދެއެވެ.
މި މީހާއަކީ މީގެކުރިން ޕޮޒިޓިވް ވި މީހުންނާއި ޑައިރެކްޓް ކޮންޓެކްޓްވި މީހެއްކަމަށް އަދި ނޫންކަމެއް އެޗްޕީއޭއިން ހާމަކޮށްފަ އެއްނުވެއެވެ. މާލޭގައި ދިރިއުޅޭ މީހެއްގެ ގައިން ކޮވިޑް-19 އަށް ޕޮޒިޓިވް ވެގެން ފުރަތަމަ ރިޕޯޓްކޮށްފައިވަނީ މިދިޔަ ބުދަ ދުވަހުއެވެ. އޭގެފަހުން ހަތް މީހަކު މިވަނީ ވައިރަސް އަށް ޕޮޒިޓިވްވެފަ އެވެ. ފުރަތަމަ ވައިރަސް އަށް ޕޮޒިޓިވްވި މީހާ އާއި ކްލޯޒް ކޮންޓެކްޓްވި މީހުންގެ އަދަދު 200 އަށް ވުރެ މައްޗަށް އަރައެވެ.
ކޮވިޑް-19 ފެތުރުން ކޮންޓްރޯލްކުރުމަށް މާލެ ސަރަހައްދު ވަނީ ލޮކްޑައުންކޮށްފައެވެ. އަދި ހުކުރު ދުވަހުގެ އިރުއޮއްސި 6 ން ފެށިގެން ރާއްޖޭގެ އެއް ރަށުން އަނެއް ރަށަށް އަރާ ފޭބުން ވަނީ މަނާކޮށްފައެވެ.
