ކޮވިޑް-19 އަށް ޕޮޒިޓިވްވި ތިން މީހުންނާ ކޮންޓެކްޓްވި 242 މީހަކު ޓެސްޓް ކުރަނީ

ބުދަ ދުވަހު މާލެއިން ކޮވިޑް-19 އަށް ޕޮޒިޓިވްވި ދެ މީހުންނާއި ކުޑަ ކުއްޖާއާ ކޮންޓެކްޓްވި 242 މީހަކު ވާކަމަށް ނޭޝަނަލް އެމަޖެންސީ އޮޕަރޭޝަން ސެންޓްރު (އެންއީއޯސީ) އިން ބުނެފި އެވެ.

ބުރާސްފަތި ދުވަހު އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި އެންއީއޯސީ ތަރުޖަމާނު މަބްރޫކް އަޒީޒު ވިދާޅުވީ، ބުދަ ދުވަހު އެންމެ ފުރަތަމަ ޕޮޒިޓިވްވިކަން އެނގުނު މީހާއައި ދެވަނައަށް ޕޮޒިޓިވްވި ކުޑަ ކުއްޖަކީ ފުރަތަމަ ޕޮޒިޓިވްވި މީހާގެ ދަރިފުޅު ކަމަށެވެ. އަދި ތިންވަނަ މީހާއަކީ ފުރަތަމަ ޕޮޒިޓިވްވި މީހާއާ "ކްލޯޒް ކޮންޓެކްޓްވި" މީހެއް ކަމަށެވެ.

Advertisement

ރާއްޖޭގައި މިހާތަނަށް ކޮވިޑް-19 އަށް 23 މީހަކު ޕޮޒިޓިވް ވެފައިވާއިރު، ބުދަ ދުވަހު، ޕޮޒިޓިވްވީ "ޕޭޝަންޓް 21" އެވެ. ދެވަނައަށް ޕޮޒިޓިވްވި ކުޑަ ކުއްޖާއަކީ "ޕޭޝަންޓް 22" އެވެ. އަދި ތިންވަނަ އަށް ޕޮޒިޓިވްވީ މީހަކީ "ޕޭޝަންޓް 23" އެވެ. މިއި މިހާތަނަށް ރާއްޖެއިން "ކޮމިއުނިޓީ ސްޕްރެޑް" ގެ ގޮތުގައި ފާހަގަ ކުރެވުނު ފުރަތަމަ ކޭސް އެވެ.

މީގެކުރިން ކޮވިޑް-19 އަށް ޕޮޒިޓިވްވި 20 މީހުންގެ ތެރެއިން، ކުރެއްދޫ އިން ފެނުނު ފަސް މީހުން ފިޔަވައި ދެން ފެނުނު ކޭސްތަކަކީ، ރާއްޖެއަށް އިމްޕޯޓް ވެފައިވާ ކޭސްތަކެއް ކަމަށް ވަނީ ކަނޑައަޅާފަ އެވެ. އައި އެ 20 މީހުންގެ ތެރޭގައި ހިމެނޭ ފަސް ދިވެހިންނަކީ ރާއްޖެއިން ބޭރުން އައި ފަރާތްތަކެކެވެ.

މަބްރޫކް ވިދާޅުވީ ބުދަ ދުވަހު ކޮވިޑް-19 އަށް ޕޮޒިޓިވްވި ޕޭޝަންޓް 21 އާއި ޕޭޝަންޓް 23 އަކީ "ކްލޯޒް ކޮންޓެކްޓް" ދެ މީހުން ކަމަށްވާތީ، އެބަލި އެރީ އެތަނުން ކާކުގެ ގައިން ކާކުގެ ގަޔަކަށް އަދި ސާފު ނުވާކަމަށެވެ. އެންއީއޯސީން ބުނީ ޕޭޝަންޓް 21 އަދި ޕޭޝަންޓް 22 އާ ކޮންޓެކްވި، މީހުންގެ ތެރެއިން 207 މީހަކާއި ޕޭޝަންޓް 23 އާ ކޮންޓެކްވި 23 މީހަކު ވާކަމަށެވެ.

އެގޮތުން ޕޭޝަންޓް 21 އާ ކޮންޓެކްޓްވި 207 މީހުގެ ތެރެއިން، ހައި ރިސްކް 75 މީހަކު އެބަހުރި ކަމަށާއި ޕޭޝަންޓް 23 އާ ކޮންޓެކްޓްވި މީހުންގެ ތެރެއިން ހައިރިސްކް 7 މީހަކު ވާކަމަށެވެ.

މަބްރޫކް ވިދާޅުވީ، 5 ދުވަހުގެ ތެރޭގައި މިހާގިނަ ބަޔަކާއި ކޮންޓެކްވެފައިވަނީ، ޕާޓީ ބާއްވައި މަސްދަތުރުތައްފަދަ އެއްވެ އުޅުންފަދަ ކަންކަން ހިނގާފައިވާތީ ކަމަށެވެ. މާލެއިން ކޮވިޑް-19 އަށް ޕޮޒިޓިވްވި ފުރަތަމަ މީހާއާއެކު މާލެ ސަރަހައްދުވަނީ ލޮކްޑައުން ކޮށްފަ އެވެ.