ކޮވިޑް-19 އާ ޗައިނާ އާ ގުޅުވާ ޓްރަމްޕް ދައްކަވާ ވާހަކަފުޅުތަކަށް ޗައިނާ އާއި ރަޝިއާގެ ފާޑުކިޔުން

ކޮވިޑް-19 ދުނިޔޭގައި ފެތުރިގެން ދިއުމުގެ ފަހަތުގައި ވަނީ ޗައިނާގެ އޮޅުވާލުންކަމަށް އެމެރިކާގެ ރައީސް ވިދާޅުވުމުން، ޗައިނާ ގެ ބޮޑުވަޒީރު ޝީ ޖިންޕިންގ އާއި ރަޝިއާގެ ރައީސް ވްލެޑްމިއަރ ޕޫޓިން ގެ ފާޑުކިޔުން އަމާޒުވެއްޖެ އެވެ.

ޝީ އާއި ޕޫޓިން ވަނީ ފޯނުން ގުޅުއްވާ ކޮވިޑް-19 އާ ގުޅިގެން ކުރަމުންގެންދާ މަސައްކަތްތަކާއި ގުޅިގެން ބުރާސްފަތި ދުވަހު މަޝްވަރާކުރައްވާފަ އެވެ. އަދި ޓްރަމްޕް ގެ ވާހަކަފުޅުތަކަކީ، މި ވަބާ އިން ސަލާމަތްވުމަށް މުޅި ދުނިޔެ އިން ކުރަމުންގެންދާ މަސައްކަތަށް އިތުރު ހުރަހެއް ކަމަށް ސިފަކުރެއްވި އެވެ.

ރަޝިއާގެ ރައީސް ވަނީ ޗައިނާ އިން ވައިރަސް ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ތަޢުރީފުކޮށްފަ އެވެ. އަދި މި ވައިރަސް އިން އަރައިގަތުމަށް ޗައިނާ އިން ރަޝީއާ އަށް ވަމުން ގެންދާ އެހީތަކަށް ޝުކުރުއަދާކުރައްވާފަ އެވެ.

ދެ ޤައުމުން ވެސް ވަނީ އެއް ޤައުމު އަނެއް ޤައުމަށް އެހީވުމުގެ ގޮތުން، ސްޕެޝަލިސްޓުންނާއި، ޞިއްޙީ އާލާތްތަކާއި، ޕްރޮޓެކްޓިވް ގިއަރުގެ އިތުރުން ބޭސް ފޮނުވާފަ އެވެ. އަދި ކުރިއަށް އޮތް ތަނުގައި ވެސް އެހެނިހެން އެހީ ފޯރުކޮށްދިނުމާއި ގުޅޭގޮތުން ދެ ޤައުމުގެ ލީޑަރުންގެ މެދުގައި ވަނީ މަޝްވަރާ ކޮށްފައެވެ.

އެމެރިކާ އިން އަންނަނީ ކޮވިޑް-19 ފެތުރެން ފެށުނު ގޮތާއި، އެއީ ކޮންތަނަކުން އުފަންވީ ވައިރަހެއްތޯ ތަހުޤީޤުތަކެއް ކުރަމުންދާ ކަން ހާމަކޮށްފައެވެ. އަދި މިއީ ޗައިނާ ގެ ވޫހާން ސިޓީގައި ހުންނަ ލެބޯޓްރީ އެއްގައި ވާލު ދިރާސާކުރަން އުޅުމުގެ ތެރޭގައި ފެތުރިގެން އައި ވައިރަސްއެއް ކަމަށްބުނެ އެ ޤައުމުން ވަނީ ޗައިނާ އަށް ބޮޑެތި ތުހުމަތުތަކެއް ކޮށްފައެވެ.