އިންތިހާބުގައި ވާދަކުރާތީ ސަސްޕެންޝަނުގައި ތިބި މުވައްޒަފުންނަށް ރޯދަ އިނާޔަތް ދެވޭތޯ ބަލަނީ
ސިވިލް ސަރވިސްގެ 204 މުވައްޒަފަކު ލޯކަލް ކައުންސިލް އިންތިހާބުގައި ވާދަކުރޭ
ސިވިލް ސަރވިސް ކޮމިޝަންގެ ރައީސް އަދި ބައެއް މެމްބަރުން
ލޯކަލް ކައުންސިލްތަކުގެ އިންތިހާބަށް ކުރިމަތިލުމުން އިންތިހާބުގެ ގާނޫނުގެ ދަށުން މުސާރައާއި އިނާޔަތްތައް ނުލިބޭގޮތަށް ސަސްޕެންޑް ވެފައިވާ ސިވިލް ސަރވިސްގެ މުވައްޒަފުންނަށް ރޯދަ މަހުގެ އިނާޔަތް ދެވޭތޯ ބެލުމުގެ މަސައްކަތް ކުރަމުންދާ ކަމަށް ސިވިލި ސަރވިސް ކޮމިޝަން (ސީއެސްސީ) އިން ބުނެފިއެވެ.
ސީއެސްސީން ނެރެފައިވާ ބަޔާނެއްގައި ވަނީ، ސިވިލް ސަރވިސްގެ މުވައްޒަފުންގެ ސަސްޕެންޝަންގެ މުއްދަތު އިތުރުވެގެންދާކަމާއި، މި ކަމުގެ ސަބަބުން އެ އިންތިޚާބަށް ކުރިމަތިލާފައިވާ ސިވިލް ސަރވިސްގެ މުވައްޒަފުންނަށް ނުހަނު ގިނަ ގެއްލުންތަކާއި ދަތިތަކެއް ކުރިމަތިވަމުންދާކަމާ މެދު އެ ކޮމިޝަނުން އިންތިހާއަށް ކަންބޮޑުވާ ކަމުގަ އެވެ.
ލޯކަލް ކައުންސިލްތަކުގެ އިންތިހާބުގެ ގާނޫނުގައިވާ ގޮތުން ނަމަ، ސިވިލް ސަރވިސްގެ މުވައްޒަފަކު އިންތިހާބަކަށް ކުރިމަތިލައިފިނަމަ ސިވިލް ސަރވިސްގެ ވަޒީފާ އިން ސަސްޕެންޑް ވާނެ އެވެ. އަދި މި މުއްދަތުގެ ތެރޭގައި އެ މީހަކު ހުރި ވަޒީފާގެ އެއްވެސް މުސާރައެއް ނުވަތަ އިނާޔަތެއް ނުހިނގާނެ އެވެ.
މި މުވައްޒަފުންގެ މައްސަލަ އަށް ހައްލެއް ހޯދުމަށް ރައްޔިތުންގެ މަޖިލީހަށް ސިޓީއެއް ހުށައަޅާފައިވާނެ ކަމަށް ސިވިލް ސަރވިސް ކޮމިޝަނުން ވަނީ ހާމަކޮށްފަ އެވެ. އަދި މަޖިލީހުގައި ހިމެނިވަޑައިގަންނަވާ ބައެއް މެމްބަރުން ވެސް ވަނީ މިކަމާ ކަންބޮޑުވުން ފާޅުކޮށް، މި މުވައްޒަފުންގެ މައްސަލަ އަށް ހައްލެއް ހޯދަން ޖެހޭ ކަމަށް ގޮވާލާފަ އެވެ.
ލޯކަލް ކައުންސިލް އިންތިހާބު ފަސްކުރުމަށް ފަހު، އިންތިހާބު ބޭއްވޭނެ ތާރީހެއް ކަނޑައަޅާފައެއް ނުވެއެވެ. އަދި މި މައްސަލައިގެ ބަހުސް ރައްޔިތުންގެ މަޖިލީހުގައި ކުރިއަށްދާއިރު، މިހާތަނަށް ހައްލެއް އައުމާ ގާތަށް ވެސް އަދި ބަހުސް ކުރެވިފައެއް ނުވެ އެވެ.
ރައްޔިތުންގެ މަޖިލީހުގެ އިތުރުން، އިލެކްޝަންސް ކޮމިޝަނާ ވެސް މިކަމުގެ މަޝްވަރާތައް ކުރުމަށް ނިންމާފައިވާ ކަަމަށް ސިވިލް ސަރވިސް ކޮމިޝަނުގެ ބަޔާނުގައި ވެއެވެ. އަދި އެ މުވައްޒަފުންގެ މައްސަލަ އަށް ހައްލެއް ހޯދުމަށް ޝަރުއީ މަރުހަލާ އަށް ދިއުމަށް ނިންމާފައިވާ ކަމަށް ވެސް އެ ކޮމިޝަނުގެ ބަޔާނުގައިވެ އެވެ.
ސިވިލް ސަރވިސް ގައި މަސައްކަތްކުރާ 204 މުވައްޒަފަކު ލޯކަލް ކައުންސިލް އިންތިހާބުގައި ވާދަކުރެ އެވެ. އަދި އެޕްރިލް މަހު ބާއްވަން ހަމަޖެހިފައި އޮތް އިންތިހާބު ފަސްވުމާއި ގުޅިގެން މި ފަރާތްތަކުގެ ހައްގުތަށް ގެއްލެމުންދާ މައްސަލައިގައި އެތައް ބަޔަކު އަންނަނީ ކަންބޮޑުވުން ފާޅުކުރަމުންނެވެ.
